Bændablaðið - 02.11.2023, Side 32

32 Bændablaðið | Fimmtudagur 2. nóvember 2023
LÍF&STARF
Vír og lykkjur ehf · viroglykkjur@internet.is · 772-3200
Stroffur
Naglar
Víralásar
Járnabakkar
Plastlistar og stjörnur
Kambar
Klippur og beygjuvélar
Klippum og beygjum rúllustál í sjálfvirkri beygjuvél
Skógrækt:
Skakkaföll í skógum
Skógar landsins komu ekki
sérlega vel undan árinu sem er að
líða en trjávöxtur var í meðallagi
miðað við fyrri ár.
„Nokkur skakkaföll urðu
í skógum landsins á árinu,“
segir Þröstur Eysteinsson
skógræktarstjóri.
„Allmiklar skemmdir og nokkur
afföll voru á nýgróðursettum
plöntum í vetrarveðrum, sérstaklega
á Suðurlandi, en mikla storma gerði
í janúar. Vorfrost í apríl og maí eftir
vetrarhlýindi ollu kali á viðkvæmum
asparklónum á Norðurlandi en
ekki tiltakanlegum skemmdum á
trjágróðri þegar á heildina er litið.
Hins vegar gerði mikið saltveður í
vestanroki um hvítasunnu og meiri
skemmdir urðu á nýlaufguðum
trjám á Vesturlandi en við höfum
séð í mörg ár.
Bundnar vonir við náttúrulegan
óvin birkiþélunnar
Júnímánuður var síðan kaldur á
vestanverðu landinu þannig að trén
voru lengi að ná sér. Svo rættist úr
restinni af sumrinu og trén náðu sér
að miklu leyti.
Annars staðar á landinu urðu ekki
skemmdir í hvítasunnuveðrinu og á
landinu austanverðu var maí ágætur
og júní sá hlýjasti sem mælst hefur.
Þó að júlí og ágúst hafi verið
slakari þeim megin á landinu dugði
hitinn í júní til þess að vöxtur trjáa
varð þar ágætur,“ segir Þröstur
jafnframt.
Enn bar talsvert á skemmdum
af völdum birkikembu og birkiþélu
en Þröstur segir góðu fréttirnar þær
að fundist hafi náttúrulegur óvinur
birkiþélu á landinu (sníkjuvespa)
þannig að vonandi haldi þær
skemmdir ekki áfram að ágerast.
Aðrar skemmdir af völdum
skordýra eða sveppsjúkdóma hafi
ekki verið meiri en venjulega ef
frá sé talið að asparryð var mjög
áberandi austur á Héraði þetta haust.
Góð tíð hér og hvar vó
á móti skemmdum
„Þegar á heildina er litið var
sumarið sennilega í meðallagi
hvað varðar trjávöxt því góð tíð
sem skiptist vel milli landshluta vó
á móti skemmdum,“ segir Þröstur.
Að hans sögn er of snemmt að
segja nokkuð um hversu mikið var
gróðursett af trjám í ár þar sem þær
hafa ekki verið teknar saman hjá
Skógræktinni enn sem komið er.
Sama gildi um tölur varðandi
trjáfellingar enda grisjun enn
í gangi. /sá
Á ýmsu gekk í veðrum ársins, eins og verða vill, og skógar döfnuðu misvel
eftir landshlutum. Mynd / SÁ.
Rjúpnaveiði fer vel af stað
– Dagar mun fleiri en undanfarin ár
Veiðitímabilið hófst föstudaginn
20. október og segir Áki
Ármann Jónsson, formaður
Skotveiðifélags Íslands (Skotvís),
það fara vel af stað.
Veiði verður heimiluð fimm
langar helgar, eða frá föstudegi til
þriðjudags, sem Áki segir aukningu
frá fyrri árum. Nú sé opið fyrir
veiði í samtals 25 daga, en þeir hafi
ekki verið eins margir síðan 2006.
