Menntamál - 01.11.1947, Qupperneq 8

134
MENNTAMÁL
voru fengnir, s. s. prestum, læknum og bændum. Oft var
fjölmennt á fundum þessum. Stundum fóru fram umræður
að loknum erindum og venjulega var allmikið sungið. Hafði
Snorri þegar í byrjun skólaársins eflt söngflokk og glætt
söngmennt hvarvetna á skólasvæðinu.
Þessi unglinga-farskóli starfaði um tveggja ára skeið,
sex mánuði á ári. Kennslugjaldið fyrir hvern nemanda
var 10 krónur, og ofurlítill styrkur fékkst til hans úr
ríkissjóði og sýslusjóði. Laun skólastjórans urðu því sára-
lítil. En því skeytti Snorri engu, meðan stætt var og fjár-
skortur gerði rekstur skólans ekki ókleifan. Nemendurn-
ir voru einkar áhugasamir og skólahaldið og fundirnir
vöktu nýjar hugsanir og glæddu líf og fjör um sveitirnar,
langt út fyrir nemandahópinn og kennslustaðina. Og þetta
var Snorra mikilvægast af öllu. Bæði hann og aðrir sáu, að
námið í skólanum varð nemöndum notadrjúgt og örvaði
þá flesta eða alla til nokkurs frama og nýrra átaka. Hafa
margir þeirra orðið hinir nýtustu menn og eigi allfáir
skarað fram úr á ýmsum sviðum.
Margir kunnu vel að meta skólastarf Snorra. I umsögn
frá 2. marz 1912, sem Páll Bergsson, þáverandi skólanefnd-
arformaður í Ólafsfirði, hefur ritað um kennslustarf
Snorra, segir svo:
„Snorri kennari Sigfússon hefur um tveggja mánaða
tíma kennt hér unglingaskóladeild og auk þess söng við
barnaskólann hér um sama tíma.
Kennslu þessa hefur hann stundað með mesta dugnaði
og áhuga og vandvirkni. Hann hefur og haldið fyrirlestra,
er allir hafa haft aðgang að. Þeir hafa verið mjög ljóst
og skipulega fluttir og bera vott um glögga yfirsýn þess,
er til bóta má vera og sterkan áhuga á framkvæmd þess.
Til söngs í barnaskólanum hafa safnazt til hans fjöldi
unglinga og barna, líka utan skólans, er lært hafa þenna
stutta tíma (20 kennslustundir) að syngja yfir 30 söng-
lög tvírödduð og einrödduð.