Fjölrit RALA - 10.05.1988, Page 6

2
INNGANGUR
Þorsteinn Tómasson
Sú skýrsla sem hér birtist um störf Rannsóknastofnunar landbúnaðarins er með
svipuðu sniði og skýrslan sem út kom 1985 og nær til þriggja ára.
Skýrslan er tengd verkefnaskrá og auk lýsinga á helstu verkefnum er getið um
niðurstöður þar sem þær liggja fyrir.
ítarleg skýrsla sem þessi er mikilvægt gagn um starfsemi stofnunarinnar, sérstaklega
í ljósi þeirrar miklu umræðu sem nú á sér stað um starfsemi og skipulag leiðbeininga,
kennslu og rannsókna í þágu íslensks landbúnaðar.
Á fjárlögum fyrir árið 1988 gerðist það að fjárveitingar til reksturs tilraunastöðva
stofnunarinnar víða um land drógust saman um nær helming og ljóst er að stofnunin
stendur frammi fyrir talsverðum breytingum sem koma munu fram á næstu árum.
Á þvl tímabili sem skýrslan nær til hafa áherslur í verkefnavali breyst nokkuð.
Rannsóknir í þágu loðdýraræktar hafa aukist verulega á sviði fóðrunar, erfða og húsvistar.
Tekin hafa verið upp verkefni tengd fiskeldi og fiskirækt. Verkefni á sviði landgræðslu og
gróðurverndar hafa aukist verulega og áherslur á þessu sviði hafa að nokkru breyst með
auknu vægi á leit að nýjum tegundum landgræðsluplantna, fræræktarrannsóknir og þróun
nýrra ræktunaraðferða. Starfsemi fæðudeildar stofnunarinnar er að breytast nokkuð í
framhaldi af því að styrkveitingum Kellogg stofnunarinnar til uppbyggingar rannsókna og
kennslu í þessum fræðum er lokið. Af því tilefni var haldin alþjóðleg ráðstefna hér á landi
í ágúst 1986.
Samstarf ýmissa stofnana og fyrirtækja einkennir 1 æ ríkari mæli verkefnaskrá
stofnunarinnar. Fjárveitingar Rannsóknasjóðs rannsóknaráðs, framleiðnisjóðs og
landgræðslu- og landverndaráætlunar til rannsókna hafa verulega stuðlað að þeirri þróun.
Á þessu tímabili kemst tilraunafjósið á Möðruvöllum í gagnið. Takmarkaður
framleiðsluréttur setur þó rekstri búsins nokkrar skorður. Tilraunafjós Búnaðarsambands
Suðurlands og Rala á Stóra Ármóti var tekið í notkun vorið 1987 og eru nú hafnar
tilraunir í því. Hefur því orðið veruleg breyting til batnaðar á aðstöðu stofnunarinnar til að
takast á við verkefni á sviði nautgriparæktar.
Á liðnu ári fékkst leyfi til að hefja framkvæmdir við byggingu bútæknihúss á
Hvanneyri sem var orðið mjög brýnt.
f árslok 1987 var samþykkt í stjórn Rala starfsáætlun til næstu fimm ára og er
áætlunin hin þriðja sem stofnunin vinnur í samfloti með öðrum rannsóknastofnunum
atvinnuveganna.
Aðstaða til landbúnaðar er að mörgu leyti sérstæð hér á landi, miðað við þær aðstæður
sem ríkja hjá nágrannaþjóðum. Ýmsir þættir í umhverfinu torvelda landbúnaðarframleiðslu
en aðrir opna möguleika til hagstæðrar framleiðslu. Til að nýta þessa aðstöðu sem best er
okkur nauðsyn á virku rannsókna- og þróunarstarfi til öflunar og miðlunar þekkingar.