Bændablaðið - 13.01.2022, Qupperneq 18
Bændablaðið | Fimmtudagur 13. janúar 202218
LANDSJÁ
Góðkunningi heimsins, Steve
Jobs, sagði að sú spurning ætti
alltaf að vera efst í huga, ef
maður sæi fram á sinn síðasta
dag, hvort það sem lægi fyrir
að gera væri það sem maður
vildi helst. Í mínu tilelli er
svarið snúið. Mig langar hreint
ekki til þess að vera að skrifa
síðasta Landsýnarpistilinn í
Bændablaðið og mig langar alls
ekki að hætta sérfræðistörfum
fyrir Bændasamtökin.
Góður skóli fram undan
Heildarsamtök bænda og
landbúnaðurinn ganga í gegnum
spennandi tíma og mér fannst
ég vera á réttum stað með
góðu samstarfsfólki að vinna
að brýnum málefnum minnar
stéttar. En pólitíkin er harður
húsbóndi og hafi maður á annað
borð boðið sig fram til þess að
róa á þeirri galeiðu er erfitt að
segja nei þegar háseti er kallaður
undir árar. Hitt veit ég að störf í
ráðuneyti eru besti skóli sem hægt
er að fara í upp á heildarsýn yfir
tilheyrandi atvinnugreinar, sem
í þessu tilfelli eru sjávarútvegs-
og landbúnaðarmál. Fyrir strák úr
sveit við sjávarsíðuna er það ekki
svo lítils virði. Og ekki víst að
annað færi gefist á slíkum skóla.
Ég hef fengið góðar óskir frá
samstarfsfélögum og vinum í
landbúnaðinum sem þykjast vita
að ég verði þeim og greininni
haukur í horni. Sem betur fer
fyrir mig er stjórnarsáttmálinn
nokkuð afdráttarlaus hvað varðar
stefnumótun og aðgerðir sem
snúast um nýsköpun og framþróun
landbúnaðarins. Til þess að slá á
væntingar er svo skylt að geta
þess að aðstoðarmaður ráðherra
er fyrst og fremst framlengdur
armur hans og tengiliður milli
hans, embættismanna og
annarra sem við ráðherrann eiga
erindi. Aðstoðarmaðurinn hefur
ekkert sjálfstætt boðvald innan
ráðuneytis.
Sterkari byggðir og meiri
þjónusta
Eins og þjóðin fylgist undirritaður
límdur með Verbúðinni á RÚV og
ég velti fyrir mér hvaða ferlegu
vinnuslys hendi Sveppa og Góa
í næsta þætti. Þannig er það
ekki síður spennandi að kynnast
sjávarútveginum betur. Þar á að
kortleggja áskoranir og tækifæri
í sjávarútvegi og leggja fram
tillögur um hvernig megi meðal
annars auka samfélagslega sátt um
umgjörðina í kringum fiskeríið.
Þá eru næstu ár mikilvæg hvað
varðar uppbyggingu í fiskeldi og
þar á að móta heildstæða stefnu
um uppbygginguna, umgjörðina
og gjaldtökuna. Það verður margt
að læra næstu misserin. En sjálfur
hef ég þá trú að sjávarútvegs- og
landbúnaðargreinarnar séu ekki
nægjanlegar einar og sér til þess
að tryggja byggða- og íbúaþróun
á landsbyggðinni. Breikka þurfi
grunninn með nýsköpun og fleiri
stoðum undir fjölbreyttu mannlífi.
Þær eru nauðsynleg kjölfesta
en ekki nægjanlegar til að snúa
við blaðinu. Þróun beggja þessara
greina er til meiri afkasta og
framleiðni svo að fyrirsjáanlegt
er að störfum haldi áfram að
fækka í þeim greinum. Svo aftur
sé vikið að Verbúðinni þá er það
í sjálfu sér ágætt að mannshöndin
fjarlægist afputtunarvélunum eins
og þær voru kallaðar af góðum
manni á Vopnafirði. Þessar greinar
þurfa að taka þátt í samtali og
stefnumótun um hvernig það
verður gert eftirsóknarvert að búa
og starfa í sjávarbyggðum eða í
sveitum.
