Morgunblaðið - 22.01.2006, Blaðsíða 69

MORGUNBLAÐIÐ SUNNUDAGUR 22. JANÚAR 2006 69
L
íf ungrar kvikmyndastjörnu er allt
öðruvísi en munaðarleysingja á
19. öld en þrátt fyrir það tekst
unga og upprennandi leikaranum
Barney Clark að túlka Oliver
Twist á sannfærandi hátt. Barney dregur ekki
stysta spottann líkt og Oliver og hlutskipti
hans er sem betur fer annað í lífinu. Þegar
Morgunblaðið ræddi við hann var þessi tólf ára
strákur staddur í miðborg London í Oxford
Street á leið í áheyrnarpróf.
Stærsta hlutverkið hans til þessa er auðvit-
að titilhlutverkið í stórmynd Óskarsverðlauna-
leikstjórans Romans Polanski, sem frumsýnd
er hérlendis um helgina. Myndin er að sjálf-
sögðu gerð eftir sígildri skáldsögu Charles
Dickens.
Polanski vildi gera mynd fyrir unga krakka
og valdi að lokum að færa þessa merku bók á
hvíta tjaldið þó það sé langt frá því í fyrsta sinn
sem það er gert. Fræg er útgáfa leikstjórans
Davids Lean frá 1948 og líka söngleikja-
útgáfan Oliver! eftir Carol Reed, sem gerð var
tuttugu árum síðar. Honum fannst tímasetn-
ingin góð og vildi kynna nýrri kynslóð verkið.
Fyrsta spurningin sem vaknar er hvort
Barney hafi lesið bókina en í ljós kemur að
hann hefur ekki lesið hana, hvorki fyrir né eft-
ir tökurnar. Kannski Polanski hafi rétt fyrir
sér og kvikmyndatakan sé besta leiðin til að
koma þessari mögnuðu sögu til yngri aldurs-
hópa.
„Ég hef aldrei lesið bókina en ég þekkti
hana og söguna og vissi að hún væri eftir
Charles Dickens,“ segir Barney en hann hafði
til dæmis séð söngleikjaútgáfuna frá 1968.
Eitt af því sem slær allar kynslóðir barna
sem hafa lesið bókina í gegnum tíðina er harð-
ræðið, fátæktin og aðstæður barnanna.
Barney er ánægður með að hafa bara þurft
að leika Oliver en ekki vera hann. „Það er
miklu betra að vera uppi núna. Þá var ekkert
sjónvarp eða Play Station. Fátæktin var mikil
og ástandið slæmt. London var hræðileg þá.
Hún er miklu betri núna,“ segir Barney sem
ánægður með að búa í stórborginni.
„Oliver á enga foreldra, hann er mun-
aðarleysingi og hefur átt erfitt líf. Ég hef átt
mjög gott líf. Það eina sem er eins hjá okkur er
að við lítum eins út.“
Hitti Polanski í Prag
Barney var valinn úr hópi 800 stráka eftir
nokkrar prufur.
„Þetta var ótrúlegt. Ég hélt ekki að ég ætti
neina möguleika. Í fyrstu áheyrnarprufunni
var ég beðinn í restina um að vera aðeins leng-
ur, sem var góðs viti. Eftir það fór ég heim til
þess sem sá um að velja í hlutverkin. Svo fór
ég til Prag í prufu fyrir myndavélarnar og hitti
Roman í fyrsta skipti,“ segir hann en þessi fer-
ill var langur og tók einhverja mánuði.
Hvernig var að hitta Polanski, gaf hann þér
miklar leiðbeiningar?
„Nei, eiginlega ekki. Hann talaði ekki mikið.
Hann sagði samt við mig að ef ég fengi hlut-
verkið yrði ég að borða minna nammi,“ segir
hann en munaðarleysingjarnir voru langt frá
því ofaldir á tímum Twist.
Stórleikarinn Sir Ben Kingsley er í hlut-
verki betlarakóngsins Fagins. Hvernig var að
vinna með honum?
„Hann var virkilega indæll en hann var allt-
af í karakter. Hann var aldrei Ben Kingsley.
Jafnvel þegar ég hitti hann fyrir utan tökur.
Eina skiptið sem ég sá hann úr karakter var í
veislu, hann er mjög fínn.“
Sjálfur segist hann ekki vilja nota þessa
leikaðferð, að vera alltaf í karakter en hann er
ákveðinn í því að verða leikari að atvinnu þeg-
ar hann verður eldri. „Ég vil pottþétt halda
áfram að leika þegar ég verð fullorðinn,“ segir
Barney, sem nýtur fulls stuðnings foreldra
sinna í leiklistinni. Foreldrar hans ferðast með
honum og fara með hann í áheyrnarprufur.
Sem stendur þarf hann líka að sinna skól-
anum og gengur það ágætlega. „Já, ég var að
koma úr skólanum núna. Ég missi ekki mikið
úr. Ég þarf stundum að taka smá frí en ekki
mikið. Ég er til dæmis á leiðinni til Tókýó í
kynningu vegna myndarinnar,“ segir Barney
sem er staddur þar þegar þetta birtist. Hann
hefur ferðast nokkuð vegna myndarinnar og
nefnir að hann hafi m.a. farið til New York,
Varsjár og Parísar.
