Árbók Hins íslenzka fornleifafélags - 01.01.1982, Blaðsíða 185
ÞÓR MAGNÚSSON
SKYRSLA UM ÞJÓÐMINJASAFNIÐ 1981
Starfslið
Engin breyting varð á föstu starfsliði Þjóðminjasafnsins á árinu, nema
hvað Lilja Árnadóttir, sem sett var í stöðu safnvarðar árið 1980, var skipuð í
starfið frá 1. september.
Almennt um safnstörf
Talsverð vinna var lögð af safnsins hálfu í undirbúning tveggja sýninga,
annars vegar silfursýningar, sem haldin var i Bogasal og sýningar á lækninga-
minjum, sem var inni í safninu sjálfu og opnuð var 15. júní og stóð fram á
haustið.
Fyrri sýningin var lokaþáttur hinnar umfangsmiklu silfurskráningar, sem
unnið hefur verið að undanfarin ár í samvinnu við Ole Villumsen Krog ljós-
myndara og silfurfræðing. Var þetta sýning á silfurgripum eftir Sigurð Þor-
steinsson gullsmið (1714—1799), öllum þeim er til eru hér á landi og þekktir
eru. Var gripunum komið fyrir á mjög smekklegan hátt í nýjum sýningarskáp-
um, sem keyptir voru sérstaklega af þessu tilefni, og einnig öðrum gripum,
sem tengjast Sigurði og ættmönnum hans. Var silfrið einkum úr Þjóðminja-
safninu en einnig úr kirkjum og öðrum söfnum, svo og úr einkaeigu og var
gefin út vönduð sýningarskrá af þessu tilefni.
Lækningaminjasýningin var haldin vegna ráðstefnu norrænna fræðimanna
um sögu læknisfræðinnar. Hafði próf. Jón Steffensen forgöngu um sýning-
una og voru á henni ýmsir gripir úr safninu, myndir og áhöld, og var þarna
reynt að lýsa ýmsum þáttum úr sögu heilbrigðismála á íslandi.
Af safnsins hálfu vann Lilja Árnadóttir mest að gerð sýninganna, en einnig
Margrét Gísladóttir og aðrir safnmenn eftir föngum.
Undirbúningur var hafinn að því að setja upp lyftuna í húsinu og var síðla
ársins brotið ofan af lyftustokknum og steypt nýtt þak yfir, en í ljós kom, að
mun meira rask þurfti að gera en áætlað hafði verið og kostnaður jafnframt
mun meiri.
Á árinu hófst næturvarzla í safninu á vegum vörzlufyrirtækisins Securitas.