Bændablaðið - 17.11.2022, Blaðsíða 54

54 Bændablaðið | Fimmtudagur 17. nóvember 2022
Fyrr á árinu kom nýr Range
Rover Sport frá framleiðandanum
Land Rover. Þó svo að þessi jeppi
minni um margt á forvera sinn
sem hefur verið í framleiðslu frá
2013 er þetta alfarið nýr bíll. Frá
framleiðandanum koma einungis
jeppar, og er þetta næststærsta
útspil hans. Sá stærsti heitir ein-
faldlega Range Rover, en þessi,
sem er ögn minni og ódýrari, hefur
fengið nafnbótina Sport. Fyrstu
eintökin af þessum bíl eru farin að
berast BL sem fer með umboðið og
fékk Bændablaðið að prufa.
Land Rover hefur greinilega
fylgt uppskrift að hönnun sem hefur
fallið vel í kramið hjá kaupendum
undanfarinn áratug – því fer ekki
á milli mála að um Range Rover
Sport er að ræða. Örmjó framljósin,
þykkur stuðarinn, rennilegar hlið-
arnar, stórar álfelgurnar og aflíð-
andi þakið gera það að verkum að
bíllinn stendur undir nafni (Sport)
hvað útlitið varðar.
Hraðahindranir engin fyrirstaða
Þrátt fyrir að vera allur hinn
sportlegasti, þá er þetta sannarlega
jeppi með öllu því sem slík græja
þarf. Hann er útbúinn fjórhjóladrifi
með háu og lágu drifi, læstum
millikassa og mikilli veghæð. Einnig
er hann útbúinn Terrain Response
kerfinu sem skynjar hvernig best
er að dreifa aflinu á milli hjólanna
í mismunandi aðstæðum og
kemur í staðinn fyrir hefðbundnar
driflæsingar.
Með því að vera útbúinn
loftpúðafjöðrun fæst bæði mikil
mýkt og stillanleg veghæð. Þegar
slökkt er á bílnum sígur hann
sjálfkrafa eins neðarlega og hann
kemst til að auðvelda aðgang. Í
torfæruakstri er hægt að hækka
bílinn þannig að veghæðin verður
274 mm, sem er 100 mm hærra en
lægsta staða. Í almennum akstri
svífur bíllinn yfir ójöfnur og er
ekki ónæði nema af allra svæsnustu
hraðahindrununum.
Yndisleg þögnin
Hljóðeinangrunin er eins og best
verður á kosið. Ökumaður og
farþegar geta notið þagnarinnar,
hvort heldur sem ekið er innanbæjar
eða úti á þjóðvegum. Helst heyrist
glymur í dekkjunum þegar ekið
er á grófum malarvegum, en ekki
þannig að það sé til ama. Sé ætlunin
að stunda mikinn torfæru- eða
malarvegaakstur er líklegast best
að kaupa bílinn á einhverju minna
en 22 tommu felgum, eins og sá sem
var í þessum prufuakstri.
Í hurðarspjöldunum eru hnappar
til að stjórna helstu stillingum fyrir
sætin, en í margmiðlunarskjánum
er hægt að kafa dýpra og stilla
nákvæmlega eftir þörfum hvers
og eins. Mjög hávaxnir ökumenn
gætu orðið fyrir vonbrigðum með
að ekki er hægt að færa stýrið mjög
aftarlega. Einnig er rétt að benda á
að lofthæðin er ekki mjög vegleg og
gæti þrengt að þeim allra lengstu.
Með glerþaki er hún 13 mm minni
en með venjulegu þaki. Sætin eru
vel formuð, en í stífara lagi.
Aftursætin fara vel með þrjá
fullvaxna farþega og er skottið
afar rúmgott. Sé þess þörf, leggja
rafmótorar niður aftari sætaröðina
og eru hnappar við skotthlerann sem
stjórna því. Sætin leggjast ekki alveg
flöt, en flútta við gólfið í skottinu.
Framúrskarandi bæði á
rafmagni og bensíni
Rafhlaðan getur tekið 38 kWst
hleðslu sem er líklegast það stærsta
sem hefur komið í plug-in hybrid
bíl fram til þessa. Til samanburðar
er rúmmál rafgeymisins í Honda e
borgarbílnum 35,5 kWst og gengur
sá bíll einungis fyrir rafmagni. Hægt
er að fylla á með 50 kW hraða og ná
80% hleðslu á 40 mínútum.
