Tímarit lögfræðinga - 01.06.1990, Qupperneq 34

Valtýr Sigurðsson:
UM SAMNINGSBUNDNA GERÐARDÓMA
EFNISYFIRLIT
1. INNGANGUR
2. AÐDRAGANDILAGASMÍÐARINNAR
3. EFNISSKIPAN
3.1. Gerðarsamningurinn
3.2. Skipun og hæfi gerðarmanna
3.3. Málsferðin
4. HLUTVERK DÓMSTÓLANNA VIÐ GERÐARMEÐFERÐ
5. LOKAORÐ
1. INNGANGUR
Þann 10. maí 1989 voru samþykkt frá Alþingi lög nr. 53/1989 um samnmgs-
bundna gerðardóma. Frumvarp laga þessara var samið á vegum dóms- og
kirkjumálaráðuneytisins af Stefáni Má Stefánssyni prófessor og Valtý Sigurðs-
syni borgarfógeta og tóku lögin gildi þann 1. janúar 1990. Við samningu
frumvarpsins var haft náið samráð við réttarfarsnefnd sem starfar á vegum
ráðuneytisins. Með lögunum var felld úr gildi 1. gr. 6. kap. 1. bókar Norsku laga
Kristjáns V. en þar var að finna eina gildandi lagaákvæði um samningsbundna
gerðardóma. Lagagreinin var svohljóðandi:
Nú fela málsaðiljar dánumönnum að ráða til lykta ágreining, og er oddamaður með eða eigi,
þá er allt það, sem þeir gera, enda sé það heimilt eftir umboði þeirra, statt og stöðugt, og
verður því eigi skotið til nokkurs dómstóls til ógildingar. En þó heldur konungur sínum rétti.
Samkvæmt þessari gömlu reglu var gerðardómur fyrst skipaður tveim eða
fleiri dánumönnum. Oddamaður var aðeins tilnefndur þegar þeir komu sér ekki
saman um ágreiningsefnið.
28