Morgunblaðið - 21.06.2002, Side 10
FRÉTTIR
10 FÖSTUDAGUR 21. JÚNÍ 2002 MORGUNBLAÐIÐ
EKKI er langt um liðið síðan barna-
barn vesturíslenska þjóðskáldsins
Stephans G. Stephanssonar opnaði
sýningu helgaða skáldinu í Vest-
urfarasetrinu á Hofsósi og í gær
var aftur efnt til hátíðar á staðnum
og opnuð önnur sýning sem ber yf-
irskriftina „Akranna skínandi
skart“ þar sem segir frá landnámi
Íslendinga í Norður-Dakóta.
Hátíðin hófst með hópreið hesta-
manna inn á svæðið fyrir framan
nýreist hús í Plássinu sem er end-
urgerð Konungsverslunarhússins
forna sem stóð á þessum stað. Síðan
kom hópur gesta, þar á meðal
Normandale-kirkjukórinn frá
Minneapolis sem söng nokkur lög.
Dagskránni var fram haldið kl.
15 þegar Valgeir Þorvaldsson,
framkvæmdastjóri Vesturfaraset-
ursins, ávarpaði gesti og bauð þá
velkomna. Í ávarpi sínu rakti Val-
geir aðdraganda þess að tengsl
komust á við afkomendur útflytj-
enda til Norður-Dakota og þakkaði
það sérstaklega Magnúsi Ólafssyni
bónda sem Íslendingum er að góðu
kunnur fyrir móttökur flestra ís-
lenskra hópa sem koma til Dakóta,
og ekki síður Lornu og Richard
Holland, en hér heima nefndi hann
sérstaklega Sigríði Sigurðardóttur,
safnvörð í Glaumbæ.
Valgeir sagði að fjölmargir
hefðu lagt hönd á plóginn við að
koma upp hinu nýja sýningarhúsi
sem með Norður-Dakótasýning-
unni er nú tekið í notkun og nefndi
þar þrjá helstu styrktaraðilana, en
það eru Íslenskir aðalverktakar,
Keflavíkurverktakar og Olíufélag-
ið.
Wincie Jóhannsdóttir, menning-
ar- og fræðslustjóri Vesturfaraset-
ursins, ræddi tengsl Íslendinga og
Bandaríkjamanna af íslenskum
ættum, þakkaði samstarf við hinn
almenna borgara vestanhafs og
sagði öll slík kynni hafa verið sér-
staklega ánægjuleg. Hún sagði
mikilvægt að Vesturfarasetrið
hefði einnig og ekki síður átt mjög
góð samskipti við Byggðasafn
Skagfirðinga í Glaumbæ.
Þá fluttu ávörp Magnús Ólafsson
og Loretta Bernhöft og færðu for-
seta Íslands minjagrip að gjöf frá
íbúum Norður-Dakóta.
Að lokum ávarpaði forseti Ís-
lands, herra Ólafur Ragnar Gríms-
son, gesti og ræddi hann um menn-
ingu þeirra Íslendinga sem fluttust
til Vesturheims en þar fór fram
mjög öflugt menningar- og útgáfu-
starf sem margt rataði hingað heim
aftur og skapaði dýpri og gleggri
skilning á þeim miklu fórnum sem
færðar voru af frumbyggjunum til
þess að skapa sér og sínum lífs-
björg.
Sagan rakin í myndum og texta
Þá klippti Ólafur Ragnar á borða
og opnaði Dakóta-sýninguna sem
er hin glæsilegasta en Áslaug Jóns-
dóttir hefur hannað hana og annast
uppsetningu hennar. Á sýningunni
er fjallað um og rakin í textum,
myndum og lifandi umgjörð saga
landnáms Íslendinga í Norður-
Dakóta og er þarna margt sem fyr-
ir augu Íslendinga nútímans ber
furðu framandi. Má ætla að ekki
hafi það verið kunnuglegra þeim
löndum okkar sem komu þarna
fyrst fyrir nærri hálfri annarri öld.