Hérna er því kominn
tengiltvinnbíll sem er framúrskarandi
bæði á rafmagni og bensíni. Ef
hleðsla er á geyminum hreyfist nálin
á bensínmælinum lítið sem ekkert og
auðvelt er að láta rafmagnið duga í
80-90 kílómetra. Þegar straumurinn
klárast er afl bensínvélarinnar
það mikið að hin aukna þyngd
batteríanna heldur ekki aftur af
bílnum. Þar sem hægt er að nota
hraðhleðslustöðvar er raunhæft að
fylla á batteríin á lengri ferðum og
halda bensíneyðslunni í lágmarki.
Margmiðlunarkerfið vel heppnað
Í miðju mælaborðinu er stór
margmiðlunarskjár sem nýtist til
að stjórna mismunandi eiginleikum
bílsins. Blessunarlega eru sérstakir
hnappar af gamla skólanum til að
stjórna algengum aðgerðum, eins
og hljóðstyrk í útvarpinu og hitastigi
loftkælingarinnar.
Auðvelt er að þreifa sig áfram í
gegnum stýrikerfið. Þegar potað er
í skjáinn kemur örlítill titringur sem
gefur til kynna að skipunin hafi verið
móttekin. Einnig er hægt að tengjast
snjallsímum þráðlaust í gegnum
Android Auto eða Apple CarPlay.
Undirritaður tengdi Samsung síma
á augabragði og gat nálgast öpp eins
og Spotify og Storytel án fyrirhafnar.
Svona ættu allir bílar að vera!
Tölur
Bensínvélin er þriggja lítra V6
sem skilar 330 hestöflum. Þegar
rafmótorinn bætist við verður
heildaraflið 440 hestöfl. Samkvæmt
framleiðandanum á bensíneyðsla
í blönduðum akstri að vera undir
einum lítra á hverja 100 kílómetra,
sem er hægt að ná ef gætt er að
aksturslaginu og batteríin hlaðin.
Þegar rafhlaðan tæmdist í þessum
reynsluakstri fór eyðslan upp í 10
lítra í þjóðvegaakstri.
Helstu mál eru eftirfarandi:
Hæð 1.820 mm, breidd 2.209 mm
og lengd 4.946 mm. Eiginþyngd
bílsins er 2.735 kílógrömm og
nær heildarþyngdin upp í 3.450
kílógrömm með farþegum og farmi.
Dráttargetan er þrjú tonn.
Bíllinn í þessum prufuakstri er af
gerðinni SE Dynamic – grunnverð
þess bíls er 17.490.000 krónur.
Með aukahlutum eins og rafdrifnu
dráttarbeisli, glerþaki, svörtum
útlitspakka, dökku gleri, 22 tommu
felgum og svörtu þaki kostar þetta
tiltekna eintak 19.290.000 krónur.
Niðurstaða
Þessi jeppi er miklum kostum
búinn og skarar fram úr öðrum
tengiltvinnbílum. Ef það á að
finna honum eitthvað til foráttu
þá er það hin mikla þyngd bílsins.
Einnig er kaupverðið mjög hátt,
en kaupendahópur Land Rover
Sport lítur líklegast framhjá því
sé ætlunin að versla lúxusjeppa án
málamiðlana.
VÉLABÁSINN
Ástvaldur Lárusson
astvaldur@bondi.is
Land Rover Sport er tengiltvinnbíll sem býður upp á raunhæfa drægni á rafmagninu einu saman. Bensínvélin er þriggja lítra V6 og með nægt afl til að
burðast með þá auknu þyngd sem fylgir rafhlöðunum.
Lúxusinn er mikill. Sætin er hægt að stilla á ótal vegu og hljóðeinangrunin
einangrar ökumann og farþega frá umhverfinu. Margmiðlunarkerfið er
auðskiljanlegt og tengist snjalltækjum þráðlaust án fyrirhafnar.
Útlit bílsins svipar mjög til eldri týpunnar sem framleidd var frá 2013.
Skottlokið og afturljósin eru greinilega ólík forveranum.
Aftursætin rúma fullorðið fólk með
sóma. Hér er bílstjórasætið nánast
í öftustu stöðu.