Breiðfirðingur - 01.05.2015, Page 117

BREIÐFIRÐINGUR 117
og náttúruvísindamaðurinn Eggert Ólafsson ýtti frá kaldri Skor á leið
yfir Breiðafjörðinn til Snæfellsness. Eggert og eiginkona hans Ingibjörg
Halldórsdóttir ætluðu að setjast að á Hofstöðum í Miklaholtshreppi.
Þau náðu þó ekki landi eins og þekkt er. En um leið og þetta er rifjað
upp má með sanni segja að það sést vítt um frá Stykkishólmi og sagan
er þar á hverju strái við Breiðafjörðinn og í nærliggjandi svæðum.
Ég ólst upp við það sem unglingur að móðir mín sat í stjórn Sambands
breiðfirskra kvenna og skrifaði í Breiðfirðing. Ég hef því búið við það
alla tíð að hafa ritið Breiðfirðing í bókahillum og í því merka riti er af
mörgu góðu efni að taka fyrir þá sem unna þjóðlegum fróðleik og njóta
þess að efla átthagatryggðina. Því fagna ég því ef það tekst að auka
samstarf Snæfellingafélagsins og Breiðfirðingafélagsins við útgáfu
Breið firðings.
En það er framtíðin sem ég vil ekki síður fjalla um. Hvað má best
gera til þess að efla byggðir Breiðafjarðar? Það má að mínu áliti gera
með því að auka samstarf Snæfellinga, Dalamanna og Barðstrendinga
á sem flestum sviðum. Eins og þekkt er hefur Breiðafjörðurinn verið
matarkista sem sótt var í um aldir. Fiskimiðin eru þar gjöful fyrir þá
sem sækja sjóinn frá verstöðvunum við fjörðinn og margt bendir til
þess að hörpudiskurinn verði veiddur og verkaður að nýju og skapi
verðmæti. Vinnsla sjávarfangs úr Breiðafirði verður því um ókomna
tíð einn mikilvægasti þáttur auðlindanýtingar og tekjuöflunar á
svæð inu. Ferðaþjónustan er vaxandi en ferðamenn sækja í að njóta
náttúrufegurðar, ferðast um söguslóðir, sigla um milli hinna óteljandi
eyja á Breiðafirði og dást að fuglinum í björgum og selnum á skerjum.
Þess er að vænta að byggðar verði upp heilsulindir í kringum heitar
lindir sem er að finna á svæðinu og gætu dregið til sín enn fleiri
ferðamenn. Umhverfisvottun Snæfellsness og einnig sunnanverðra
Vestfjarða á eftir að tryggja stöðu svæðisins í öllu tilliti ásamt því að
hafa þjóðgarð á Látrabjargi og Þjóðgarðinn Snæfellsjökul sem mjög er
sótt í að ferðast um.
En trúlega er nýting stærstu auðlindarinnar í firðinum á næsta leiti.
Þar á ég við sjávargróðurinn sem er lítið nýttur nema óbeint við að
viðhalda og tryggja vöxt og viðgang lífríkis sjávar. Nú er stefnt að
STYKKISHÓLM