Morgunblaðið - 14.10.2001, Blaðsíða 64

MORGUNBLAÐIÐ, KRINGLUNNI 1, 103 REYKJAVÍK, SÍMI 569 1100, SÍMBRÉF 569 1181, PÓSTHÓLF 3040,
ÁSKRIFT-AFGREIÐSLA 569 1122, NETFANG: RITSTJ@MBL.IS, AKUREYRI: KAUPVANGSSTRÆTI 1 SUNNUDAGUR 14. OKTÓBER 2001 VERÐ Í LAUSASÖLU 190 KR. MEÐ VSK.
V i ð s k i p t a h u g b ú n a ð u r
á h e i m s m æ l i k v a r ð a
Borgar túni 37
Sími 569 7700W W W. N Y H E R J I . I S
SJÓSLYSANEFND telur að senni-
legasta skýringin á því að sjór lak
inn í lest Ingimundar gamla HU 65,
sem sökk á Húnaflóa hinn 8. október
í fyrra, sé sú að rusl hafi safnast fyrir
við dælu með þeim afleiðingum að
hún varð óvirk.
Skipstjóri Ingimundar gamla
fórst með skipinu en hann náði ekki
að klæðast flotgalla líkt og vélstjóri
og stýrimaður sem báðir komust af.
Í niðurstöðum sjóslysanefndar
kemur fram að þar sem lögnin frá
dælunni var undir sjólínu hafi ekkert
hindrað að sjór rynni inn í lestina ef
síðuloki væri fastur eða óþéttur og í
gegnum dælu ef hún væri óvirk.
Gildistími skoðunar á botn- og síðu-
lokum var aðeins til maí 1999.
Hefði ekki átt að sökkva
Logn og spegilsléttur sjór var á
Húnaflóa þegar slysið varð og engin
undiralda og því engar veltuhreyf-
ingar á skipinu. Sjóslysanefnd telur
að miðað við þessar aðstæður hefði
skipið ekki átt að sökkva jafnvel þótt
lestin hafi verið full af sjó. Ástæður
þess að skipið sökk hafi verið þær að
vegna umgengni um bakborðsgang á
aðalþilfari, eftir að hættuástand kom
í ljós, hafi sjór átt greiða leið inn í
afturskipið. Með fullkominni lokun á
yfirbyggingu afturskips hefði skipið
ekki átt að sökkva.
Talið er að sjór hafi lekið inn í lest-
ina í um 13-14 klukkustundir án þess
að skipverjar yrðu þess varir. Þá var
magn í lest orðið um 62 tonn og í vél-
arrúmi um 7 tonn auk þess sem sjór
lá á dekki. Frá því skipstjóri varð var
við að sjór var farinn að fossa inn á
dekk og þar til skipið sökk liðu um 5-
10 mínútur.
Áður en skipið sökk tók það veltu
á bakborð en reisti sig síðan við eftir
að stýrimaður greip í stýrið og rétti
það á stjórnborða. Skipið tók síðan
djúpa veltu á bakborða og sökk hratt
með skutinn á undan.
Flotgallar mikilvægir
Sjóslysanefnd vekur sérstaka at-
hygli á mikilvægi þess að skipverjar
klæðist strax flotgöllum þegar sýnt
er að skipverjar gætu þurft að yf-
irgefa skipið. Þá þurfi flotbúningar
að vera á eða sem næst stjórnpalli.
Þá bendir nefndin á mikilvægi þess
að fylgt sé strangt eftir lögboðnum
skoðunum á síðu- og botnlokum.
Í áliti sjóslysanefndar kemur fram
að rekstur skipsins síðustu misseri
hafði verið stopull. Í október 1997
var því siglt til Afríku og kom þaðan
aftur í apríl 1999. Skipið var síðan
gert út í samtals 5½ mánuð frá því
það kom aftur til landsins og þar til
það sökk í október 2000.
Sjóslysanefnd hefur skilað áliti vegna Ingimundar gamla HU 65
Óvirk dæla varð til þess
að sjór lak inn í lestina
UPPSELT hefur verið á nær allar
sýningar í svokölluðum lúxussölum
Sam-bíóanna við Álfabakka og
Smárabíós í verslanamiðstöðinni
Smáralind í Kópavogi. Forráðamenn
Smárabíós hafa einnig ákveðið að
hækka aldursmörk á kvöldsýningum
kl. 20 og 22 upp í 18 ár. Í lúxussal
Sam-bíóanna er aldurstakmarkið 16
ár á allar sýningar og yngri verða að
vera í fylgd fullorðinna. Með þessum
reglum eru kvikmyndahúsin að
höfða frekar til eldri bíógesta. Að-
gangseyrir í lúxussalina verður
áfram sá sami eða um tvöfalt á við
venjulegan miða.
Smárabíó hefur vínveitingaleyfi
fyrir sinn lúxussal og er barinn opn-
aður eftir að sýningin kl. 18 er hafin.
Hægt er að panta sæti í báða salina
eða kaupa miða í forsölu nokkra
daga fram í tímann.