Sýningin er þannig upp sett að
bæði börn og fullorðnir ættu að
njóta þess sem þar er sýnt.
Í stuttu spjalli við Ólaf Ragnar
Grímsson á sýningunni sagði hann:
„Það er afar merkilegt og einstakt
framlag að endurskapa sögu Ís-
lendinga í Norður-Dakota hér í
þessu glæsilega sýningarhúsi á
Hofsósi. Við höfum á margan hátt
vanrækt að gera sögu Norður-
Dakota verðug skil því að við höf-
um meira horft til Winnipeg og
Gimli en saga Íslendinganna í
Norður-Dakóta er á margan hátt
sýnilegri og áþreifanlegri og þar
búa margir afkomendur landnem-
anna ennþá á sömu landsvæðunum
og forfeðrum þeirra var úthlutað í
upphafi við komuna til nýja lands-
ins. Hinar fimm íslensku kirkjur í
Dakóta bera með sér merka sögu
fólks sem lagði allt undir til þess að
skapa sér framtíð í nýju landi.“
Eftir að gestir höfðu skoðað sýn-
inguna var formlega vígð ný
bryggja sem byggð hefur verið
framan við gamla Vesturfarasetrið
á Sandinum og var það samgöngu-
ráðherra, Sturla Böðvarsson, sem
það gerði.
Valgeir Þorvaldsson sagði að
samgönguráðuneytið hefði á sínum
tíma lagt allverulegt fjármagn til
gerðar þessarar bryggju. Hún er
endurgerð hafnarmannvirkis sem á
sínum tíma var á þessum stað og
þakkaði Valgeir ráðherra fyrir
góðan hug til þeirra verka sem hér
væri verið að vinna. Sturla
Böðvarsson sagði gaman að geta
þess að hér væri um fyrsta hafn-
armannvirkið að ræða sem honum
sem samgönguráðherra hlotnaðist
sá heiður að opna og væri vel við
hæfi að gera það hér á þessum fal-
lega degi.
Valgeir Þorvaldsson sagi að
þetta væri ánægjulegur áfangi sem
nú næðist, Dakótasýningin yrði ein
af mörgum sýningum setursins og
hann ætti von á að gestir kynnu vel
að meta hana, ekki hvað síst fyrir
það að hér væri sérstaklega höfðað
til yngstu gestanna.
Dakóta-sýning
opnuð í Vestur-
farasetrinu
Morgunblaðið/Björn Björnsson
Séð yfir hluta Norður-Dakóta-sýningarinnar.
Hofsósi. Morgunblaðið.
SKÓLAFÉLAG Menntaskólans í
Reykjavík veitti í fyrsta skipti í
vor verðlaun til kennara, sem að
mati nýstúdenta hafa skarað fram
úr í kennslu og alúð við nám og
þroska nemenda. Það voru þær
Kolbrún Elfa Sigurðardóttir, lat-
ínu- og þýskukennari, og Sigríður
Hlíðar stærðfræðikennari sem
hlutu viðurkenninguna.
Verðlaunin, sem voru veitt á
lokahátíð skólans, eru kennd við
Ragnheiði Briem sem var ís-
lenskukennari við skólann um ára-
bil en í frétt frá Skólafélaginu seg-
ir að Ragnheiður heitin hafi þótt
afburða kennari sem sýndi nem-
endum sínum einstaka alúð og var
örlát bæði á tíma sinn og þekk-
ingu. „Með þessu framtaki vilja
nemendur votta störfum [kennara
sinna] virðingu, hvetja þá enn til
dáða og jafnframt þakka þeim fyr-
ir þá góðu menntun sem nemendur
hljóta í skólanum,“ segir í tilkynn-
ingunni.
