Fréttablaðið - 15.12.2012, Page 106
15. desember 2012 LAUGARDAGUR| HELGIN | 66
Gítarleikarinn Friðrik Karlsson er fluttur heim til Íslands eftir sextán ára búsetu í London. Hann er búinn að koma sér fyrir í ein-
býlishúsi í Garðabænum með fjöl-
skyldu sinni, eiginkonunni Stein-
dóru Gunnlaugsdóttur og tíu ára
dóttur þeirra Maríu Von. Þar hefur
hann sitt eigið hljóðver til afnota
sem hann notar í starfi sínu.
„Ég flutti út 1996 og ákvað að
vera í Bretlandi í sex mánuði. Ég
var nýbúinn að kynnast konunni
minni og við ákváðum að prufa að
vera úti. Ég var búinn að vinna við
Evítu-myndina [með Madonnu í
aðalhlutverki] og sá í framhaldinu
möguleika á að fá meiri vinnu og
prufa eitthvað nýtt,“ segir Friðrik,
en mánuðirnir sex urðu að sextán
árum.
Hann segir að dóttir sín hafi átt
þátt í því að ákveðið var að flytja
heim til Íslands. „Hún fann hvað
það er mikið frelsi fyrir krakka
hérna og var farin að banka í borð-
ið. Hana langaði til að vera hérna
og vera Íslendingur. Hvað sem má
um Ísland segja, þá er það algjör
paradís fyrir krakka.“
María Von er einmitt efnilegur
fiðluleikari og söngkona og virðist
hafa erft tónlistargen föður síns.
Aðspurður segist hann veita dóttur
sinni eins mikla leiðsögn og hann
getur og ætlar að sjá til þess að hún
spjari sig á tónlistarsviðinu eins og
hann hefur gert.
Fylltu O2 fjórum sinnum
Þrátt fyrir að vera fluttur heim er
Friðrik með annan fótinn erlend-
is. Hann hefur unnið mikið fyrir
söngleikjahöfundinn heimsfræga
Andrew Lloyd Webber, sem á fyr-
irtækið Really Useful Group, og
að undanförnu hefur hann spilað
í söngleiknum Jesus Christ Super-
star víðs vegar um Bretland. Meðal
annars fylltu þau O2-höllina í Lond-
on fjórum sinnum en fjórtán þús-
und manns komast þar fyrir í einu.
Alls verða tónleikarnir 25 talsins
og á þessi uppfærsla rætur sínar
að rekja til raunveruleikaþáttar á
sjónvarpsstöðinni ITV þar sem leit-
að var að aðalsöngvara fyrir söng-
leikinn og voru þátttakendurnir
þrjú þúsund. Til stendur að fara
með sýninguna til Bandaríkjanna,
Ástralíu og Evrópu á næsta ári og
hefur Friðriki nú þegar verið boðið
með í för. „Þetta er rosalega flott
og risastór uppfærsla. Gítarinn er
mjög áberandi í þessu og við stönd-
um sitthvorum megin á stillönsum.
Þetta er það stærsta sem ég hef
tekið þátt í. Andrew Lloyd Webber
fer alltaf alla leið,“ segir hann og
brosir en bætir við að ekki sé auð-
velt að vinna með honum. „Hann er
snillingur og hefur ákveðna sýn.
Það getur oft gengið mikið á meðan
hann er að fá sitt fram, sem er bara
frábært því hann veit hvað hann
vill. Eins og með fólk sem hefur náð
afburða árangri þá hefur það ein-
hverja sýn. Einn sem ég hef unnið
með er svona líka, Simon Cowell
[dómarinn í X-Factor og Idol].“
Friðrik spilaði fyrir Cowell
fyrstu fimm árin sem X-Factor var
sýnt í Bretlandi en þegar sá síðar-
nefndi hætti og ákvað að stjórna
bandarískri útgáfu þáttarins rann
samstarfið á enda. Þess má geta
að tónlistarstjóri Cowells er Nigel
Wright, sá hinn sami og starfar
fyrir Andrew Lloyd Webber.
