Gerðir kirkjuþings - 2019, Page 83

83
33. mál 2019
Flutt af Hjalta Hugasyni
Starfsreglur um breytingu á starfsreglum um
kosningu biskups Íslands og vígslubiskupa nr. 333/2017
1. gr.
7. mgr. 3. gr. starfsreglnanna orðast svo:
Kosningarrétt eiga vígðir starfsmenn á biskupsstofu sem eru í föstu starfi.
2. gr.
Orðin „vígðir kennarar í föstu starfi við guðfræði- og trúarbragðafræðideild Háskóla
Íslands“ í 4. mgr. 4. gr. starfsreglnanna falla brott.
3. gr.
Starfsreglur þessar, sem settar eru með heimild í 59. gr. laga um stöðu, stjórn og starfshætti
þjóðkirkjunnar nr. 78/1997, með síðari breytingum, öðlast gildi við birtingu.
Athugasemdir við tillögu þessa.
Samkvæmt eldri starfsreglum höfðu allir guðfræðimenntaðir kennarar í föstu starfi við
guðfræðideild, síðar guðfræði- og trúarbragðafræðideild Háskóla Íslands, kosningarrétt
við kjör biskups Íslands og vígslubiskupa. Árið 2017 varð breyting á í þessu efni þannig að
eftir það var vígsla áskilin í þessu sambandi.
Kosningarréttur kennara við guðfræðideild, síðar guðfræði- og trúarbragða-fræðideild,
réðst í upphafi af því hlutverki þeirra að mennta presta og síðar einnig djákna til þjónustu í
þjóðkirkjunni. Því var ekki gerður greinarmunur á vígðum og óvígðum kennurum í þessu
efni enda bera kennarar sömu ábyrgð í þessu efni óháð vígslu. Sá munur sem gerður er á
vígðum og óvígðum kennurum með breytingunni 2017 styðst því ekki við málefnaleg rök.
Með þessari tillögu er lagt til að staða óvígðra og vígðra kennara verði jöfnuð á þann hátt
að hvorugur hópurinn hafi kosningarrétt við biskupskjör.
Þrátt fyrir þá breytingu sem hér er lögð til og samþykkt hefur verið í hópi kennara
vill guðfræði- og trúarbragðafræðideild eftir sem áður eiga sem nánast samstarf við
þjóðkirkjuna og rækja áfram af alúð þau þjónustu- og ráðgjafarhlutverk sem hún hefur
hingað til gegnt.
Nefndarálit löggjafarnefndar
Löggjafarnefnd hefur fjallað um málið og leggur til að það verði samþykkt.