Frjáls verslun - 01.08.2007, Side 64

64 F R J Á L S V E R S L U N • 8 . T B L . 2 0 0 7
Þarna koma til hugtökin áhættufælni og áhættusækni.
Glitnir á einn áhættufælnasta banka norðan Alpafjalla og þótt
víðar væri leitað. Það er áðurnefndur BN-bank. Það er banki
sem aðeins lánar til kaupa á húsnæði í miðborgum. Mikið af
lánunum er með veðum í húsum í miðborg Óslóar. Þau hús
verða sennilega einskis virði á sama tíma og allur efnahagur
heimsins hrynur til grunna og ekki fyrr. Áhættan er engin og
útlánatöpin eitt stórt núll. BN-bank tapar aldrei peningum
á vafasömum lánum. Ef til vill verður sá þungi pakki, sem
BN-bank er nú, notaður í framrás hins nýja Glitnir Bank í
Noregi?
Fagleg framsetning
Lárus virkar mjög öruggur þegar hann segir frá. Hann heldur
sig við tölur og hugtök úr efnahagsreikningum en segir minna
frá eigin brjósti. Hann er ábyrgur og um leið fagmannlegur.
Hann þarf að sannfæra salinn um að Glitnir sé góður kostur og
að bankans bíði ekkert annað en vöxtur og velgengni.
Það er líka mikill munur á þessari kynningu og þeirri sem
Íslandsbanki hélt á þessu sama hóteli en í örlítið minni sal fyrir
tveimur árum. Þá voru kaupin á BN-bank kynnt. Íslandsbanki
var algerlega óþekkt fyrirbæri í Noregi og Bjarni Ármannsson
og Einar Sveinsson sátu fyrir svörum og gerðu sitt besta til að
segja viðstöddum hverjir þeir væru og hvað þeir væru að gera.
Núna er Glitnir þekkt fyrirbæri meðal fjárfesta. En framkoma
þeirra Bjarna og Einars gaf fyrirtækinu sérstakan alþýðlegan
blæ.
Sami maður skipulagði samkomurnar bæði þá og nú. Það
er Björn Richard Johnsen, kynningarstjóri Glitnis. Þegar hann
kom á Hótel Continental fyrir tveimur árum var hann í láni frá
almannatengslastofu til að sinna þessu eina verkefni, að segja
frá kaupunum á BN-banka og hvað Íslandsbanki væri. Við
spyrjum Björn hvort hann sjái sjálfur þennan mun.
Ímyndasmiður
„Nei,“ segir Björn. ,,Ég geri alveg það sama núna og ég gerði
þá. Ég spurði Bjarna hvernig hann vildi að ég leysti þetta verk-
efni og hann sagði: „Gerðu bara eins og þú heldur að sé best.“
Og ég gerði það. Þegar Lárus tók við spurði ég hann að þessu
saman og hvort ég ætti að halda áfram að gera eins og ég hefði
gert. „Endilega,“ svaraði hann og þar með var það útrætt. En
það sést að áhuginn á þessum banka er miklu meiri nú en var
fyrir bara einu ári. Það komu 40 á fyrsta markaðsdaginn í fyrra,
140 í ár.“
Björn er ímyndasmiður og hefur áður unnið fyrir fræga
norska fjárfesta. Þar á meðal eru Kjell Inge Rökke og Stein
Erik Hagen en báðir eru þeir meðal ríkustu manna í Noregi.
En við spyrjum danska ritstjórann Sten Thorup Kristensen
um þetta með ímynd íslenskra fjármálafyrirtækja – sérstak-
lega þar sem íslensk fjármál hafa ekki notið vinsælda í Dan-
mörku.
„Þetta er ekkert til að hafa áhyggjur af,“ segir ritstjórinn.
„Þetta er bara hluti af hugsunarhætti okkar Dana. Okkur er illa
við stór stökk og miklar breytingar.“
G L I T N I R Í N O R E G I
Gunnar Jerven hefur verið bankastjóri BN-bank, verðmætustu eignar Glitnis í
Noregi. Hann verður nú deildarstjóri hjá Glitnir Bank og BN-bank hættir að vera til.
Morten Björnsen verður bankastjóri Glitnir Bank í
Noregi og yfirmaður allrar starfsemi þar.