Tímarit Máls og menningar - 01.02.1983, Qupperneq 76

Tímarit Máls og menningar
Frágangur og val
Bókfræði ritsins er ákaflega ábótavant. Hvergi er getið um útgefanda, né frá
því skýrt hvers konar fyrirtæki „Icelandic Writing Today“ eiginlega er, sem
þó eignar sér útgáfurétt á öllum þeim verkum sem í ritinu eru.
Ekki má heldur sjá úr hvaða bókum höfunda verk þeirra eru, hvað þau
heita á frummálinu eða frá hvaða tíma þau eru. Reyndar virðist kynning á
höfundum miða meir að því að segja frá samböndum þeirra við útlönd — og
þá frama þar, ef einhver er, — en gefa nákvæmar upplýsingar um þau verk
sem þeir hafa samið. Það er undantekning ef nefnd er bók eftir einhvern
þessara rúmlega þrjátíu höfunda sem verið er að kynna.
Þessi skortur á bókfræði er þeim mun bagalegri sem nafn ritsins gefur til
kynna að í því sé að finna íslenskar bókmenntir dagsins í dag. Þeir sem til
þekkja sjá hins vegar fljótt að svo er ekki. Að fráskildum nokkrum
smásögum er efnið undarlega gamalt, og varla neitt frá síðustu tíu árum.
Hvað ljóðin varðar eru þau oft úr elstu — og ekki alltaf bestu — ljóðabókum
höfunda og gefa því hvorki rétta mynd af skáldskap þeirra né því sem er að
gerast í íslenskri ljóðagerð samtímans. Verða hér nefnd nokkur dæmi um
þetta.
Eftir Snorra Hjartarson eru alls 6 ljóð. Þar af eru 4 úr Á Gnitaheiði (1952)
og 2 úr Laufi og stjörnum (1966), en ekkert úr Hauströkkrið yfir mér (1979),
sem er þó sú bók sem hann fékk bókmenntaverðlaun Norðurlandaráðs
fyrir, en frá þeim er vandlega sagt í yfirlitsgreininni.
Eftir Hannes Sigfússon eru 4 ljóð alls. Þar af eru 3 úr Sprek á eldinn
(1961) og 1 úr Jarðteiknum (1966), en ekkert úr Örvamxli (1978).
Eftir Sigfús Daðason eru 6 ljóð. Eru 3 úr Ljóðum (1951) og 3 úr Höndum
og orðum (1959). Ekkert úr nýjustu bókinni Fá ein orð, sem kom út 1977.
Eftir Stefán Hörð Grímsson eru 3 ljóð og öll úr Svartálfadansi sem kom
út fyrir rúmum þrjátíu árum eða 1951. Ekkert úr Hliðin á sléttunni (1970)
eða Farvegum (1981), sem eru þó óumdeilanlega með merkustu ljóðabók-
um íslenskum sem út hafa komið á síðustu árum.
Eftir Hannes Pétursson eru 8 ljóð. Þar af eru 4 úr Kvxðabók (1955) og 4
úr / sumardölum (1959). Með þessu er Hannes afgreiddur, og í ritinu er ekki
að finna eitt einasta ljóð úr þeim fimm ljóðabókum, sem hafa komið út eftir
hann á síðustu tveimur áratugum, Stund og stöðum (1962), Innlöndum
(1968, Rímblöðum (1971), Óður um ísland (1974) og Heimkynni við sjó
(1980).
Eftir Þorstein frá Hamri eru alls 7 ljóð. Þar af eru 3 úr Tannfé handa
nýjum heimi (1960), 1 úr Lifandi manna landi (1962) og 3 úr Jórvík (1967).
Ekkert úr Veðrahjálmi (1972) eða Fiðrið úr sæng Daladrottningar (1977).
66