Breiðfirðingur - 01.05.2015, Page 107
BREIÐFIRÐINGUR 107SAGNFRÆÐINGAR SK IFA UM BREIÐAFJÖRÐ
verslað þar á hverju ári síðan. Þótt gjalda verði varhug við staðhæfingum
af þessum toga er lítil ástæða til að efa að skip frá Brimum hafi siglt
árum saman á Búðir. En á árinu 1564 virðist friðurinn hafa verið úti
því á því ári sigldi skipstjóri frá Hamborg að nafni Jurgen Borcher á
Búðir og verslaði þar. Ráð og borgarstjórar Brima rituðu Danakonungi
og klöguðu að einkaleyfi þeirra til þess að versla á Búðum hefði verið
óvirt. Konungur bannaði þá Hamborgurum stranglega að versla í
þessari höfn. Friðrik II, konungur Danmerkur, hafði áhuga á að styðja
danska kaupmenn. Af þessari ástæðu gaf hann Dananum Byrge Trolde
árið 1566 einkaleyfi til að versla á Búðum. Það er alls ekki öruggt að
Trolde hafi nokkru sinni verslað þar.
Í september 1567 skrifuðu skipstjórar og kaupmenn í Brimum bréf
til Tylemanns Zernemans, sendiherra Brimara við hirð Danakonungs. Í
því bréfi kemur fram að Brimarar hafi verslað bæði árin 1566 og 1567 í
Búðum. Meðal annars kvarta þeir yfir því að aflabrögð hafi verið mjög
slæm á síðasta ári og að auki hafi fiskurinn víða verið skemmdur. Í
október 1567 gaf Danakonungur Johanni Human, borgara í Brimum,
leyfi til að versla á Búðum. Næstu 20 árin virðist sem kaupmenn frá
Brimum hafi getað verslað á Búðum án þess að verða fyrir áreiti. Það
virðist hafa komið til erfiðleika við endurnýjun leyfisins árið 1586 en
það virðist hafa verið endurnýjað árið 1589. Meðal þeirra kaupmanna
sem taldir eru upp af þessu tilefni er maður að nafni Johan Hudeman.
Þegar tekið er tillit til þess hvað nöfn eru oft skrifuð á mismunandi hátt
á miðlágþýsku (þ. Mittelniederdeutsch) er ekki ólíklegt að meðlimir
sömu fjölskyldu hafi verslað á Búðum frá 1526 til enda þýskrar
verslunar á Íslandi árið 1602. Johan Hudeman gæti verið sami maður og
Johann Human sem fékk leyfið árið 1567, sonur eða bróðursonur hans.
Það er heldur ekki fráleitt að gera ráð fyrir því að Wylken Hudeman
sem „uppgötvaði“ höfnina á Búðum 1526 hafi verið afi eða langafi hins
síðasta Johans Hudemans.
Tiltölulega seint á Þýsku öldinni fást fréttir af siglingu Þjóðverja
á Arnarstapa. Árið 1553 höfum við þær fréttir að Jochen, eða Jurgen
Willer frá Hamborg, hafi greitt umboðsmanni konungs 30 mörk lybisk
í hafnartoll. Árið 1561 er skip frá Hamborg á Stapa, en 5. febrúar 1563