Skírnir - 01.04.2014, Qupperneq 34

32
GUÐRÚN JOHNSEN
SKÍRNIR
upp á 1,1 milljarð breskra punda við móðurfélagið á íslandi frá vori
2008, sem brutu í bága við þær lausafjárreglur sem bankanum voru
settar, og reyndist ekki hafa nægilegt laust fé til að mæta útstreymi
af Edge-reikningunum eftir að áhlaup var hafið. Eftir að upp komst
um þessi undanbrögð dró móðurfélagið enn frekar á lánalínu frá
dótturfélaginu KSF án þess að koma með viðhlítandi tryggingar
(Rannsóknarnefnd Alþingis: 2010 bls. 160-162). Örlög Kaupþings
fólust því í þeim undanbrögðum sem stjórnendur þess sýndu með
því að virða lausafjárreglur breska eftirlitsaðilans að vettugi. Þar sem
lánasamningar félagsins voru háðir því að ef stórum dótturfélögum
samsteypunnar væri sjálfhætt og þeim lokað, jafngilti það van-
efndum á samningunum og lánin því á gjalddaga samstundis. Við
því gat Kaupþing ekki orðið þrátt fyrir lán til þrautavara sem veitt
var af Seðlabanka Islands, og var bankinn þá settur í slitameðferð af
íslenska fjármálaeftirlitinu. Þrátt fyrir að hafa fært innistæður
Kaupþing Edge yfir til hollenska bankans ING Direct gáfu breskir
eftirlitsaðilar bankanum tækifæri til að halda áfram rekstri ef 300
milljónir punda bærust sem beðið hafði verið eftir og lofað var af
hálfu stjórnenda KSF. I skýrslu rannsóknarnefndar Alþingis er at-
burðunum 8. október 2008 þannig lýst:
Um sama leyti og breski fjármálaráðherrann var að flytja ræðu sína áttu
fyrirsvarsmenn Kaupþings og KSF símafund með forstjóra FSA. I skýrslu
Ármanns Þorvaldssonar fyrir rannsóknarnefnd kom fram að um leið og
hann hefði séð í sjónvarpsfréttum að fjármálaráðherra hefði tekið yfir inn-
lán KSF og fært þau til ING Direct N.V. hefði hann hringt í Juliu Dunn
[starfsmann FSA] og spurt hana hvað væri að gerast þar sem hann taldi að
þau væru að vinna í þvx að afla 300 milljóna punda til að halda bankanum
opnum og hefðu þau ráðgert símafund síðar um daginn um það atriði.
Hefði Dunn þá komið af fjöllum og óskað eftir því að fá að hringja í Ár-
mann síðar. Hefði þannig verið ljóst að starfsmönnum FSA var almennt
ekki kunnugt um aðgerðir fjármálaráðuneytisins. Dunn hefði síðan hringt
aftur og sagt að ef KSF kæmi með 300 milljónir punda gæti bankinn haldið
áfram rekstri sínum. Ármann segir að í beinu framhaldi hafi síðan verið
haldinn símafundur með Hector Sants. Þar hafi FSA fyrst spurt hvort
margræddar 300 milljónir punda væru á leiðinni. Hreiðar hafi þá bent FSA
á að það væru lítil heilindi í þeirra samskiptum þar sem innlánin væru hirt
af KSF án nokkurrar viðvörunar á meðan verið væri að vinna eftir áætlun