Í starfi sínu við hina ýmsu raun-
veruleikaþætti í Bretlandi, þar
á meðal Britain‘s Got Talent og
X-Factor, hefur Friðrik kynnst
mörgum stjörnum sem hafa verið
að stíga sín fyrstu spor. Þar má
nefna Leonu Lewis og Will Young.
Aðspurður segir hann gaman að
vinna með þessu unga fólki. „Það er
svolítið gaman því þeir sem koma
úr þessum þáttum eru svo þakklát-
ir. Þeir eru að meika það og allt er
svo jákvættt.“
Minni peningar í hljóðverinu
Friðrik hefur verið einn virt-
asti hljóðversspilari Bretlands og
unnið með mörgum þekktum tón-
listarmönnum. Undanfarin þrjú
ár hefur hann dregið úr þessari
spilamennsku samhliða breytt-
um áherslum í tónlistarbransan-
um. „Það eru ekki sömu peningar
í þessu og voru. Innkoma af plötu-
sölu hefur breyst. Það er ótrúlegt
hvað diskar seljast ennþá mikið á
Íslandi, en eins og í Bretlandi er
niðurhal og streymi orðið mjög
vinsælt. En innkoman af því er
bara brot af innkomunni af því að
selja disk. Heildarsalan hefur því
minnkað og það hefur áhrif á allan
pakkann. Núna má ekki vera eins
dýrt að taka upp plötur.“
Í staðinn hefur Friðrik unnið
meira í gegnum netið. Hann fær
lög send frá upptökustjórum eða
öðrum aðilum, sem hann hefur
í sumum tilfellum aldrei hitt, og
spilar inn á þau í hljóðverinu sínu
heima á Íslandi. „Í dag skiptir
engu máli hvar þú ert. Ég er búinn
að vera heima í átta mánuði og hef
ekki misst af neinni vinnu.“
Seldi 40 þúsund slökunardiska
Gítarleikarinn er með fleiri járn í
eldinum. Hann er með tvö útgáfu-
fyrirtæki í Bretlandi og annast eig-
inkonan Steindóra rekstur þeirra.
Annað gefur út hans eigin slök-
unartónlist á meðan hitt gefur út
bakgrunnstónlist sem er spiluð á
kaffihúsum, veitingastöðum og í
verslunum. Einnig er hún notuð í
farsímum og sem streymi á netinu.
Fyrirtækið var stofnað fyrir ári.
Friðrik fékk aðstoð frá íslenskum
fjárfesti og alls koma fimm aðilar
að verkefninu, þar af þrír Bretar.
„Þetta er dálítið spennandi verk-
efni, svona hágæða lyftutónlist.“
Keypt er tónlist frá lagahöfundum
úti um allan heim og hefur Friðrik
gæðaeftirlitið á sinni könnu.
Slökunardiskarnir hans eru orðn-
ir tólf talsins og kom sá nýjasti,
Snerting, út fyrir skömmu. Sam-
anlagt segist Friðrik hafa selst um
fjörutíu þúsund diska hér heima.
Leitaði í trúna eftir hrunið
Sjálfur iðkar Friðrik pilates, sem
er nokkuð líkt jóga. „Stundum er
maður að vinna í umhverfi þar sem
er mikið áreiti með erfiðum ein-
staklingum og þá skiptir máli að
halda jafnvægi og missa sig ekki.
Þá hjálpar þetta manni,“ segir hann
og heldur áfram: „Ég, eins og flest-
ir Íslendingar, kom ekki óskaddað-
ur út úr bankahruninu. Þá leitaði
ég svolítið í trúna og var kominn
í kirkju úti í Bretlandi. Núna er
ég búinn að starta nýrri þjónustu
í Kópavogskirkju, sem er nútíma
guðsþjónusta fyrir venjulegt fólk
með skemmtilegri músík. Messu-
formið í þjóðkirkjunni hentar ekki
öllum, sérstaklega ekki yngra fólki.
Mér finnst mega nútímavæða það.
Í kirkjunni úti eru fimm hundruð
manns í söfnuðinum og 480 sem eru
virkir og mæta á allt. Þarna hjálpa
allir hver öðrum en það var fyrir
slysni að ég datt inn í þetta,“ segir
Friðrik, sem hefur einnig spilað í
Fíladelfíukirkjunni hér heima.