14 fulltrúar nýstúdenta
í valnefnd
Valnefnd skipuð 14 fulltrúum
nýstúdenta vorið 2002 valdi þá tvo
kennara sem verðlaunin hlutu en
formaður nefndarinnar var
inspector scholae veturinn 2000–
2001, Gunnar Thorarensen. Í um-
sögn valnefndar um verðlaunahafa
segir meðal annars: „Kolbrún Elfa
Sigurðardóttir fornfræðingur er
einn af þeim kennurum sem
Menntaskólinn í Reykjavík má
vera hvað stoltastur af. Framúr-
skarandi menntun, einlægur áhugi
á námsefninu og mikil umhyggja
fyrir nemendum gerir hana að af-
burðalærimeistara. Öll hennar
vinnubrögð eru til fyrirmyndar og
einkennir nákvæmni og samvisku-
semi allt hennar starf.[...]
Sigríði Hlíðar teljum við vera
einn af þeim kennurum sem fylltir
eru eldmóði í kennslunni. Áhugi
hennar á faginu leynir sér ekki og
hún nýtir sér víðfeðma þekkingu
sína til að miðla efninu til nem-
enda á sem bestan hátt. Allt starf
hennar er hárnákvæmt og mun
seint finnast eins skipulögð og vel
undirbúin manneskja í kennara-
stéttinni. Sigríður er einstaklega
hjartahlý manneskja og virðist
sem henni takist að beisla þann
eiginleika sinn til að ná sérstökum
tengslum við nemendur sína, auk
þess sem hún leggur námsefnið
fram á skeleggan og nákvæman
hátt þannig að hinar flóknustu
formúlur virðast sem einfaldar
kökuuppskriftir.“
Gunnar Thorarensen, formaður valnefndar, Kolbrún Elfa Sigurðar-
dóttir latínukennari, Sigríður Hlíðar stærðfræðikennari og Bolli Thor-
oddsen, inspector scholae, 2001–2002 við afhendingu verðlaunanna.
Kennsluverðlaun
Skólafélags MR
veitt í fyrsta sinn
NIÐURSTAÐA skoðanakönnunar,
sem fór fram áður en fulltrúar deild-
arfundar heimspekideildar Háskóla
Íslands gengu til atkvæðagreiðslu
um hverjum mæla skyldi með í starf
lektors við fornleifafræði við skólann,
varð sú að 22 fundarmanna völdu
Orra Vésteinsson til starfans, 2 völdu
Margréti Hermanns-Auðardóttur en
20 skiluðu auðu. Hefði þetta orðið
niðurstaða atkvæðagreiðslunnar,
sem fylgdi í kjölfarið, hefði valið á
Orra fallið á jöfnu.
Að sögn Vilhjálms Árnasonar,
deildarforseta, er það hefð innan
heimspekideildar að slíkar skoðana-
kannanir fari fram áður en gengið er
til eiginlegrar atkvæðagreiðslu milli
tveggja eða fleiri umsækjenda. „Það
er ekkert fréttnæmt í sjálfu sér við
þessa endurtekningu því þetta er
hefðin. Við lítum ekki á útkomu skoð-
anakönnunarinnar sem niðurstöðu af
því að menn fara inn í hana vitandi að
hún er ekki bindandi.“
Niðurstaða atkvæðagreiðslunnar
sjálfrar varð hins vegar sú að 23
greiddu Orra Vésteinssyni atkvæði
sitt, Margrét Hermanns-Auðardóttir
hlaut fjögur atkvæði en 17 skiluðu
auðu. Vilhjálmur segir að vissulega
hafi óvenju margir skilað auðum at-
kvæðaseðli að þessu sinni. „Það lá
fyrir fundinum bókun frá sagnfræði-
skor um að dómnefndarálitinu yrði
hafnað og staðan auglýst að nýju. Ég
mæltist hins vegar til þess í upphafi
þessa dagskrárliðar að þessi tillaga
sagnfræðiskorar yrði túlkuð sem
áskorun til deildarmanna um að sitja
hjá við atkvæðagreiðslu því ef meiri-
hluti atkvæðisbærra deildarmanna
situr hjá þá eru það skilaboð til rekt-
ors um að deildin treysti sér ekki til
að mæla með neinum umsækjanda.
