Goðasteinn - 01.09.2004, Síða 132

Goðasteinn 2004
lá þar oft í rúminu sínu þó verið væri að kenna því um aðra hvíldarstaði fyrir hann
var ekki að ræða.
Skóli byrjaði klukkan 10 á morgnana og kennt var til klukkan 3 síðdegis og
miðaðist þessi tímasetning við að nemendur hefðu einhverja birtuskímu til að
ganga milli bæja. Að Lágafelli komu gangandi krakkarnir frá Miðey, Vinaminni
sem var smábýli rétt fyrir sunnan Vatnahjáleigu, röskan klukkutíma gang, Alftar-
hól og Norðurhjáleigu sem nú heitir Lækjarhvammur, Búðarhóli og Guðna-
stöðum. Að vestan kom Þuríður í Vatnshól og svo við systkinin tvö. Alls munu
þetta hafa verið 11 eða 12 krakkar hvorn vetur.
Síðasta veturinn minn í skóla gekk ég upp að Miðey, var þá oftast samferða
krökkunum úr Búðarhólshverfi. Við hittumst austur á horni. í Miðey var kennt í
stórri stofu þannig að rúmt var um okkur miðað við það sem við vorum vön.
Einnig man ég að við strákanir komumst í verkfæra- eða smíðahús þar við vorum
í ýmiskonar tilraunastarfi sem ég hef engan áhuga fá að rifja nánar upp hér og nú.
Aftur á móti heldur Ingbjörg fermingarsystir mín frá Norðurhjáleigu því fram
að einhvern tímann þegar við vorum á leið heim úr skóla höfum við farið að
glíma á Miðeyjarrofunum og hún hafi lagt okkur Óla á Guðnastöðum, fermingar-
bræður sína, báða og að ég hafi tekið þessum ósigri með brosi á vör. En auðvitað
man ég ekkert eftir þessu. En hvað um það, þetta var árið áður áður en við fermd-
umst.
Við Óli notuðum okkur heimild í fræðslulögum þess tíma að taka fullnaðarpróf
ári fyrir fermingu og áttum báðir að fara í skóla næsta vetur, en gerðum ekki fyrr
en síðar. En það er önnur saga sem ekki verður sögð hér. Kennari þennan síðasta
vetur minn í skóla var Haraldur Jónsson bóndi í Gröf í Miklaholtshreppi, ágætur
kennari og heiðursmaður.
Þakka þeim sem hlýddu.
Mcignús Finnbogason
Landeyingar!
Er nokkur ástæða til annars en að vera
áskrifandi að Goðasteini?
íhugið málið...
-130-