Með tilkomu lúxussalanna og allra
þeirra framkvæmda sem eigendur
kvikmyndahúsanna á höfuðborgar-
svæðinu hafa staðið í að undanförnu
mun samkeppnin á þessum markaði
harðna. Talið er að tvær „bíóblokk-
ir“, sem annars vegar tilheyra Sam-
bíóunum og Háskólabíói og hins veg-
ar Laugarásbíói og húsum í eigu
Norðurljósa, muni einbeita sér frek-
ar en áður að sýningum kvikmynda í
eigin húsum í stað samstarfs.

Bíóblokkirnar/22
Lúxusbíósalirnir
Alltaf upp-
selt og ald-
ursmörk
hækkuð
NAUTKÁLFUR var nýlega skot-
inn, líklega í misgripum fyrir gæs,
inni á túni hjá bænum Skálanesi í
Austur-Barðastrandarsýslu. Að
sögn lögreglunnar á Patreksfirði
varð bóndinn á bænum var við það
á fimmtudag að einn kálfinn vant-
aði úr nautgripahópnum og eftir
nokkra leit fann hann kálfinn
dauðan á túninu.
Hafði kálfurinn verið skotinn
með haglabyssu að aftanverðu og
segir Jónas Þór, varðstjóri á Pat-
reksfirði, að sýnilega hafi það tek-
ið hann nokkurn tíma að drepast.
„Þetta var virkilega ógeðslegt að
sjá. Það voru greinileg skotmörk á
pungnum á honum og belgnum og
svo á lærinu,“ segir Jónas.
Hann vildi ekki segja til um
hvort um óviljaverk hefði verið að
ræða. „Það er náttúrulega vítavert
að skjóta inni á túnum hjá fólki þar
sem eru skepnur og við botnum
engan veginn í svona háttalagi.
Þetta er ekki veiðimennska heldur
villimennska og ekki til framdrátt-
ar skotveiðimönnum sem vilja þó
ganga vel um náttúruna og bera
virðingu fyrir bráðinni.“
Hann segir ekki mikið um
gæsaskytterí á svæðinu. „Það
voru einhverjir á ferðinni fyrir
svona viku sem voru að þvælast
inni á túnum hjá fólki og fóru á
fleiri staði en við höfum ekki frétt
af því að þeir hafi orðið skepnum
að bana fyrr.“ Jónas segir lögregl-
una ekki vita hverjir voru þarna að
verki en að hún yrði þakklát ef fólk
gæti veitt upplýsingar sem gætu
komið að gagni.
Nautkálfur
skotinn á túni
RÚMLEGA 200 manns mættu á
fund í sjávarútvegsnefnd Sjálfstæð-
isflokksins í Valhöll í gærmorgun
þar sem tekist var á um stefnu
flokksins í sjávarútvegsmálum í
tengslum við 33. landsfund flokksins
sem fram fer í Laugardalshöll og
lýkur síðar í dag. Ljóst er að sjáv-
arútvegsmálin eru mesta hitamálið á
þessum landsfundi flokksins, sem
mátti sjá á mætingu á fund sjávarút-
vegsnefndar í gærmorgun. Húsfyllir
var einnig á fundi nefndarinnar á
föstudagskvöld.
Fundurinn samþykkti með 63 at-
kvæðum á móti 53 tillögu Gunnlaugs
Sævars Gunnlaugssonar, formanns
nefndarinnar, um að áfram skuli
byggt á aflamarkskerfinu en útgerð-
in greiði hóflegt gjald fyrir afnot af
veiðiheimildum. Þannig er tekið und-
ir álit meirihluta nefndar sem fjallaði
um endurskoðun laga um stjórn fisk-
veiða og skilaði tillögum sínum í lok
september. Þá segir í tillögunni:
„Samhliða þessu er nauðsynlegt að
auka frjálsræði í rekstrarumhverfi
fyrirtækjanna og að hluta gjaldsins
verði varið til að byggja upp atvinnu-
líf í þeim byggðarlögum sem treyst
hafa á sjávarútveg.“
Tillaga Markúsar Möller, Tryggva
Agnarssonar, Jónasar Elíassonar og
Sigurðar Björnssonar, um að tillög-
um meirihluta nefndarinnar verði
hafnað og að unnið verði að breyt-
ingu á lögum um úthlutun veiðiheim-
ilda á grundvelli hugmynda auð-
lindanefndar um fyrningaleið og
þjóðareign á fiskistofnum, var felld
með meirihluta atkvæða gegn 16.
Tillaga sem Árni Mathiesen sjáv-
arútvegsráðherra lagði fram undir
lok fundarins var samþykkt sam-
hljóða. Í henni er skorað á sjávarút-
vegsráðherra að leita allra leiða til að
bæta hlut hinna minni sjávarbyggða
sem hafa treyst á aflakrókabáta.
Breytingartillaga Guðmundar Hall-
dórssonar í Bolungarvík, þar sem
lagt var til að byggt yrði á samkomu-
lagi sem gert var og fest í lög á Al-
þingi á árunum 1995 og 1996, var
felld með miklum meirihluta.
Átakafundur í sjávarútvegsnefnd Sjálfstæðisflokksins
Tillaga um hóflegt
veiðigjald samþykkt
Morgunblaðið/Golli
Bekkurinn var þétt setinn á fundi sjávarútvegsnefndar Sjálfstæðisflokksins í Valhöll í gær. Rúmlega 200 manns tóku þátt í störfum nefndarinnar.