Skírnir - 01.04.2014, Page 65
SKÍRNIR
HLJÓÐMENNING ALÞINGIS
63
um liðum er meðal annars fjallað um það að ætla að breyta stjórn-
skipuninni, byltingar og hryðjuverk. Dómarnir voru þó ekki í sam-
ræmi við alvarleika ákærunnar því hefðu mótmælendur verið
sakfelldir fyrir árás á Alþingi gátu þeir átt von á dómi sem hljóðaði
upp á allt að einu ári og upp í ævilangt fangelsi. Það er einnig mikil-
vægt að hér var „engin vísbending í málinu um það að ákærðu hafi
ætlað sér að aðhafast annað en að láta heyra í sér mótmæli vegna
ástandsins í landinu frá þingpöllunum“ svo vitnað sé til úrskurðar
héraðsdóms (DómurHéraðsdómsReykjavíkur 16. febrúar 2011...).
Þá segir í úrskurði héraðsdóms að það verði „með engu móti talið
að fyrir þeim hafi vakað að reyna að kúga Alþingi eða að athafnir
þeirra geti talist vera sú árás á þingið að sjálfræði þess hafi verið
hætta búin“.
Það er engin ástæða til þess að taka dómsorð sem það rétta eða
síðasta sem sagt er um þennan atburð, en dómsorðin, og þá sér-
staklega kæra ríkissaksóknara, gefur okkur innsýn í hljóðmenningu
alþingishússins og hve mikilvægt er talið að vernda hana. Það er at-
hyglisvert að samkvæmt úrskurði héraðsdóms ætluðu hinir ákærðu
að vera með hávaða í sölum Alþingis, þar sem þeir áttu að sitja í
þögn, að láta „heyra í sér mótmæli". I dóminum er síðan haft eftir
mælanda: „út, farið út, þetta [ógreinil.] þjónar ekki tilgangi sínum
lengur, út drullið ykkur út ... “
Þessi truflun á þingfundi hlaut mikla athygli en hefur þó ekki
verið skoðuð í sambandi við hávaða sem stjórnmálalegt og menn-
ingarlegt fyrirbæri. Hefur það sem er „ógreinil." einhverja merk-
ingu? Hvað segir það okkur um hávaða? Hér í upphafi var minnst
á mikilvægi þess að stjórna hávaða og þá hugmynd Jacques Attalis
að öll átök og allar meginbreytingar í samfélagi tengist stýringu á
hávaða. Fyrir Attali er hávaði einskonar myndhverfing fyrir hvers-
kyns bjögun og „viðnám“ sem síðar hefur áhrif á samfélagið og til-
raunir til þess að hafa hemil á hávaðanum eru lýsandi fyrir það
hvernig valdi er beitt til verndar óbreyttu ástandi. I því samhengi
hefur hávaðinn og hið ógreinilega greinilega merkingu og hugsan-
lega sterk skilaboð.
Og skilaboðin eru ekki algerlega ógreinileg, þau eru skýr að
vissu marki, þ.e. beiðni til viðstaddra að hugleiða stöðu sína og fara