Bændur eru sterkari saman
Það verður að segjast eins og er
að það fylgir því ákveðinn tregi að
hætta að vinna í Bændahöllinni,
vitandi það að húsið sé selt
og Bændasamtökin muni á
einhverjum tímapunkti flytja
sig um set á nýja starfsstöð. Það
myndi vanta í mig alla sögulega
vitund ef svo væri ekki. En þar
með eru síður en svo sögulok,
félagasamtök bænda eiga sögu
aftur til ársins 1837 og verða því
185 ára 28. janúar næstkomandi.
Þetta ár er fyrsta heila starfsár
sameinaðra Bændasamtaka.
Hvernig sú saga fer hefur ekkert
að gera með gamla steypu heldur
allt að gera með það hversu vel
það tekst til að sameina krafta
bænda í nýjum samtökum. Til
þess þurfa sem flestir að skrá sig
til leiks og taka þátt í þeirri nýju
sögu. Félagasamtök bænda hafa
ekki lifað í tæp tvö hundruð ár á
loftinu einu saman, heldur hafa
þau lifað af á félagsvitundinni og
samstöðunni.
Ég óska öllum mínum fyrrum
samstarfsfélögum alls hins besta
í starfinu og bændum sömuleiðis.
Kári Gautason
Kaflaskil en engin
sögulok
Kári Gautason.
FRÉTTIR
„Við erum hvergi nærri hætt með
okkar uppbyggingu, en stefnan er
að íbúar í sveitarfélaginu verði um
eitt þúsund talsins í upphafi ársins
2026, segir Snorri Finnlaugsson,
sveitarstjóri í Hörgársveit. Nú í
upphafi árs voru íbúar rétt yfir
700. Fjöldi nýrra íbúa hefur sest
að í sveitarfélaginu í nýju hverfi
á Lónsbakka undanfarin ár en
þar er verið að bæta við lóðum
undir íbúðir.
Lónsbakkahverfið, sem stendur
við suðurmörk Hörgársveitar næst
Akureyri, hefur verið að byggjast
hratt upp síðastliðin tvö ár. Fyrir voru
tvær götur, Skógarhlíð og Birkihlíð,
þar sem búa um 100 manns, en frá því
framkvæmdir hófust við tvær götur
til viðbótar, Reynihlíð og Víðihlíð, á
fyrrihluta ársins 2019, hefur íbúatalan
nánast tvöfaldast. Byggðar hafa verið
alls 37 íbúðir í hverfinu, sem þegar er
flutt inn í, og eru íbúarnir 95 talsins.
Snorri segir að 32 íbúðir séu í
byggingu nú og gert ráð fyrir að flutt
verði inn í þær flestar á þessu ári.
„Við búumst svo við að hafin verði
bygging á 28 íbúðum til viðbótar á
þessu ári og næsta og inn í þær verði
flutt á næsta og þarnæsta ári,“ segir
hann. Þá hefur að auki verið úthlutað
4 lóðum fyrir 16 íbúðir sem gera má
ráð fyrir að flutt verði í árið 2024.
„Það verða í allt um 112 nýjar
íbúðir við þessar tvær nýju götur
og við teljum að íbúar þar verði í
allt um 300 talsins. Þeir bætast við
þá 100 sem búa í eldra húsnæði við
Lónsbakka.
Hugmyndir um uppbyggingu
á gamla íþróttavellinum
Kynntar hafa verið hugmyndir um
uppbyggingu á nýju svæði norðan
við það sem fyrir er, á gamla Dags-
brúnarvellinum.
„Við höfum verið að skoða
hvaða möguleikar eru fyrir hendi
með stækkun á Lónsbakkahverfinu
á því landi sem sveitarfélagið hefur
til umráða. Það skipulag er stutt á
veg komið og margs konar óleyst
úrlausnarefni fyrir hendi,“ segir
Snorri og nefnir m.a. samtvinnun
við leikskólann Álfastein og
svæðið í kringum hann sem flétt-
ar inn í svæðið við íþróttavöllinn.
Hugsanleg breyting á legu Þjóðvegar
1 spilar líka inn í dæmið, en ýmsar
hugmyndir um tilfærslu hans hafa
verið viðraðar.
