Morgunblaðið - 12.12.2019, Blaðsíða 62

62 BÆKUR
MORGUNBLAÐIÐ FIMMTUDAGUR 12. DESEMBER 2019
Árni Matthíasson
arnim@mbl.is
Ljósmyndarinn Charlotta María
Hauksdóttir var stödd hér á landi
í síðustu viku til að kynna nýút-
komna bók sína, A Sense of Place:
Imprints of Iceland, sem hefur að
geyma þrjár myndaseríur af ís-
lensku landslagi sem hún hefur
unnið að frá 2003. Bandaríska for-
lagið Daylight Books gefur bókina
út.
Charlotta hefur búið vestur í
Bandaríkjunum síðastliðin átján
ár, en kemur títt hingað til að
taka myndir og halda sýningar.
Sýndi síðast í Ramskram galleríi
fyrir tveimur árum og með Félagi
íslenskra samtímaljósmyndara á
Korpúlfstöðum í sumar.
Hún hefur einnig sýnt ljós-
myndir víða um heim og átt
myndir í ýmsum útgáfum, blöðum,
tímaritum, bókum og sýning-
arskrám svo dæmi séu tekin.
Aðspurð hvað vaki fyrir henni
með myndaröðinni segir Charlotta
að seríurnar þrjár fjalli um þau
tilfinningalegu áhrif sem landslag
hefur á manneskjuna sem og okk-
ar áhrif á landslagið. „Meira en að
sýna landslagið er ég að leita að
hughrifum við því.“
Eins og sjá má á myndinni sem
birtist hér vinnur Charlotta mikið
með myndirnar, sérstaklega í
þessu verkefni. „Í eldri verkum
hef ég raðað saman myndum í
tvennum og þrennum en nú er ég
að klippa niður prentaðar myndir
og leggja saman í lögum. Með því
að umbreyta landslaginu verða
verkin meira einstaklingsbundin
upplifun, þar sem hver og einn
dregur af sinni reynslu til að sjá
heildarmyndina.“
– Fyrir vikið verður landslagið
óraunverulegt og ævintýrakennt –
byggist það að einhverju leyti á
því að þú hefur búið ytra svo
lengi?
„Ég byrjaði að mynda lands-
lagið eftir að ég flutti til Banda-
ríkjanna og gerði það draumkennt
til að sýna hversu hverfult það
getur verið í minningunni. Eftir
því sem ég bjó lengur úti breytt-
ust verkin í raunsæislegri mann-
hæðarháar samsettar myndir þar
sem ég gat betur staðsett mig í
landslaginu. Nýjustu verkin eru
hins vegar mjög abstrakt.
Ég er með flogaveiki í
gagnaugalappa heilans sem gerir
að verkum að minningar mínar og
tilfinningar eru brotakenndar og
tilfærslukenndar. Þetta birtist í
stórum hluta verka minna og frá
því ég byrjaði að taka landslags-
myndir braut ég landslagið upp,
endurraðaði því og gerði að til-
búnu rými.
Ég ferðast um landið og tek
hundruð mynda á hverjum stað,
frá ýmsum sjónarhornum. Síðan
vinn ég í gegnum myndirnar og
set þær saman þegar ég er komin
heim til Kaliforníu, vel 20-30
myndir frá tilteknum stað sem
mér finnst ríma saman, vinn þær
og prenta út og klippi þær síðan
og raða saman í þrívítt form. Það
sem sést og það sem sést ekki af
landslaginu gefur til kynna sam-
spil manns og náttúru og líka það
hve minnið er ófullkomið. Ég vil
gjarnan draga áhorfendur inn í
verkið og slitrótt samhengi mynd-
anna fær þá til að sækja í eigin
reynslu til að fullklára þær. Með
því að nota fingrafaramynstur
skírskota myndirnar líka til per-
sónulegrar ábyrgðar okkar á því
hvaða áhrif við höfum á náttúr-
una.“
Óraunverulegt og ævintýrakennt landslag
Ljósmyndarinn Charl-
otta Hauksdóttir tekur
landslagsmyndir og
klippir niður til að búa til
þrívítt ímyndað landslag.
Hún sendi frá sér ljós-
myndabók á dögunum.
Ljósmynd/Charlotta Hauksdóttir
Samhengi Ein þrívíðra mynda Charlottu Hauksdóttur úr bókinni A Sense of Place. Þessa mynd nefnir hún Topography Study XXVI.
Ljósmyndir Rutar og Silju
Skipholti 31 | 105 Reykjavík | Sími 568 0150 | Opið alla virka daga kl. 10-17 | www.rut.is | Ljósmyndir Rutar og Silju
Stúdenta-
myndatö urk
Einstökminning