Hann segir að hrunið hafi kennt
honum hvaða gildi væru mikilvæg-
ust því hann hafi verið orðinn dálít-
ið blindur á það. „Ég var kominn í
þessa efnishyggju sem getur verið
hættulegt. Maður missir sjónar á
því hvað er mikilvægast. Fyrir mig
eru það dóttir mín og fjölskyldan.
Þetta kennir manni svolítið að end-
urmeta hlutina. Í rauninni hefur
þetta verið ágætis lexía þegar upp
er staðið, ekki það að ég ætli að
þakka útrásarvíkingunum fyrir
eitt né neitt.“
Íslenskur raunveruleikaþáttur
Tvö ný verkefni eru í undirbúningi
hjá Friðriki. Annað snýst um að
halda námskeið á næsta ári þar sem
fólk er hvatt til að elta draumana
sína. Til þess þarf getan og sjálfs-
traustið að vera jafnmikið, að hans
mati.
„Þegar ég ákvað að flytja út var
það rosalega stór ákvörðun. Ég hitti
alls konar menn til að styrkja mig
andlega. Fólk fær oft fullt af frá-
bærum hugmyndum en síðan stopp-
ar það einhvers staðar á leiðinni,“
segir hann. Ein fræðigreinin sem
hann hefur stundað kallast NLP,
eða neuro-linguistic programming.
Hún snýst um hvernig eitthvað eitt
getur stöðvað það sem maður hefur
skipulagt í höfðinu á sér. „Það eru
margir með „brilliant“ hugmyndir
en svo stoppar þetta. Þessi fræði-
grein er frábær fyrir svona lausn-
ir.“
Friðrik langar líka að nýta viða-
mikla reynslu sína úr raunveru-
leikaþáttum í Bretlandi og búa
til einn slíkan heima á Íslandi í
samstarfi við framkvæmdastjóra
Really Useful Group, fyrirtækis
Andrew Lloyd Webber. „Það er um
að gera að nýta sér þessi sambönd
sem maður hefur og koma með
svona hluti hingað.“
Ég var kominn í þessa
efnishyggju sem getur
verið hættuleg. Maður
missir sjónar á því hvað
er mikilvægast. Fyrir mig
eru það dóttir mín og
fjölskyldan.
TROÐFULLT Friðrik spilaði fjórum sinnum fyrir troðfullri O2-höll.
Friðrik spilaði nýlega á jólatónleikum með Siggu Beinteins, sem var með
honum í Stjórninni hér á árum áður. „Við höfum alltaf haldið sambandi,
ég, Sigga og Grétar [Örvarsson]. Sigga er söngvari á heimsmælikvarða og
er alltaf að verða betri,“ segir hann og ætlar einnig að hitta félaga sína í
Mezzoforte um jólin. Hann hefur ekkert spilað með hljómsveitinni á tón-
leikum í langan tíma en hefur verið viðriðinn plöturnar hennar. „Við ætlum
að hittast og meta stöðuna. Þegar við spilum saman fjórir, ég, Eyþór Gunn-
ars, Jóhann Ásmundsson og Gulli Briem, gerast alltaf einhverjir töfrar.“
Sigga Beinteins á heimsmælikvarða
José Carreras
Ronan Keating
Sheryl Crow
Will Young
Clay Aiken
Kelly Clarkson
LeAnn Rimes
Cat Stevens
Leona Lewis
Jedward
Tom Jones
Robbie Williams
Susan Boyle
Westlife
Mel C
Gary Barlow
➜ Friðrik hefur spilað undir hjá þessum:
Freyr
Bjarnason
freyr@frettabladid.is
Leitaði í trúna eftir
bankahrunið mikla
Gítarleikarinn Friðrik Karlsson flutti í byrjun ársins heim til Ís-
lands eftir sextán ára búsetu í London. Eins og margir komst
hann ekki óskaddaður út úr hruninu.
MEÐ MEL C Friðrik Karlsson ásamt Mel C úr Spice Girls.
FRÉTTABLAÐIÐ/VILHELM