Jafnframt séu þetta heilir dagar, en í
fyrra hafi einungis mátt veiða hálfa
daga. Síðasti veiðidagurinn verður
21. nóvember.
„Það er mjög gott að hafa
svona marga daga til að velja
úr,“ segir Áki. Hans markmið
er jákvæð upplifun af veiðunum
umfram fjölda fugla og skipti
veðuraðstæður miklu máli.
Veiðimenn þurfi að leggja mikið
á sig til að fanga bráðina þegar
snjóinn skortir, en þá haldi rjúpan
sig til hlés og feli sig milli steina
og þúfna. Fyrstu veiðidagarnir hafi
einkennst af rigningu og hvassviðri,
sérstaklega sunnanlands og á suð-
vesturhorninu, sem leiði til þess að
fuglarnir séu dreifðir og styggir.
Áki efast um að margir hafi farið
til veiða í nágrenni Reykjavíkur,
en af því sem hann hefur heyrt
gekk veiðin prýðilega í öðrum
landshlutum og ekki hafi verið
merkjanlegur munur milli þeirra.
Stofninn yfir meðaltali

Áki segir rjúpnastofninn vera 30
prósent yfir meðaltali sem skýrist af
venjulegum stofnsveiflum. Vöxtur
hafi verið frá 2021 þegar stofninn
var í lægð.
Samt sem áður hafi verið
viðkomubrestur vegna vor- og
sumarhreta síðustu tvö ár á norð-
austurhluta landsins. Ungarnir séu
sérlega viðkvæmir fyrir bleytu og
kulda þegar þeir eru nýkomnir úr
eggi. Unnið sé að nýrri stjórnar- og
verndunaráætlun, sem byggist á
því að veiðin fari fram í fimm daga
skorpum eins og fyrirkomulagið
er núna. Þá geti veiðin farið
upp í allt að 45 daga ef stofninn
stendur vel. Áki bendir á að gögn
úr veiðikortakerfinu sýni að fjöldi
leyfilegra veiðidaga hafi lítil áhrif
á hversu oft veiðimenn ganga til
rjúpna eða heildarveiðina.
„Þetta er jólamaturinn hjá tíu til
tólf prósent þjóðarinnar samkvæmt
könnunum,“ segir Áki.
Þessi tala hafi haldist nokkuð
stöðug, en sveiflist þó aðeins í takt
við aflabrögð. Rjúpur varðveitast í
mörg ár í frysti og geymi veiðimenn
gjarnan fugla til hörðu áranna.
Að jafnaði þurfi einn fugl til að
metta hvern fullorðinn veislugest og
samkvæmt könnunum sem Skotvís
gerir meðal sinna félaga þá þarf hver
veiðimaður að meðaltali níu rjúpur
hver jól fyrir sína fjölskyldu. Að
lokum segist Áki hvetja til hófsamra
veiða eins og áður. /ÁL
Þegar lítið er um snjó þurfa veiðimenn að leggja mikið á sig þar sem rjúpan heldur sig til hlés. Mynd / Óskar Andri
Áki Ármann Jónsson.
Sameining samþykkt
Sameining Tálknafjarðarhrepps
og Vesturbyggðar var samþykkt
í íbúakosningu laugardaginn
28. október.
Íbúar í Tálknafjarðarhreppi
samþykktu tillöguna með 96%
atkvæða. 139 greiddu atkvæði með
sameiningu en 5 greiddu atkvæði
gegn sameiningu.
Auðir og ógildir atkvæðaseðlar
voru 1. Kjörsókn var 78,1%. Íbúar
í Vesturbyggð samþykktu tillöguna
með 82% atkvæða. 364 greiddu
atkvæði með sameiningu en 73
greiddu atkvæði gegn sameiningu.
Auðir og ógildir atkvæðaseðlar
voru 4. Kjörsókn var 52,48%.
/mhh