Strandapósturinn - 01.06.1980, Qupperneq 32

slægjulönd, sem nýtt voru til heyskapar í þá daga. Guðmundur
hafði vakandi auga á því hvar hestarnir héldu sig, og þegar að
hann sá að þeir fóru að nálgast engjalandið, gekk hann upp á
túnið með hrossabrestinn í hendinni og snéri honum af miklum
krafti. Hrossabresturinn gaf frá sér ískrandi hvissandi hljóð með
töluverðum hávaða. Þetta verkaði þannig á hrossin að þau tóku
sprett og hlupu burt. Ég var stundum með honum í þessum
ferðum. Fannst hálf ótrúlegt að hestar hræddust þetta litla
áhald. Einnig þótti mér gaman að sjá hestana hlaupa.
Guðmundur er fæddur 18. júní 1844 í Kálfavík í Ögurhreppi
N-Isafjarðarsýslu. Foreldrar hans voru Bárður Jónsson bóndi
þar og kona hans Steinunn Guðmundsdóttir, Sturlaugssonar.
Guðmundur hóf búskap í Kálfavík árið 1867 og bjó þar til ársins
1882, en það ár flytur hann búferlum að Kollafjarðarnesi í
Strandasýslu. Guðmundur var góður smiður bæði á tré og járn.
Frægastur var hann fyrir bátasmíðar. Þær stundaði hann af
miklu kappi alla ævi og smíðaði fjölda báta, enginn veit nú tölu
þeim. Vitað er, að á meðan hann bjó í Kálfavík smiðaði hann
allmarga báta. Fljótlega eftir að Guðmundur kom að Kolla-
fjarðarnesi gerðist búskapur hans stór í sniðum og var Kolla-
fjarðarnesið fullnýtt í hans höndum og það svo að hann varð að
fá slægjur annarsstaðar. Talið er að hann hafi þá verið með næst
stærsta bú í Strandasýslu, aðeins Tröllatungubúið var stærra.
Hann stækkaði túnið og sléttaði, engin þúfa var til í Kollafjarð-
arnestúninu þegar hann fór þaðan. Hann reisti kornmyllu á
staðnum og gróf stóran og öflugan skurð ca. 1 km að lengd að
ánni Hvalsá, veitti ánni eða hluta hennar í skurðinn og var
kornmyllan drifin með vatnsafli. Út frá túninu í Kollafjarðarnesi
að Hvalsá eru grundir og upp frá þeim mýrlendi. Á þetta land
veitti Guðmundur vatni úr Hvalsá í því augnamiði að auka
grasvöxt þar. Þetta land var farið að taka töluvert við sér áður en
Guðmundur fór þaðan.
Frammi á Hvalsárdal í landi Kollafjarðarness eru fúaflóar
nokkuð grasgefnir en illvinnandi sökum bleytu. Guðmundur var
byrjaður að ræsa þá fram áður en hann fór af jörðinni.
Á Kollafjarðarnesi er lítill hólmi rétt undan landi. Nes liggur
30