Morgunblaðið - 16.03.2002, Síða 46

UMRÆÐAN
46 LAUGARDAGUR 16. MARS 2002 MORGUNBLAÐIÐ
Í Morgunblaðinu í
gær skýrði ég í stuttu
máli, hvernig fjar-
vinnsla hefur verið
unnin á vegum Alþing-
is. Það sem síðast hef-
ur gerst í þeim efnum
er, að samið hefur ver-
ið við fyrirtækið Óley,
sem starfar í Ólafsfirði
og í Hrísey, um skönn-
un Alþingistíðinda frá
endurreisn Alþingis
1845 til ársins 1990.
Þessi ákvörðun hefur
vakið umræður í fjöl-
miðlum, sem óhjá-
kvæmilegt er að
bregðast við.
Flestum er kunnugt, að það var
mikið áfall fyrir Ólafsfirðinga og
Hríseyinga þegar stærstu fisk-
vinnslufyrirtækin á stöðunum hættu
starfsemi í desember árið 1999 og í
febrúar árið 2000. Mér þótti vænt
um, að Lúðvík Bergvinsson skyldi
rifja það upp í fyrirspurnartíma á
Alþingi sl. miðvikudag að ég lýsti
því yfir 6. mars árið 2000 að það
væri unnið að því að flytja verkefni
til Ólafsfjarðar. Það staðfestir, að sú
ákvörðun fór ekki leynt. Og raunar
hef ég þrásinnis legið undir ámæli í
sölum Alþingis fyrir að hafa ekki
verið snarari í snúningum, en
skönnun Alþingistíðinda þurfti að
undirbúa vel og auðvitað þurfti fjár-
veitingu til verksins. En síðan bætti
Lúðvík við af smekkvísi sinni: „Lík-
lega er veruleikinn sá, að Stöðfirð-
ingar þurfa að líða fyrir það.“ Til-
gangurinn er sýnilega sá, að reyna
að fá Stöðfirðinga gegn mér, en
hann gáir ekki að því að um leið
slettir hann í Ólafsfirðinga og Hrís-
eyinga og veikir traust á sér og
Samfylkingunni í þeim byggðum.
Auðvitað verða þau verk, sem unnin
eru á Ólafsfirði, ekki unnin annars
staðar. Og rétt er fyrir Lúðvík að
hafa í huga, að í janúar voru 10 at-
vinnulausir í Hrísey og 59 í Ólafs-
firði, en enginn í Stöðvarfirði.
Því hefur verið haldið fram, að
ekki hafi borist formleg beiðni frá
Ólafsfirðingum um samvinnu við Al-
þingi um skönnun Alþingistíðinda,
af því að slík beiðni hafi ekki borist
með bréfi. Slíkur málflutningur nær
auðvitað ekki nokkurri átt.
Bæjarstjóri og bæjarfulltrúar í
Ólafsfirði hafa þrásinnis leitað eftir
slíkum verkefnum á opinberum
fundum, á formlegum fundum með
þingmönnum kjördæmisins og í
einkasamtölum. Jafnframt hafa
stjórnarmenn og starfsmenn fyrst
Íslenskrar miðlunar og síðan fyr-
irtækisins Óley átt viðræður við mig
og starfsmenn Alþingis um þetta
mál.
Það hefur heldur ekki farið leynt
eins og sést á ummælum Lúðvíks
Bergvinssonar, sem ég áður vitnaði
til. Og mér er spurn: Er ástæða til
að gera lítið úr viðleitni og ég vil
segja baráttu Ólafsfirðinga og Hrís-
eyinga fyrir því að skapa ný störf í
þessum sveitarfélög-
um? Ætli þeir telji
ekki, að þau skilaboð,
sem alþingismenn
fengu á almennum
borgarafundum á þess-
um stöðum báðum, séu
virði eins sendibréfs þó
þau séu fleiri.
Því hefur verið hald-
ið fram, að hugmyndin
um skönnun Alþingis-
tíðinda sé komin frá
Stöðvarfirði, sem er
ekki rétt. Sú hugmynd
hafði komið fram og
farið var að vinna að
henni áður en ég var
kjörinn forseti Alþingis vorið 1999.
En auðvitað er það ekki kjarni máls-
ins, heldur hitt að Stöðfirðingar ósk-
uðu eftir samstarfi við Alþingi um
verkefni, sem þeir gætu tekið að sér
í fjarvinnslu. Þannig á að nálgast
þessa umræðu og vinna úr henni.