„Við erum nokkuð ákaft að ýta
á Vegagerðina að koma fram með
einhverjar opinberar tillögur varð-
andi framtíðarvegstæði á þessum
slóðum.“ Að auki þarf að huga að
fráveitumálum og aðgengi að íbúða-
byggðinni, hvort sem þjóðvegurinn
verður færður til eða ekki.
„Þetta svæði á íþróttavellinum
býður upp á möguleika til stækk-
unar, en staðan er enn svolítið
óskýr á meðan við bíðum svara frá
Vegagerðinni um þjóðveginn,“ segir
Snorri.
Möguleiki að opnast á
að byggja við Lónsá
Þá segir hann að eigandi
gistiheimilisins Lónsár hafi ákveðið
að hætta sinni starfsemi og óskað
eftir að skipta landi sínu upp, þannig
að þar gæti myndast svæði undir örfá
íbúðarhús, auk svæðis fyrir verslun
eða þjónustu.
„Við erum líka með þetta í
frumskoðun og ekki hægt að segja
nú hvað verður,“ segir hann.
Allir möguleikar sé skoðaðir til að
mæta mikilli eftirspurn eftir lóðum
í sveitarfélaginu. Þá er einnig horft
til þess að Húsasmiðjan muni senn
flytja sína starfsemi frá Lónsbakka
fljótlega. Ekki sé á þessari stundu
vitað hvað um það húsnæði verður.
Auk þess sem myndarlegt
íbúðahverfi er að rísa við Lónsbakka
um þessar mundir standa yfir
framkvæmdir við einbýlishúsahverfi
í Hagabyggð við Glæsibæ. Þar eru
nú þegar skipulagðar 17 lóðir og
flestar þeirra seldar. Áhugi eigenda
er á því að bæta þar við 13 lóðum og
skipulagsvinna á því í frumvinnslu.
Snorri segir að fullbyggt hverfi
þarna verði með um 70 íbúum.
Mikil bjartsýni ríkir með þessa
íbúafjölgun og margar áskoranir eru
fram undan í uppbyggingu innviða
til að taka sem best á móti nýjum
íbúum sem við tökum öllum fagn-
andi, segir Snorri.
Á árinu 2022 er ráðgert að
halda áfram með stækkun leik-
skólans Álfasteins sem og að hefja
endurbyggingu í Þelamerkurskóla
með það að markmiði að taka
heimavistarálmu skólans í
notkun sem kennsluhúsnæði.
Framkvæmdakostnaður þessa árs
verður sá mesti í mjög langan tíma
og er áætlaður vel á þriðja hundrað
milljónir.
Í allri þessari uppbyggingu er
nauðsynlegt að fjárhagurinn sé
traustur og hefur reksturinn gengið
vel þrátt fyrir heimsfaraldur og erf-
iða tíma. Góð afkoma hefur orðið
til þess að hægt er að fara í krefj-
andi framkvæmdir og skuldir lágar
sem hjálpar til þegar fjármagn þarf
til framkvæmda án þess að setja
sveitarfélagið í erfiða skuldastöðu.
/MÞÞ
Mikil uppbygging í gangi í Hörgársveit:
Skoða alla möguleika til að mæta
mikilli eftirspurn eftir lóðum
Kortið sýnir Lónsbakkahverfið. Bleika svæðið lengst til vinstri er land gistiheimilisins Lónsár og tjaldsvæði sem
þar hefur verið rekið, sem hjólhýsa- og húsbílafólk hefur nýtt sér mikið á undanförnum árum. Nú hyggst eigandinn
hætta þeim rekstri og þar mun þá verða til byggingaland.
Snorri Finnlaugsson, sveitarstjóri í Hörgársveit. Myndir / MÞÞ
Lónsbakkahverfið sem stendur við suðurmörk Hörgársveitar næst Akureyri
hefur verið að byggjast hratt upp síðastliðin tvö ár. Gera má ráð fyrir að þar
verði um 300 íbúar í allt innan fárra ára. Byggingaframkvæmdir standa yfir
við 32 íbúðir um þessar mundir og 28 verður bætt við bráðlega.