Myndin var tekin upp í Prag í Tékklandi þar
sem byggt var mikið og stórt sett. „Það var
ótrúlegt. Þau byggðu London uppá nýtt.“
Vill leika í hasarmynd
Jamie Forman er í hlutverki illmennisins
Bill Sykes. „Hann er rosalegur í myndinni en
hann er mjög góður í alvörunni,“ segir hann en
sena þar sem hann klifrar uppá þak með Jamie
er í uppáhaldi hjá honum. Barney fékk að gera
áhættuatriðin sín sjálfur, sem hann er mjög
ánægður með því hann hefur mestan hug á því
að fá að leika í hasarmynd.
Varðandi kvikmyndasmekk Barneys þá á
hann margar uppáhaldsmyndir. „Back to the
Future-myndirnar eru frábærar. Mig langar
mjög að sjá King Kong, er ekki búinn að sjá
hana ennþá. Narnía var góð,“ segir hann.
Hvernig byrjaðir þú í leiklist?
„Ég lék í skólaleikritunum þegar ég var lít-
ill. Ég vildi alltaf vera með því maður fékk að
sleppa við einhverja tíma í skólanum. Síðan fór
mér að þykja þetta mjög gaman. Mamma
skráði mig síðan í námskeið í leiklist eftir skóla
einu sinni í viku. Síðan fór ég tvisvar í viku og
svo var ég kominn með umboðsmann,“ út-
skýrir Barney eins og þetta sé ekkert mál, en
skólinn sem um ræðir er við Anna Schear-
leikhúsið í London. Aðsóknin er mikil og þurfti
móðir hans að skrá hann á biðlista til að kom-
ast þar að þegar hann var aðeins tveggja ára.
Núna tekur hann þátt í vinnuhópum í leiklist
einu sinni í viku. „Þetta eru ekki beint leiklist-
artímar. Við förum í drama-leiki, leikum okkur
með spuna og ýmislegt.“
Í sögunni strýkur Oliver til London og lend-
ir í slagtogi við hóp vasaþjófa sem Fagin stýr-
ir. Barney vann því í myndinni með mörgum
strákum á sínum aldri. Hann hafði gaman af
því að vinna með þeim og er enn í sambandi við
einhverja þeirra. „Já, sérstaklega Chris Over-
ton sem leikur Nóa Claypole og Harry Eden
sem leikur Hrapp (Artful Dodger).“
Hann hefur kynnst fleiri ungleikurum Bret-
lands og væntanlega verða einhverjir þeirra
stjörnur framtíðarinnar. „Á laugardaginn var
ég í myndatöku með krökkunum úr Narníu, og
Freddie Highmore úr Charlie and the
Chocolate Factory,“ segir hann en svona er líf
ungrar kvikmyndastjörnu í dag.
Kvikmyndir | Barney Clark leikur Oliver Twist í samnefndri kvikmynd
Varð að minnka
nammiátið
Oliver og Fagin: Barney segir að Sir Ben
Kingsley hafi alltaf verið í hlutverki.
Barney Clark er sannfærandi í hlutverki munaðarleysingjans Olivers Twist.
Hann langar helst að leika í hasarmynd og halda áfram í
leiklistinni þegar hann verður stór. Barney Clark var val-
inn úr hópi 800 stráka í hlutverk Olivers Twist. Inga Rún
Sigurðardóttir ræddi við þennan tólf ára strák.
’Það er miklu betra að vera uppi núna. Þá var ekkert sjónvarpeða Play Station. Fátæktin var mikil og ástandið slæmt.‘
ingarun@mbl.is
HVAÐ: The Shneedles HVAR: Austurbæjarbíói HVENÆR: Fös. 27. og lau. 28. janúar kl. 20:00 SÖLUSTAÐIR: Reykjavík: Í verslunum Skífunnar, Laugavegi, Kringlunni og
Smáralind. Akureyri: Verslun BT. Selfossi: Verslun BT MIÐAVERÐ: Aðeins 2.800 + miðagjald fyrir fullorðna og aðeins 1.900 + miðagjald fyrir yngri en 16 ára. Ódýrara
miðaverð aðeins fáanlegt á sölustöðum, ekki á interneti. SÍMAAFSLÁTTUR: Til að fá 20% afsláttinn þarftu að fara í eina af verslunum Skífunnar eða BT á Akureyri eða á
Selfossi og sýna skjá GSM símans þíns. Út á hvern síma er að hámarki hægt að kaupa tvo miða með afslætti.
ATH:Aðgöngumiðar fást ekki endurgreiddir. Ölvun ógildirmiðann. Hljóð- ogmyndupptökur óleyfilegarmeð öllu.
„Snilld...langbesta grínsýning sem
ég hef séð í mörg ár.“
- The Sydney Morning Herald, Ástralía
„Ólýsanlega
fyndið!
Ef ég ætti að
geta lýst þessari
sýningu þá þyrfti
ég á orðum að
halda sem hoppa
og skoppa og
stökkva af síðunni
syngjandi beint í
fangið á þér.“
- Sueddeutsche Zeitung, Þýskaland
„Bowart og Robinson
eru óendanlega fyndnir.
The Shneedles bjóða
áhorfendum upp á einstaka
skemmtun, sem er ekki
bara fyndin, heldur líka
innihaldsrík. Þeir lokka þig
inn í sína furðuveröld strax
á fyrstu mínútu og þú getur
ekki annað en skellihlegið
allan tímann.“
- Suedwestpresse, Þýskaland