Þá hefði það í reynd verið einskonar
höfnun.“
Hann segir það því ekki hafa komið
á óvart hversu margir skiluðu auðu.
„Ég myndi segja að fundurinn hafi
tekist mjög vel, umræðan hafi verið
mjög málefnaleg og ég veit ekki bet-
ur en að nær allir hafi verið sáttir við
niðurstöðuna. Það eru auðvitað
ákveðin skilaboð í því að sitja hjá en
ég held að þetta sé mjög farsæl nið-
urstaða fyrir deildina.“
Rætt um að breyta fyrirkomu-
lagi ráðninga við HÍ
Vilhjálmur staðfesti að á fundinum
hafi verið rætt um hvort rétt væri að
breyta fyrirkomulagi á því hvernig
ráðið er í störf hjá háskólanum en í
umsóknarferlinu nú hefur verið
gagnrýnt hversu harðorð dómnefnd
var í áliti sínu í garð sumra umsækj-
enda. „Það kom upp sú umræða og
það var ekki bara af þessu tilefni.
Þetta hefur komið upp áður því dóm-
nefndarálit eru mjög umdeild. Ég
held að þetta álit hafi í sjálfu sér feng-
ið óþarflega mikla gagnrýni og þar
finnst mér reyndar við Morgunblaðið
að sakast, því það greip inn í málið á
því stigi sem það var trúnaðarmál og
það á dagblað ekki að gera. Og auð-
vitað hafði þetta áhrif og setti ákveð-
inn svip á alla málsmeðferðina.“
Eftir fund heimspekideildar verð-
ur næsta skref í ráðningarferlinu það
að háskólarektor skipar í umrætt
starf. Aðspurður segist Páll Skúla-
son, háskólarektor, þó ekki formlega
bundinn af atkvæðagreiðslu deildar-
fundarins. „Við munum fara yfir mál-
ið í heild og skoða vandlega athuga-
semdir sem hafa borist frá öðrum
umsækjendum og athuga hvernig um
málið var fjallað í deildinni áður en
endanleg ákvörðun er tekin.“ Þetta
geti tekið nokkra daga.
Hann segir venja að gera þetta
með þessum hætti. „Sérstaklega þeg-
ar gerðar eru einhverjar athuga-
semdir eins og hefur verið gert í
þessu tilfelli. Þá þarf að sýna sér-
staka aðgát og tryggja að það sé
formlega og lagalega rétt staðið að
öllu í þessu sambandi.“
Óvenju margir skiluðu auðu við atkvæðagreiðslu
varðandi starf lektors í fornleifafræði
Niðurstaða skoðana-
könnunar önnur en
í atkvæðagreiðslu
BORGARSTJÓRN hefur sam-
þykkt að hleypa af stað verkefni
undir nafninu „Greiðar götur“.
Fluttu borgarfulltrúar R-listans
tillögu þess efnis á borgarstjórn-
arfundi í gær.
Í tillögunni segir að verkefninu
sé ætlað að greiða leið almennra
borgara að ákvörðunum og
stefnumótun í stjórn borgarinnar,
sem og þjónustu hennar. Sam-
kvæmt henni verður lögð sérstök
áhersla á hverfalýðræði, rétt til
upplýsinga, þátttöku og sann-
gjarnrar málsmeðferðar.
Í tillögunni segir ennfremur að
stjórnkerfisnefnd, sem skipuð
verði þremur fulltrúum af hálfu
borgarráðs, verði falið að annast
undirbúning og framkvæmd verk-
efnisins. Hlutverk hennar verði
m.a. að fara yfir stjórnkerfi borg-
arinnar og leita leiða til að ein-
falda það og stuðla að því að það
verði aðgengilegra almenningi.
Tillögur nefndarinnar eiga að
taka mið af stefnu borgarinnar um
aukna aðkomu íbúanna að ákvörð-
unum yfirvalda og hverfistengda
þjónustu.
Greiðari leið Reykvíkinga
að stjórn borgarinnar