Tímarit hjúkrunarfræðinga - 2021, Qupperneq 30

28 Tímarit hjúkrunarfræðinga | 3. tbl. 97. árg. 2021
Laugavegshlaupið
Sjúkragæsla
í Þórsmörk
Laugavegshlaupið var haldið þann 17. júlí í sumar en
hlaupið er um 55 kílómetrar þar sem þátttakendur hlaupa
úr Landmannalaugum í Þórsmörk. Leiðin er krefjandi,
hlaupið er í snjó, yfir ár, í gegnum hraun og sanda með
tilheyrandi brekkum. Í ár var bæði mótvindur, sól og
talsverður hiti sem gerði mörgum hlaupurum erfiðara fyrir.
Fjórir hjúkrunarfræðingar og einn læknir sinntu sjúkragæslu
í Þórsmörk og einn hjúkrunarfræðingur var við Emstrur en
alls kláruðu um 450 hlauparar hlaupið í ár. Við endamarkið
í Þórsmörk var reist sjúkratjald sem allir hlauparar fóru í
gegnum. Tjaldið var tvískipt þar sem frískir hlauparar sátu
í stólum en fyrir þá sem þurftu meiri aðhlynningu voru
legubekkir. Helstu verkefnin í sjúkratjaldinu fólust í því að sjá
til þess að hlaupararnir fengju næringu og drykki en einnig
þurfti að búa um sár og hrufl. Nokkrir þátttakendur þurftu að
fá æðalegg og vökva í æð og vöðvakrampar og verkir hér og
þar hrjáðu nokkuð marga hlaupara eftir þessa hrjóstrugu og
löngu leið.
Texti: Sölvi Sveinsson / Myndir: Sölvi Sveinsson og Hulda Gísladóttir
Skemmtileg áskorun að vinna í sjúkratjaldi fjarri
mannabyggðum
Það var áberandi hversu miklar tilfinningar hlaupararnir
upplifðu þegar þeir komu í mark, bæði gleði og sorg. Líkt
og gengur og gerist náðu sumir markmiði sínu en aðrir
ekki. Í sjúkratjaldinu skapaðist skemmtileg stemning þar
sem hlauparar deildu upplifun sinni af hlaupinu hver með
öðrum. Að fá að taka þátt í sjúkragæslu fjarri mannabyggðum
var áhugavert og hollt fyrir mig sem hjúkrunarfræðing. Að
stíga fyrir utan hið hefðbundna sjúkrahúsumhverfi og þurfa
að bjarga sér var áskorun því starfsaðstæðurnar voru svo
gjörólíkar því sem ég þekki úr mínu starfi á Landspítala.
Dagurinn var annasamur og langur en að sama skapi
skemmtilegt ævintýri. Ég gæti vel hugsað mér að sinna fleiri
svona verkefnum í framtíðinni og læt nokkrar svipmyndir úr
sjúkragæslunni í Þórsmörk í sumar fylgja með svo lesendur fái
betri innsýn í stemninguna og aðstæður á staðnum.