Tímarit hjúkrunarfræðinga - 2024, Blaðsíða 51

viljað fá meiri tíma með heilbrigðisstarfsmanni, betri hlustun og
aukna fræðslu. Þessar niðurstöður sýna okkur að heilsugæslan
þarf að vinna með breytingaskeiðið á markvissan hátt og veita
fræðslu til almennings og heilbrigðisstarfsfólks þannig að konur
séu upplýstari um þetta lífsskeið og þær meðferðir sem í boði
eru. Í þessari rannsókn kom fram að hormónauppbótarmeðferð
bætir líðan kvenna sem eru að ganga í gegnum breytingaskeið
og tíðahvörf. Hægt er að líta á breytingaskeiðið sem nýtt lífsskeið
konunnar og gengur hún í gegnum ákveðið þroskatímabil. Í þessari
rannsókn voru konurnar búnar að breyta ýmsu í sínu lífi, farnar að
hugsa betur um sína heilsu og drógu úr streitu, sem samræmist
niðurstöðum rannsóknar Sólrúnar Ólínu Sigurðardóttur (2018).
STYRKLEIKAR OG TAKMARKANIR
RANNSÓKNAR
Þessi rannsókn veitir innsýn í reynslu kvenna af áhrifum
hormónauppbótarmeðferðar á breytingaskeiði en það hefur ekki
verið skoðað áður hér á Íslandi. Styrkleiki rannsóknarinnar felst í
að farið var eftir ákveðinni rannsóknaraðferð Vancouver-skólans.
Veikleiki rannsóknarinnar er takmarkaður fjöldi þátttakenda og
hugsanlegt að þeir sem buðu sig fram til þátttöku hafi frekar haft
jákvæða reynslu af notkun hormónauppbótarmeðferðar.
Ritrýnd grein | Peer review