Gerðir kirkjuþings - 2019, Qupperneq 15

15
höfum reyndar látið það ná yfir lengra tímabil því þátttaka kirkjunnar á Artic Circle
ráðstefnunni hefur varað fram undir miðjan október. Í tengslum við þátttöku á þessari
norðurslóðaráðstefnu hefur þjóðkirkjan staðið fyrir málþingi um umhverfismál með
þátttakendum frá ýmsum kirkjum og kirknasamtökum heimsins og nú síðast einnig
með fulltrúum Sameinuðu þjóðanna, Landverndar og fleirum. Þeir kennimenn og
konur sem hafa sótt þessar samkonur hafa endað dvölina með því að prédika í kirkjum á
höfuðborgarsvæðinu um umhverfismál og aðstæður heima fyrir.
Þjóðkirkjan lætur sig umhverfið varða því við höfum hlutverk í hinni sístæðu sköpun
Guðs og hér er um siðferðilegt málefni að ræða ekki síður en vísindalegt.
Unga fólkið
Um síðustu helgi var haldið landsmót æskulýðsfélaga kirkjunnar. Það fór fram í Ólafsvík
og var yfirskriftin „skapandi landsmót“. Það var gaman að hitta þetta unga prúða fólk
sem hafði flest keyrt um langan veg til að sækja mótið. Þetta unga fólk mun væntanlega
muna eftir kirkjunni sinni á leið sinni um lífsins veg og eiga sína fulltrúa á kirkjuþingum
framtíðarinnar. Kirkjan er nú ekki meira deyjandi en það að hvarvetna um land allt er fólk
sem leggur á sig ómælda vinnu í kirkjunni og styður þar með samfélag sitt og heldur utan
um allt það góða starf sem fram fer í kirkjum landsins. Þetta þarf ég ekki að segja ykkur
því þið eruð hluti af þeim góða hópi.
Unga fólkið er framtíðin er stundum haft á orði, en unga fólkið er líka hér og nú og
kirkjuþing unga fólksins á líka fulltrúa sinn á þessu þingi. Víðs vegar um heiminn hefur
unga fólkið beitt sér í loftslagsmálunum og þau hafa líka áhrif á starfið í kirkjum vítt og
breitt um veröldina. Í Eyjafjarðar- og Þingeyjarprófastsdæmi hafa þau ásamt fleirum staðið
fyrir verkefninu „fasta fyrir umhverfið“. Verkefnið fjallaði um að koma með hagnýtar
leiðir í umhverfisstarfi og var það 40 daga áskorun um að draga úr vistsporinu og eiga
umhverfisvænni hversdag.
Kosning á kirkjuþing og lýðræðið
Ég fagna því að á kirkjuþinginu núna er lögð fram tillaga að breytingum um kjör til
kirkjuþings. Bakland fulltrúa kirkjuþings er ekki nógu mikið eða sterkt þegar fulltrúar geta
verið með allt niður í 3 atkvæði á bak við sig. Með tillögunni gefst kirkjuþingi tækifæri til
að ræða starfsreglur um kjör til kirkjuþings þó breytingartillagan feli aðeins í sér að fella
niður fimm orð.
Það er talað um að fulltrúalýðræði ríki í kirkjunni. Það endurspeglast m.a. í kosningum
á kirkjulegum vettvangi og hér á kirkjuþinginu. Ég hef sagt það áður og segi það enn. Það
á að kjósa til kirkjuþings í almennri kosningu alls þjóðkirkjufólks. Það er hvort sem er
kosið til kirkjuþings í sama mánuði og til sveitarstjórna. Þeir sem eru í þjóðkirkjunni fá
þá 2 atkvæðaseðla til að fara með inn í kjörklefann, annan til kirkjuþingskosninga, hinn
til sveitarstjórnarkosninga. Þannig yrði lýðræðið betur tryggt og hægt að nota tækifærið
til að laga skráningar í kirkjunni. Ég myndi vilja sjá lista fólks í hverju kjördæmi. Bak við
nöfnin á listunum er hugmyndafræði sú sem fólkið aðhyllist í sambandi við stjórn og
framgöngu kirkjunnar í landinu. Fólk getur þá kosið þann lista sem það telur best til þess