Frjáls verslun - 01.02.2006, Side 23

F R J Á L S V E R S L U N • 2 . T B L . 2 0 0 6 23
FORSÍÐUEFNI • BANKASTJÓRAR Í LONDON
setja á stofn starfsemi á erlendum vettvangi, felst
áskorunin í því að takast á við annað tungumál og
aðra menningu. Það hefur hins vegar gengið einstak-
lega vel hér í Bretlandi og eins hjá Glitni í heild eins
og atvinnustaðagreining Gallup sýnir, en þar hefur
Glitnir verið hæstur undanfarin ár.
Aukinn alþjóðleiki kemur ekki einungis fram í
erlendum starfsstöðvum bankans heldur einnig á
Íslandi þar sem starfsfólki af erlendu bergi brotnu
hefur fjölgað. Einn af framkvæmdastjórum bankans
er norskur og nú nýlega kom erlendur stjórnarmaður inn í stjórn
bankans. Starfsemin er orðin svo alþjóðleg að við þurfum líka
blöndun heima. Þetta hefur mjög jákvæð áhrif og styrkir stoðir
starfseminnar á Íslandi sem og erlendis.“
- Hluti af fréttaflutningnum hér úr fjármálaheiminum eru
málaferli kvenna á hendur banka fyrir kynferðismismunun
sem er greinilega ekki óþekkt fyrirbæri. Hvernig er að vera
kvenmaður í breskum bankaheimi?
„Reynsla mín er ekkert nema jákvæð. Það gefur mér líklega
ákveðna sérstöðu að vera hjá íslenskum banka - Norðurlöndin eru
þekkt fyrir jafnræði á vinnumarkaði. Ég hef ekki fundið fyrir neinu
öðru en gagnkvæmri virðingu og á góða félaga á markaðnum af
báðum kynjum. En ég veit samt að þessi afstaða er mikið rædd hér
og ég þekki konur sem hafa hætt vegna hennar.
Þó það sé ekki meðvituð ráðstöfun þá eru margar konur í
sérfræðistöðum hér hjá bankanum í London og það hefur vakið
mikla athygli. Reynsla mín er þó sú að það skiptir engu máli hvort
samstarfsmaður eða yfirmaður er karl eða kona. Það er persónu-
leikinn sem er lykilatriði í samstarfi. Þegar ég fer á fundi er ég ekki
að hugsa um að ég sé kannski eini kvenmaðurinn í hópi fjölmargra
herramanna. Vafalaust er það uppskera af góðu uppeldi, menntun
og reynslu í starfi.
En ef ég fer eitthvað að rýna í mun á kynjunum á vinnustað
dettur mér helst í hug að húmor karla og kvenna er ólíkur. Samt er
erfitt að skilgreina þetta, ekki endilega að húmor karla sé kaldrana-
legri eða kaldhæðnari. Frekar bara að það eru oft ólíkir hlutir í þjóð-
félaginu sem karlar og konur fylgjast með og mismunandi hvað
fólk tekur eftir og hefur áhuga á. Húmorinn dregur dám af því.“
- Hluti af umgengnissiðum hér virðist liggja í því að sækja
pöbbana með „hinum strákunum“ eftir vinnu. Er það eitthvað
sem maður má ekki missa af?
„Það skiptir almennt máli að taka þátt í félagslífi sem tengist
vinnunni. Það er reyndar oft tengt íþróttum - og alls ekki af því
að karlmennirnir einir hafi áhuga. Kvenfólk hér er oft áhugasamt
um íþróttir, margar stunda einhverjar íþróttir og eru miklar keppn-
ismanneskjur. En þegar tvær konur hittast þá er nú kannski ekki
endilega byrjað á að tala um fótbolta!
Það hefur jákvæð þróun átt sér stað hér und-
anfarin ár þar sem konur eru í auknum mæli að
efla tengslanet sitt - mér skilst það hafi stóraukist
síðari árin. Við skvísurnar veljum kannski frekar að
fara á kampavínsbar en á hinn hefðbundna breska
pöbb.“
- Nú hafa umfjallanir fjármálastofnana hér
dregið athyglina að íslensku fjármálalífi og
kannski ekki að öllu leyti á heppilegan hátt.
Hver er þín skoðun á þessari umfjöllun?
„Umræðan hefur vissulega verið mikil bæði á jákvæðu og nei-
kvæðu nótunum en það er ábyrgðarhlutverk íslensku bankanna að
útskýra gagnvart aðilum á markaði stöðuna á starfseminni og við-
skiptaumhverfi á Íslandi. Þetta er mjög mikilvægt til að koma í veg
fyrir ranghugmyndir. Að hluta er gagnrýnin réttmæt en umræðan
má ekki verða almennt neikvæð, enda ekki ástæða til þess.
Við verðum að stýra betur upplýsingaflæðinu og sýna fram á
að við getum stýrt þeim áhættuþáttum sem eru til staðar. Íslensk
fyrirtæki og ríkið hafa bætt sig verulega að þessu leyti en það er
nauðsynlegt að leggja enn frekari áherslu á þetta þegar neikvæð
umræða fer af stað. Til dæmis þarf að koma því skýrt til skila að
íslensku bankarnir eru ekki lengur einungis háðir íslensku efna-
hagslífi.“
- Hvaða gagnrýni finnst þér réttmæt?
„Hraður vöxtur hefur sínar veiku hliðar og greiningardeildir leita
auðvitað eftir hættumerkjum við slíkar aðstæður, enda hefur
hann verið undirrót umræðunnar. Fjármögnun íslenskra banka og
fyrirtækja hefur stóraukist síðastliðin ár vegna örs vaxtar, og mikil-
vægt að benda á að á sama tíma hefur áhættudreifingin stóraukist
og undirstaða fyrirtækjanna því mun sterkari en áður var. Ein af
jákvæðu hliðum þróunarinnar er gífurlega góð afkoma íslensku
bankanna. Mikill vöxtur er oft á kostnað arðseminnar og til dæmis
er arðsemi Glitnis langt umfram það sem almennt gerist erlendis.
Hún hefur verið yfir 30% síðastliðin ár og að sama skapi hefur kostn-
aðarhlutfallið haldist lágt sem er mikið afrek.“
- Hvernig finnst þér afstaðan til Íslendinga vera?
„Mjög góð. Ég lít auðvitað á mig sem Íslending en þar sem ég hef
búið lengi erlendis þá velti ég því ekki fyrir mér þegar ég kem á
fundi hvort ég sé eini útlendingurinn frekar en hvort ég sé eina
konan. En það er almennt jákvætt að vera Íslendingur og það vekur
athygli og áhuga sem leiðir oftar en ekki af sér aukin tækifæri.
Í formfestunni hér eiga Íslendingar oft greiðan aðgang að
ýmsum viðburðum sem aðrir komast síður á vegna hefða og stétta-
skiptingar - við erum mjög ónæm fyrir slíkum hlutum. Bretar sem
og aðrir kunna oft að meta að Íslendingar eru bæði framsæknir og
frumlegir.“
Vinnudagurinn hér
er lengri en almennt
gerist heima. Í fjár-
festingabönkum er
vinnudagurinn reyndar
nánast allur sólar-
hringurinn. Hér er
ekki óalgengt að fólk
vinni 12 til 14 tíma
að meðaltali.
Steinunn var fyrst kvenna til að stjórna
íslenskum banka erlendis.