Frjáls verslun - 01.05.2009, Blaðsíða 41

tryggingafélög
 Auður Guðmundsdóttir, framkvæmdastjóri sölu- og markaðssviðs vÍs
AUÐUR BJÖRK GUÐMUNDSDÓTTIR,
framkvæmdastjóri sölu- og þjónustusviðs VÍS.
Hver hafa viðbrögð þíns fyrirtækis verið í kreppunni?
Í hvaða úrbótum er það að vinna?
Við höfum aukið áherslu okkar á tryggingaráðgjöf enda er nú
meiri eftirspurn eftir þeirri þjónustu en áður. Til að geta sinnt
betur aukinni eftirspurn eftir þjónustu VÍS höfum við verið að
styrkja framlínuna sem sér um upplýsingagjöf og bein samskipti
við viðskiptavini fyrirtækisins.
Hefur eitthvað jákvætt komið út úr niðursveiflunni fyrir þitt
fyrirtæki?
Þetta hefur vissulega verið krefjandi tími en öllu mótlæti fylgja
ákveðin tækifæri. Rekstur félagsins hefur gengið vel og við höfum
lagt áherslu á að fara yfir alla ferla og sjá hvar við getum hagrætt
og gert enn betur. Þegar á móti blæs þjappa menn sér saman og
við verðum vör við að samheldni hefur aukist sem meðal annars
lýsir sér í aukinni starfsánægju sem hefur aldrei mælst jafn-
mikil innan fyrirtækisins. Einnig má nefna að VÍS hlaut nýlega
viðurkenningu frá VR sem eitt af fyrirmyndarfyrirtækjum ársins
2009 og við erum að sjálfsögðu afar
stolt af því.
Ríkisvæðingin er mikil. Hvað
lengi eiga ríki og bankar að reka
einkafyrirtækin sem þau taka
yfir?
Ég tel æskilegt að koma þessum
fyrirtækjum í einkarekstur sem fyrst.
Hvað viltu sjá að verði gert til að rétta atvinnulífið við?
Ég vil sjá vexti lækkaða og aðgerðir sem styrkja gengi krón-
unnar.
Hvaða heilræði hafa reynst þér best í stjórnun?
Heiðarleiki, sanngirni og vinnusemi.
Framtíðin í sex orðum?
Öll él styttir upp um síðir.
Auður Björk er formaður Félags viðskiptafræðinga og hagfræðinga
og situr í stjórn Birtingahússins ehf. og Eiðfaxa ehf.