Strandapósturinn - 01.06.1984, Blaðsíða 37

við Bólstað, og þaðan var lagt á heiðina. Allt gekk ferðalagið vel
og að Kjós komið áður en fór að bregða birtu en þetta var um
miðjan febrúar. Mennirnir fóru auðvitað ekki lengra þennan
dag. Ekki minnist ég þess að vera þreytt eða með harðsperrur
daginn eftir. Að sjálfsögðu greiddi ég kostnað þann er nám-
skeiðið hafði í för með sér en Gunnlaugur tók ekki eyris virði fyrir
uppihald og alla fyrirgreiðslu mér viðkomandi. Alla tíð átti ég
sérlega góðu að mæta á þessu gestrisna myndarheimili, sem og
aðrir vegfarendur.
Fátt bar til tíðinda það sem eftir var vetrar. Tíðarfar var
fremur gott að undanskildu hastarlegu áhlaupsveðri, síðla dags,
laugardaginn fyrir páska. Óveður þetta gekk víða yfir og varð
þeim minnisstætt sem í því lentu á ferðalögum, hvort heldur var
á sjó eða landi.
Það voraði snemma svo útivinna hófst með fyrra móti. Við
Stína vorum að ausa yfir þúfurnar, ofanvert við götustíginn sem
lá út að Bæjarlæknum sem vatnið var sótt í til heimilisins, og
vonuðum við að farið yrði að kalla á okkur í miðaftanskaffið.
Trogin voru nokkuð þung, þó var verkið síst leiðinlegt. Af til-
viljun var okkur litið út á Kjósarnesið. Sjáum við þá hvar maður
kemur gangandi og fer greitt. Þegar hann nálgast ber fyrir augu
mann í ljósum frakka, með hatt á höfði. Hver gat þetta verið
þannig klæddur. Við höfðum enga tilhneigingu til að flýja af
hólmi og fara inn í bæ, heldur taka því sem að höndum bæri.
Senn er maðurinn kominn til okkar, heilsar og segir til nafns síns
og spyr eftir húsbændum. Gefum við honum greið svör því
viðkomandi og bjóðum honum í bæinn. Vorum við auðvitað
óhreinar og með okkar strigasvuntur, sem við tókum af okkur, og
héldum svo heimleiðis. Afi var inni á Húsatúni en mamma bauð
gesti til stofu og sendi eftir afa. (Það var engin nýjung að
ókunnuga, heldri menn bæri að garði, en þeir komu af heiðinni.)
Mamma og afi ræddu við Indriða Gottsveinsson, en svo hét
komumaður. Var hann fyrsti íslenski togaraskipstjórinn (á skip-
inu Coot) en var nú hættur sjómennsku. Hafði hann þær fréttir
að færa að nú yrði tafarlaust hafist handa í Djúpuvík við bygg-
ingu á íbúðarhúsi, bryggju, plani og öðru er að síldarsöltun liti.
35