Mér þykir leiðinlegt að Aðalheið-
ur Birgisdóttir framkvæmdastjóri
SMS-Samskipta skuli líta svo á, að
það beri vott um skeytingarleysi af
minni hálfu, að henni hefur ekki
borist formlegt svar við bréfum.
Fyrsta bréf hennar frá 30. okt. 2000
var til forsætisnefndar og lagt fyrir
fund hennar 13. nóvember, þar sem
samþykkt var að biðja um minn-
isblað um fjarvinnslu á vegum Al-
þingis, þar sem m.a. skyldi metið,
hvort heppilegt væri að fjölga fjar-
vinnsluverkefnum. Ég átti síðan
fund með Aðalheiði og sveitarstjóra
Stöðvarhrepps í lok janúar, þar sem
ég skýrði stöðu mála, eins og fram
kemur í bréfi Aðalheiðar til mín
viku síðar til staðfestingar á því sem
okkur hafði farið á milli og kallaði
það að sjálfsögðu ekki á svar. Að-
alheiður vitnaði síðan til þessa form-
lega fundar okkar í bréfi til mín í lok
október sl. Ég svaraði þessu stutt-
lega með handskrifuðu bréfi, sem
var formlegt á sinn hátt og vonandi
ekki óelskulegt. Enn skýrir Aðal-
heiður frá því og nú í Morgun-
blaðinu, að ég hafi haldið opinberan
fund í Stöðvarfirði í janúar eða febr-
úar, en getur þess ekki, að ég átti
fund með henni í fyrirtæki hennar.
Þar skýrði ég henni frá því, að ég
væri að vinna að því í samræmi við
bókun í forsætisnefnd að eitt starf
við símsvörun fyrir Alþingi yrði flutt
til Stöðvarfjarðar, en skönnun Al-
þingistíðinda yrði í Ólafsfirði. Ekki
minnist ég þess, að því hafi verið illa
tekið. Í þessu sambandi er líka rétt
að athuga, að fyrir Stöðfirðinga er
meira gagn í því, að í málum þeirra
sé unnið en að austur þangað séu
send bréf til þess að víkja málinu frá
sér. En sú skilst mér að hafi verið
reynslan. Fjölmörgum hafi verið
skrifað og frá fjölmörgum hafi bor-
ist formlegt svar, sem ekkert kom
út úr.
Til að skýra þessi mál boðuðum
við Arnbjörg Sveinsdóttir alþingis-
maður til fundar á Stöðvarfirði sl.
þriðjudag. Hann var fjölsóttur. Mér
þótti góður andi á fundinum, enda
gafst þar tækifæri til að eyða mis-
skilningi og skiptast á skoðunum.
Eftir fundinn áttum við Aðalheiður
og Ævar Ármannsson ágætt spjall,
þar sem við fórum yfir málin og þá
erfiðu stöðu sem SMS-Samskipti
eru í. Ekki gat ég annað fundið en
að öllum misskilningi okkar á milli
hefði verið eytt.
Að síðustu er nauðsynlegt að taka
fram, að það er ekki vandalaust að
velja fjarvinnslu stað, af því að það
er mikill styrkur litlu fyrirtæki að
eiga samvinnu við Alþingi eða op-
inbera stofnun um slík verkefni. Og
hörmulegt er það auðvitað, ef flutn-
ingur starfa út á land vekur úlfúð og
verður til leiðinda öllum þeim, sem
að því standa. Þetta vil ég taka fram
vegna undarlegra orða hjá föstum
pistlahöfundi Ríkisútvarpsins á
þriðjudagskvöld, en hans sagði m.a.:
„Og sögulokin heyrðum við í frétt-
um síðustu viku, góðir hlustendur,
sem sagt að forseti Alþingis hefur
ákveðið að fara með hugmynd Stöð-
firðinga norður í Ólafsfjörð, þar sem
verkið skal unnið. Það kemur því
örugglega ekkert við að í Ólafsfirði
eru kosningar á næsta leiti eins og
annars staðar og að þar þurfa sjálf-
stæðismenn í meirihluta á allri
mögulegri hjálp að halda. En þegar
Stöðfirðingar voga sér að kvarta
undan þessari framkomu forseta Al-
þingis þá er nú gefið hressilega í
skyn að þeir sem eru með uppsteyt
eigi nú ekki von á góðu frá þeim sem
valdið hafa.“ Enn segir pistlahöf-
undur Ríkisútvarpsins í þessum
þætti: „En það er þó ekki aðalatriðið
heldur framkoma og yfirgengilegur
dónaskapur stjórnmálamanna af
tegundinni Halldór Blöndal gagn-
vart fólki í þessu landi.“ Enn segir
pistlahöfundur: „Á mannamáli heitir
þetta, góðir hlustendur, mútur, hót-
anir og jafnvel fjárkúgun en þetta
er einmitt sú tegund af byggða-
stefnu sem Kristinn, Halldór Blön-
dal og fleiri hafa praktíserað und-
anfarna áratugi.“ Það er ástæðu-
laust að tína fleira upp úr þessum
sarpi Ríkisútvarpsins, en auðvitað
skýra fréttir og fréttaskýringaþætt-
ir þau vinnubrögð sem fjölmiðlar
hafa. Og hlýt ég þó að taka fram, að
ég hygg að þessi pistill sé einstakur
og alls ekki dæmigerður fyrir vinnu-
brögð Ríkisútvarpsins.
