Morgunblaðið - 02.03.2002, Blaðsíða 14

AKUREYRI
14 LAUGARDAGUR 2. MARS 2002 MORGUNBLAÐIÐ
ORLOFSHÚS -
SUMARBÚSTAÐALAND
Orlofshús, 25 km frá Akureyri, fallegar gönguleiðir, fjölbreytt
fuglalíf, silungsveiði og stórbrotið útsýni yfir Eyjafjörð þar sem
kvöldsólin er fegurst.
Á sama stað eru til leigu lóðir/land fyrir sumarbústaði.
Upplýsingar í síma 894 5358.
Allt til fermingar
sími 462 2900
Blómin
í bænum
HONUM brá
heldur betur í
brún manninum
sem á dögunum
var á gámasvæð-
inu við Rétt-
arhvamm. Hann
opnaði þar svart-
an ruslapoka en
ofan í honum
voru tveir
naggrísir í búri.
Yfir 10 stiga
frost var úti
þennan dag. „Ég
fór strax með þá
heim, vildi koma
þeim sem fyrst í
hitann, sagði
maðurinn en
hann vildi ekki
koma fram undir
nafni. „Mér brá
mjög þegar ég
opnaði pokann
og dýrin lifandi
ofan í honum.
Það á ekki að
gera svona lag-
að, þetta er
ógeðslegt,“ sagði
hann. Í haust
fann sami maður kanínu í búri sem
skilin hafði verið eftir á gámasvæð-
inu, en hún var svo aðframkomin af
kulda og hungri að hann lógaði
henni á staðnum.
Naggrísunum var fundið nýtt
heimili hjá systurbörnum mannsins,
þeim Söru Ósk og Jósep Marinó, og
þar una þeir hag sínum vel. Þeir
eru hinir gæfustu og fengu nöfnin
Telma og Dúlla. „Dýrin eru mjög
gæf og greinilegt að þau eru vön
því að vera hjá fólki,“ sagði móðir
barnanna. „Mér finnst synd hvernig
fólk fer með gæludýrin sín, þetta er
hroðalegt.“
Fólk sem var að viðra hund sinn í
Kjarnaskógi skömmu eftir áramót
gekk fram á naggrís þar sem hann
hímdi undir tré í skóginum og hafði
greinilega verið skilinn þar eftir.
Mikið frost var um þær mundir.
Þau náðu dýrinu og tók starfsfólk
Gæludýraverslunar Norðurlands
við því. Elsa Halldórsdóttir, starfs-
maður þar, sagði hræðilegt þegar
fólk gripi til ráða af þessu tagi þeg-
ar það vildi losa sig við gæludýrin.
Dýralæknar svæfa gæludýr, en að
sögn Elsu getur verið að kostnaður
sem því fylgir fæli einhverja frá.
Tveir naggrísir skildir eftir
í ruslapoka á gámasvæði
Synd að fólk
fari svona með
gæludýrin sín
Morgunblaðið/Kristján
Sara Ósk með naggrísina Telmu og Dúllu, sem fund-
ust í búri og í plastpoka í ruslagámi.
KIRKJUVIKA hefst í Akureyrar-
kirkju á morgun, sunnudaginn 3.
mars, og stendur hún yfir fram til
sunnudagsins 10. mars. Fjölbreytt
dagskrá verður í kirkjunni alla dag-
ana.
Heimasíða Akureyrarkirkju verð-
ur opnuð við athöfn kl. 12 á morgun.
Andrea Gylfadóttir syngur við und-
irleik Kjartans Valdimarssonar á
tónleikum á morgun. Föstuvaka
verður á miðvikudag kl. 20.30 þar
sem flutt verður tónlist og lesið upp.
Gunnar Eyjólfsson leikari verður
gestur á opnu húsi eldri borgara á
fimmtudag og á laugardag verða há-
degistónleikar í kirkjunni og einnig
verður haldið málþing um manngildi
og mannréttindi. Kirkjuvikunni lýk-
ur með hátíðarmessu sunnudaginn
10. mars en við það tækifæri verður
Ingunn Björk Jónsdóttir djákni í Ak-
ureyrarsókn sett inn í embætti.
