Morgunn - 01.12.1969, Blaðsíða 45

MORGUNN
125
og minna af handahófi, heldur í sál þess, þeim lifandi blæ,
sem um það leikur, þeim áhrifum, sem það skapar og hefur
á fólkið, sem þar býr og gestinn, sem að garði ber. Og það
er þetta fremur öllu öðru, sem gert hefur og gert getur enn
heimilin að þeim helgu véum og þeim uppeldis- og þroska-
stöðvum, sem eru hverjum skóla betri, og margir minnast
alla ævina með heitari þökk en orð fá lýst.
Og gildi jólanna, það er ekki fyrst og fremst ytra skraut
þeirra og skart, enda þótt sjálfsagt sé og raunar nauðsynlegt
í skynsamlegu hófi að gera sér þá dagamun einnig á ytra
borðinu, prýða þá hvert heimili eftir föngum og reyna að
setja á það sem hlýjastan svip og blæ. En við megum ekki
gleyma því, að þetta út af fyrir sig, er aðeins ófullkomin
umgjörð, sem við sjálf erum að skapa um sjálfa hátíðina.
Hún hefur að vísu sitt að segja og er engan veginn lítils virði,
né heldur má vanrækja hana. En hún er ekki hátíðin sjálf.
Jólin verðum við aðeignast sameiginlega og hvert um sig,
sem ljós og birtu, fögnuð og yl í eigin sál. Þá eigum við að
finna áþreifanlegar og með undursamlegra hætti en nokkm
sinni endranær návist hins eilífa kærleika, bæði umhverfis
okkur og í okkur sjálfum. Þá á sálin að vakna, vermd hinni
æðstu von eilifs lífs, vaxtar og þroska. Þá eigum við að sjá
himnana opnast og heyra fagnaðarsöng englanna, líkt og
fjárhirðarnir á Betlehemsvöllum hina fyrstu jólanótt Og þá
á að leika, jafnvel um dapran hug, hið skærasta ljós, ljósið
frá honum, sem þessi mikla hátíð er helguð og vígð, honum,
sem var og er og verður heimsins ljós.
Slíkra jóla árna ég öllum bæði nær og f jær. Og ég vona og
bið, að ykkur, ágætu húsfreyjur, megi öllum takast að búa
þannig undir þessi jól, hver á sínu heimili og með aðstoð eig-
inmanna og ástvina, svo að allir megi verða samhentir og
samtaka í því að skapa þá fögru umgjörð, sem hátíðinni
hæfir. Og að ailir, bæði ungir og gamlir, megi á þessum jól-
um finna, ekki aðeins sál í hátíðinni, heldur einnig og ekki
síður hátíð í sálinni.
Gleðileg jól!

Sveinn Víkingur.