Tímarit hjúkrunarfræðinga - 01.08.2008, Blaðsíða 26

-1 til -2. Það þýðir að við 1% hækkun
á launum hjúkrunarfræðinga dragist
eftirspurn eftir þjónustu þeirra saman um
1 til 2%.
Framkvæmd neyðaráætlana
Verkfall krefst þess að stjórnendur
eyði mestöllum sfnum tíma í dagleg
úrlausnarefni og láti hefðbundin verkefni
lönd og leið. Heilbrigðisstofnanir þurfa
að fresta skipulagsvinnu og áætlanagerð
meðan á verkfalli stendur jafnframt
því sem vinnutími stjórnenda lengist
á meðan á verkfallinu stendur. Þessi
kostnaður gæti numið 16,5 milljónum
króna með launatengdum gjöldum á
mánaðargrundvelli.
Óbein áhrif til skamms tíma
Mat á greiðsluvilja hér að ofan felur
aðeins í sér greiðsluvilja þeirra sem
þarfnast umönnunar. Greiðsluvilji annarra
þjóðfélagsþegna vegna umönnunar
þessa fólks er ekki metinn. Því er ekki
tekið tillit til greiðsluvilja þriðja aðila þegar
skjólstæðingar heilbrigðiskerfisins eru
sendir heim áður en umönnun er lokið.
í sumum tilvikum taka forráðamenn eða
ættingjar eða aðrir aðstandendur upp
þráðinn. Þeir hverfa frá öðrum verkum,
launuðum eða ólaunuðum. Legudagar á
sjúkrastofnunum eru um 23.000 á mánuði
skv. vef Landlæknisembættisins. Falli 50%
niður og kalli hver brottfallinn legudagur á
3-4 stunda vinnu aðstandenda þá er
tap þjóðfélagsins vegna þessa 50-100
milljónir króna. Þess ber að geta að
hjúkrunarfræðingar í heimahjúkrun eru
ekki á undanþágulistum. Það verður því
ekki leitað til þeirra með þjónustu við
þá sjúklinga sem eru sendir heim af
sjúkrahúsum. Þeir sem eru sendir heim
eru alvarlega veikir og þess vegna líklegt
að þeir þurfi eftirlit og umönnun.
Áhrif verkfalls unnin upp?
Venjan er sú að heilbrigðisstarfsfólk og
heilbrigðisstofnanir gera margt til að
koma biðlistum aftur í sama horf og
þeir voru fyrir verkfall. Þannig að sá
sem þarf á aðgerð að halda fær þá
aðgerð, bara nokkrum dögum eða vikum
síðar. Hefur hann þá orðið fyrir nokkru
tapi? Svarið við því er já. Hann býr
lengur við sársauka sé um það að ræða,
hann býr lengur við þann ótta sem fylgir
því að ganga með ómeðhöndlað mein
og hann er líklega frá vinnu eða hefur
skerta starfsgetu lengur en þyrfti að
vera. Greiðsluviljaferillinn er dreginn upp
með það í huga að notandanum standi
aðgerð eða umönnun til boða nú, ekki á
morgun eða hinn daginn. Vilji menn engu
að síður taka tillit til þessara atriða mætti
lækka kostnaðartölurnar, sem nefndar
hafa verið hér að framan, um 10-20%.
Niðurstaða varðandi
skammtímaáhrif verkfalls
hjúkrunarfræðinga
Samkvæmt ofangreindu mati má
áætla velferðartap þjóðfélagsins vegna
mánaðarlangsverkfallshjúkrunarfræðinga
til jafngildis 800 milljónum til 1 milljarðs
króna á verðlagi ársins 2008. Leggja
verður áherslu á að hér er um afar grófa
og óvissa nálgun að ræða. Þó hefur verið
reynt að gæta varúðar og nota frekar
lágar tölur en háar.
Heimildir:
Knox, K. J., Blankmeyer, E. C., & Stutzman, J.
R. (2006). Private-Pay Demand for Nursing
Facilities in a Market with Excess Capacity.
Atlantic Economic Journal, 34 (1), 75-83.
Mukamel, D. B., & Spector, W. D. (2002). The
competitive Nature of the Nursing Home
Industry: Price Mark Ups and Demand
Elasticities. Applied Economics , 34 (1), 413-
20.
Stovall, J„ Hobart, M„ & Geller, J. (2004).
The Impact of an Employees' Strike on a
Community Mental Health Center. Psychiatric
Sen/ices , 55 (2), 188-92.
„ÉG VIL VERÐA HJÚKRUNARKONA“
Á skrifstofu ritstjóra hangir falleg teikning eftir
sjúkling á barnadeild Landspítalans. Ritstjóri lagðist
í rannsóknarblaðamennsku til þess að finna söguna
bak við myndina og hvernig hún komst í eigu Félags
íslenskra hjúkrunarfræðinga. Rannsóknin hefur þó ekki
borið árangur hingað til.
Myndin er eftir Önnu Ingibjörgu Ágústsdóttur sem
samkvæmt textanum undir myndinni var 11 ára 1970.
í þjóðskrá finnst hins vegar engin með þessu nafni og
engin Anna Ágústsdóttir eða Ingibjörg Ágústsdóttir með
fæðingarár sem passar við upplýsingarnar á myndinni.
Þegar blaðið fór í prentun hafði ritstjóra heldur ekki tekist
að finna út hvernig myndin komst í eigu Félags íslenskra
hjúkrunarfræðinga.
Félagsmenn, sem hafa upplýsingar um myndina eða
almennt um teikningar frá barnadeild Landspítalans
á þessum tíma, eru beðnir um að hafa samband við
ritstjóra í síma 540 6405 eða með tölvupósti, christer@
hjukrun.is. Fyrir neðan myndina stendur „Anna Ingibjörg
Ágústsdóttir 11 ára barnadeild Landspítalans 1970“
og „Ég vil verða hjúkrunarkona". í neðri hægra horni
myndarinnar er merkið „J17“.
24
Tímarit hjúkrunarfræðinga - 3. tbl. 84. árg. 2008