Akureyrarkirkja
Fjölbreytt
dagskrá í
kirkjuviku
ORRI Vésteinsson, fornleifa-fræð-
ingur hjá Fornleifastofnun Íslands,
heldur fyrirlestur í Deiglunni í dag,
laugardaginn 2. mars kl. 15.30 um
hinn forna verslunarstað að Gásum
og rannsóknir sem þar fóru fram á
síðastliðnu sumri. Fyrirlesturinn er í
boði Minjasafnsins á Akureyri og
Gásafélagsins.
Í fyrirlestrinum mun Orri fjalla
um sögu Gása, einkum í ljósi fyrri
rannsókna og þeirra álitamála sem
fræðimenn hafa glímt við varðandi
þennan einstaka minjastað. Enn er
ósvarað ýmsum lykilspurningum um
kaupstaðinn, t.d. um upphaf verslun-
ar þar, og eins hvenær og af hverju
verslun lagðist af. Þá mun Orri gera
grein fyrir athugunum sem gerðar
voru á Gásum síðastliðið sumar og
segja frá áætlunum Minjasafnsins á
Akureyri og Þjóðminjasafns Íslands
um umfangsmiklar fornleifarann-
sóknir á Gásum á næstu árum.
Fyrirlesturinn verður fluttur að
loknum aðalfundi Gásafélagsins,
sem haldinn verður á sama stað og
hefst kl. 14:00, en fyrirlesturinn
hefst sem fyrr segir kl. 15:30.
Aðgangur er ókeypis og öllum
heimill.
Fyrirlestur
um Gásir
ANNA Gunnarsdóttir opnar
sína fyrstu einkasýningu í Ket-
ilhúsinu á Akureyri í dag, laug-
ardaginn 2. mars, kl. 15. Yfir-
skrift sýningarinnar er „Ef
engill ég væri“.
Anna vinnur verk sínu í ull,
leður, fiskroð og selskinn.
Helstu viðfangsefni hennar á
þessari sýningu eru ýmsar
gerðir af lömpum og skúlptúr-
um. Anna hefur tekið þátt í
fjölda samsýninga, m.a. í Fær-
eyjum og á Grænlandi. Sýning-
in stendur til 10. mars næst-
komandi og er opin daglega frá
kl. 14 til 18.
Anna
sýnir
DAGSKRÁ um Munkaþverá í Eyja-
firði hefst í Minjasafninu á Akureyri
á morgun, sunnudaginn 3. mars, kl.
14.30 en þar verður ferðast um sögu
staðarins frá heiðni til nútíðar.
Fjallað verður um fyrstu ábúendur á
Þverá, munka og ábóta frá klaust-
urtímum í rómversk-kaþólskum sið
og umboðsmenn konungs í lúthersk-
um sið. Einnig koma við sögu aðrir
bændur og búalið. Flytjendur verða
Ragnheiður Kjærnested, Þór Sig-
urðsson og Margrét Björgvinsdóttir.
Gestum safnsins gefst einnig
tækifæri til þess að skoða sýningar
Minjasafnsins, Eyjafjörður frá
öndverðu og Akureyri – bærinn við
Pollinn. Safnið er á veturna opið alla
sunnudaga frá kl. 14–16 en aðra daga
eftir samkomulagi.
Svipmyndir
frá Munka-
þverá
SAMKVÆMT staðfestri starfsáætl-
un atvinnumálanefndar Akureyrar
verða ferðamál, samgöngumál, um-
hverfismál, orkumál og orkufrekur
iðnaður í forgangi. Kostnaðaráætlun
nefndarinnar vegna þessara verk-
efna hljóðar upp á eina milljón
króna.
Atvinnumálanefnd mun taka þátt í
verkefni með Atvinnuþróunarfélagi
Eyjafjarðar og Iðntæknistofnun
sem snýr að stefnumótun í ferðamál-
um fyrir Eyjafjarðarsvæðið í heild.
Miðað er við að Akureyri verði mið-
punktur þeirrar stefnumótunar,
ekki síst vegna þess að öll aðkoma að
Eyjafjarðarsvæðinu er í gegnum
Akureyri, eins og segir í bókun
nefndarinnar.
Varðandi samgöngumál segir að í
stefnumótun í atvinnumálum fyrir
Akureyri sé gerð jarðganga undir
Vaðlaheiði nefnt sem eitt af þeim
verkefnum sem nefndinni sé annt
um að koma í framkvæmd. Atvinnu-
málanefnd vill leggja sitt af mörkum
til að mynda hagsmunasamtök sem
undirbúi gerð ganganna. Bæjarráð
samþykkti á fundi sínum í vikunni að
leggja til við bæjarstjórn að Akur-
eyrarbær beiti sér fyrir stofnun und-
irbúningsfélags sem hafi það að
markmiði að kanna til hlítar alla
möguleika á að ráðast í jarðganga-
gerð undir Vaðlaheiði.
