Skírnir - 01.04.2014, Side 60

58
NJÖRÐUR SIGURJÓNSSON
SKÍRNIR
Fyrir þessa greiningu voru báðar leiðir farnar en efnistökin hér
eru þó eðli málsins samkvæmt sérvalin og dregin að mestu af því
sem er greinanlegt eða aðgengilegt áheyrandanum.6 I athuguninni
var fyrst og fremst lögð áhersla á hina táknrænu þýðingu þingfunda
og merkingu þess umhverfis sem þeir eru haldnir í.
Forseti hringir
Þingpallar eru, í skilningi þeirra reglna sem um þá gilda, áheyr-
endastúka. Pallarnir eru hugsaðir til þess að fólk geti heyrt það sem
fram fer í þingsal. Þeir eru hinsvegar ekki nema að hluta til gerðir til
að horfa á þingheim af því að útsýni er ekki gott yfir þingsalinn og
ekki hægt að beygja sig fram af svölum stúkunnar svo gestir sjá illa
allan salinn. Vegna þessarar afstöðu þingpalla lítur fundarsalur
Alþingis út eins og nokkurskonar gryfja. Þröngt er í salnum og þar
sitja þingmenn þétt við borð sem hefur verið komið fyrir til þess að
nýta rýmið sem best.
Húsgögn og fyrirkomulag þeirra er auðvitað mikilvæg í mati á
innra samhengi skipulagsheildar og það er merkilegt í sögulegu sam-
hengi að þegar hljóðupptökur á ræðum þingmanna urðu fastur liður
var uppstillingu fundarsalarins breytt þannig að þingmenn þurftu nú
að stíga í sérstaka pontu til þess að tala. Áður höfðu þingmenn talað
úr sæti sínu en upptökurnar eru gerðar til þess að auðvelda ritun á
ræðum. Þannig breytir upptökutæknin væntanlega nokkru um til-
högun fundanna, yfirbragði, raddbeitingu og líkamstjáningu.
I þingsalnum heyrist áberandi hljómur þegar forseti þingsins
slær í bjöllu og notar við fundarstjórn. Þingmönnum er úthlutaður
ræðutími eftir fyrirfram skilgreindum reglum og gefur bjöllusláttur
6 Þá er rétt að taka fram að þegar hér er rætt um hljóðheim Alþingis er ekki fjallað
um umræður á kaffistofum eða þá augljósu staðreynd að stærstur hluti vinnu þing-
manna fer fram annars staðar en á þingfundum, í þinghúsinu eða þingsal. Mikill
hluti samskipta fer þannig fram á fundum í þingflokki og nefndum í öðrum húsa-
kynnum; þá eru fundir víða um borg og í kjördæmum, formlegir og óformlegir,
og mikill hluti vinnu þingmanna fer fram á heimilum þingmanna og í bílnum, t.d.
x gegnum síma. Tæknin breytir miklu í þessu samhengi og þannig er hægt að fylgj-
ast með umræðum í þingsal í gegnum beinar sjónvarpssendingar, af skrifstofunni
eða hvar sem er í heiminum.