Bændablaðið - 13.01.2022, Síða 54

Bændablaðið | Fimmtudagur 13. janúar 202254
Flest undanfarin ár hef ég
farið yfir bíla og tækjaprófanir
frá árinu á undan hér í fyrsta
Bændablaði ársins og kosið út
frá mínu mati eigulegasta bílinn
eða tæki ársins. Á síðasta ári voru
óvenju mörg ýmiss konar tæki og
tól prófuð, allt frá reiðhjólum til
báta. Að prófa bát var svolítið út
fyrir „kassann“, en nýlunda og
tilbreyting.
Óvenju mörg fjórhjól voru
prófuð, en á heildina litið er það
verð hvers fjórhjóls sem raðar þeim
í sæti, dýrasta best, en það ódýrasta
verst. Umhverfisvænsta farartækið
var að mínu mati rafmagnsreiðhjólið
með farangurskörfuna fyrir framan
ökumanninn (tiltölulega ódýrt og
notadrjúgt).
Stutt prófun á vinnubíl
sérpöntuðum af Vegagerðinni
Um áramót fékk Vegagerðin
afhentan vörubíl sem var sérútbúinn
samkvæmt útboði og sérþörfum
fyrir Vegagerðina. Þegar ég sá
þennan bíl fyrir utan Kraft H/F sem
flytur inn MAN vörubíla falaðist ég
eftir því við Guðmund Bjarnason
sölumann að fá að taka stuttan
hring á bílnum áður en bíllinn
yrði afhentur. Við Guðmundur
fórum stuttan „rúnt“ á bílnum á
gamlársdag. Vissulega hefði ég
viljað prófa flest aukatækin sem í
bílinn höfðu verið sett, s.s. krana,
snjótannarfestingu, glussakerfi fyrir
ýmis tæki og fleira, en það var ekki í
boði og læt ég hér duga að telja upp
að neðan hvað er í bílnum aukalega.
Verðið á bílnum (um áramót)
er 18.600.000 með vsk, verð á
aukabúnaðinum er mjög nálægt
öðru eins. 290 hp. vél sem togar
1150 Newtonmetra (Nm).
Parabolic framfjaðrir og
loftfjöðrun að aftan. Framdrif með
sídrifi, afturdrif með driflæsingu.
Tólf gíra sjálfskiptur gírkassi og
hátt og lágt drif í millikassa.
Fjögurra dyra stýrishús
með sætum fyrir 5 farþega og
olíumiðstöð sem hitar kælivatnið.
Bakkmyndavél, dráttarkrókur og
50 mm kúlutengi.
Þá er 3000W straumbreytir í
bílnum sem breytir 24V í 230V til
að hlaða borvélar o.fl. Á bílnum
er 7 tonnmetra (tm) krani frá Hiab
með fjarstýringu. Sturtupallur frá
Zetterbergs. Tengingar fyrir snjó-
tönn, saltkasssa og umferðar stiku-
þvottavél til að þvo umferðar skilti.
Stuttur rúntur
á misgóðum vegum
Þótt ökuferðin hafi ekki verið
löng var farið á holóttan malar-
veg, upp bratta brekku og langan
beinan kafla þar sem bíllinn fór á
hámarks hraða. Eiginþyngd bílsins
er 10.200 kg., en heildarþyngd með
hlassi er 15.000 kg (sem sagt fyrir
þá sem eru með gamla ökuprófið
þá mega þeir keyra þennan bíl og
þurfa ekki aukin ökuréttindi til að
keyra bílinn).
Sjálfskiptingin er 12 þrepa og
eftir að vélin og skiptingin eru búin
að ná vinnuhita, er bíllinn að skipta
sér svipað og hver annar fólksbíll.
Upp brekkuna skipti hann sér eðli-
lega niður. Fjöðrunin er frekar stíf
að framan, en loftpúðafjöðrunin
að aftan glettilega mjúk þrátt fyrir
að aðeins hafi verið um 100-150
kg á pallinum. Í lága drifinu fer
bíllinn mjög hægt (mældi það
ekki, en vel innan við gönguhraða
minn).
Hef lengi séð fyrir mér
svipaðan bíl við viðhald helstu
hálendisvega
Það eina sem ég gat sett út á bílinn
er að 22,5 tommu felgurnar eru 8
gata, en ekki 10 gata eins og á öðrum
vörubílum og passa því ekki felgur
af öðrum vörubílum á þennan bíl ef
dekk gefur sig og þarf að skipta og
því nauðsynlegt að eiga varadekk
á bílinn.
Ég hefði haldið að ef svona bíll
er mikið í viðgerðum og viðhaldi á
hálendisvegum væri betra að vera
á einföldu að aftan í stað tvöfaldra
dekkja og það á 20 tommu felgum
með breiðum dekkjum.
Frá því að ég sá svona svipað
útbúinn bíl fyrst hef ég séð fyrir mér
að einn til tveir menn gætu viðhaldið
umferðarþyngstu hálendisvegum
yfir sumarmánuðina með stöðugri
og reglulegri yfirferð um vegi eins
og Kjalveg og Sprengisandsleið.
Eitthvað sem mætti hugsa um í
framtíðinni, en samt sem áður eru
vegir á hálendinu sem eiga bara
að vera vondir áfram og ekki laga
fyrir bíla sem ekkert erindi eiga
um þá. Meira er hægt að fræðast
um MAN vörubíla á vefsíðunni
www.kraftur.is.
VÉLABÁSINN
Hjörtur L. Jónsson
liklegur@internet.is
Vel útbúinn, fjórhjóladrifinn og tilbúinn í vegavinnu. Myndir / HLJ
Fullt af vinnuljósum og festing fyrir snjótönn.
Á milli framsætanna er öflugur spennibreytir fyrir 220w rafmagn.
Pláss fyrir fjóra farþega, eða að breyta í svefnaðstöðu.
Loftpúðarnir
fyrir framan
og aftan
afturhásinguna
gefa bílnum
mjúka og góða
afturfjöðrun.
Flestir vörubílar eru með 10 gata
felgur sem passa á milli allra bíla,
en þessi er með 8 gata felgur og því
varadekk nauðsynlegt.
Þetta tel ég umhverfisvænsta tækið sem prófað var á síðasta ári.