Í umhverfismálum var atvinnu-
málanefnd, að beiðni aðstandenda
Staðardagskrár 21 á Akureyri, falið
að leiða vinnuhóp um endurvinnslu-
iðnað sem kæmi með tillögur um öfl-
ugan endurvinnsluiðnað í bænum.
Hefur nefndin þegar skipað vinnu-
hóp sem skila á tillögum á vordög-
um.
Sveitarfélögin á Eyjafjarð-
arsvæðinu ekki samstiga
Varðandi orkumál og orkufrekan
iðnað kemur fram, að formaður at-
vinnumálanefndar hefur á undan-
förnum árum setið í vinnuhópi með
fulltrúum iðnaðarráðuneytis og At-
vinnuþróunarfélags Eyjafjarðar,
sem hefur haft það að markmiði að
undirbúa Eyjafjarðarsvæðið undir
orkufrekan iðnað. Fram kemur í
bókun nefndarinnar, að þeim málum
hafi miðað hægt þar sem sveitar-
félögin á Eyjafjarðarsvæðinu séu
ekki samtiga í þessum málum. At-
vinnumálanefnd vill þó láta á það
reyna hvort ekki náist samstaða um
að vinna þá grunnvinnu sem þarf til
að svara fyrirspurnum varðandi
möguleika til orkufreks iðnaðar á
svæðinu.
Varðandi stefnumótunarverkefni
kemur fram að á síðasta ári voru
greiddar rúmar 2,7 milljónir króna
af liðnum „Framlag til einstakra
verkefna og aðkeypt vinna“. At-
vinnumálanefnd hefur eins og aðrar
nefndir þurft að draga úr útgjöldum
og minnir á stöðuga ásókn aðila í
framlög og styrki til margskonar
verkefna.
Þá óskaði nefndin eftir viðbótar-
framlagi til markaðs- og kynn-
ingarátaks bæjarins. Ennfremur var
óskað eftir því að óráðstafaðir fjár-
munir síðasta árs vegna átaksins
yrðu millifærðir yfir á þetta ár. Sam-
kvæmt samþykkt bæjarstjórnar frá
byrjun síðasta mánaðar hefur mark-
aðs- og kynningarátakið 4,5 milljónir
króna til ráðstöfunar á þessu ári.
Ekki hefur verið endanlega ákvarð-
að hvernig þessum fjármunum verð-
ur varið en ljóst er að töluverður
hluti þeirra mun fara til endurnýj-
unar á heimasíðu bæjarins, segir
ennfremur í bókun atvinnumála-
nefndar.
Starfsáætlun atvinnumálanefndar Akureyrar
Jarðgöng undir Vaðla-
heiði ofarlega á blaði
LEIKFÉLAG Dalvíkur sýnir um
þessar mundir leitritið Sex í sveit
eftir franska leikskáldið Marc
Camoletti. Gísli Rúnar Jónsson
þýddi og staðfærði verkið en leik-
stjóri er Ármann Guðmundsson.
Leikendur eru Sigurbjörn Hjör-
leifsson, Lárus H. Sveinsson, Ey-
rún Rafnsdóttir, Anna G. Sig-
marsdóttir, Þóra Ólafsdóttir
Hjartar og Sigurvin Jónsson.
Sex í Sveit gekk í þrjú ár hjá
Leikfélagi Reykjavíkur og er eitt
af vinsælustu leikritum Borg-
arleikhússins frá upphafi. Verkið
er meinfyndið en í því segir frá
ástarmálum hjónanna Benedikts
og Þórunnar en inn í þau blandast
Sóley viðhald Benedikts, Ragnar
vinur hans og viðhald Þórunnar,
Sólveig veislukokkur hjá Saxbaut-
anum og Benóný eiginmaður
hennar.
Sýnt er á föstudags- og laug-
ardagskvöldum í Ungó og hefjast
sýningar kl. 20.30.
Morgunblaðið/Guðmundur Ingi
Það gengur oft mikið á í verkinu eins og sjá má.
Leikfélag Dalvíkur
Sex í sveit
Dalvík
♦ ♦ ♦