SKÖNNUN ALÞINGISTÍÐ-
INDA Á ÓLAFSFIRÐI
Halldór Blöndal
Er ástæða til að gera lít-
ið úr viðleitni Ólafsfirð-
inga og Hríseyinga til
þess, segir Halldór
Blöndal, að skapa ný
störf í þessum sveitar-
félögum?
Höfundur er 1. þingmaður Norður-
landskjördæmis eystra.
Í TILEFNI af um-
ræðu, sem orðið hefur
um aukningu eigna og
skulda hjá Reykja-
víkurborg á síðasta
kjörtímabili, fól ég
fjármáladeild borgar-
innar að fara yfir mál-
ið og greina þróunina
úr fjárhagsáætlun og
ársreikningum borg-
arinnar. Það er al-
kunna að hægt er að
framreikna verðlag
með mismunandi
hætti. Til að koma í
veg fyrir að umræða
um málin valdi rugl-
ingi meðal borgarbúa
vil ég setja fram forsendur að um-
fjöllun um þessi efni, sem ég von-
ast til þess að sátt geti orðið um í
umræðum um eignir og skuldir
Reykjavíkurborgar.
Í eftirfarandi tölum er miðað við
verðlag í árslok 2001 bæði varð-
andi eignir og skuldir. Frá árs-
lokum 1998 til ársloka 2002 hækka
skuldir Reykjavíkur-
borgar, þ.e. fyrir-
tækja borgarinnar og
borgarsjóðs, um
12.597 mkr. Á föstu
verðlagi nemur
skuldaaukningin 8,6
mkr. á dag.
Eignaaukning í
ársreikningi felur í
sér ýmsar reiknaðar
stærðir, svo sem af-
skriftir og endurmat
fastafjármuna. Þar
við bætist að endur-
mat fasteigna hjá
borgarsjóði og fyrir-
tækjum almennt,
þ.m.t. fyrirtækjum
borgarinnar, er með ólíkum hætti.
Þess vegna er valin sú leið að
gera grein fyrir fjárfestingum
Reykjavíkurborgar á þessu ára-
bili. Fjárfestingar Reykjavíkur-
borgar á þessu tímabili miðað við
árslokaverðlag 2001 eru samtals
41.127 mkr. eða sem nemur 28,2
mkr. á dag.
Ég tel mikilvægt að koma ofan-
greindri greiningu á framfæri, þar
sem tölur hafa verið nokkuð á
reiki. Sjálf hef ég nefnt töluna 37
mkr. um aukningu eigna borgar-
innar á dag og byggði þar á grein-
ingu sérfræðinga en skoðun fjár-
máladeildar leiddi ofangreint í
ljós. Niðurstaðan er með öðrum
orðum sú að fjárfestingar borg-
arinnar hafa verið rúmlega þrefalt
meiri en skuldaaukningin á um-
ræddu tímabili.
Aukning
eigna og skulda
hjá Reykjavík-
urborg
Ingibjörg Sólrún
Gísladóttir
Höfundur er borgarstjóri.
Borgarfjármál
Ég tel mikilvægt að
koma þessari greiningu
á framfæri, segir
Ingibjörg Sólrún
Gísladóttir, þar
sem tölur hafa verið
nokkuð á reiki.
SKOÐUN
Málarar - Múrarar - Píparar - Smiðir
Dúkarar - Rafvirkjar - Ræstitæknar
Til þjónustu reiðubúnir!
Eitt númer - 511 1707
www.handlaginn.is
handlaginn@handlaginn.is