Tímarit Máls og menningar - 01.05.1961, Side 44

JÓHANNES ÚR KÖTLUM
GUÐSBARNALJÓÐ
1
Nei ertu þá kominn kæri Muggur:
ég kætist mjög við að hitta þig
— þú veizt að sál minni stendur stuggur
af stríðinu allt í kringum mig.
Æ komdu með blessuð blöð og skæri
og búðu til mildan friðarheim
og sjáðu um að ástin unga næri
hvert einasta blóm í garði þeim.
Og skóginum ilminn góða gefðu
og gerðu fagurt hans æfintýr
og feimnu sakleysi vorsins vefðu
um vaðfugla þína og pokadýr.
Og brjóttu vatninu braut í skyndi
svo berist moldinni svölun ný
og láttu speglast þitt líf og yndi
þess lygna dimmbláa fleti í.
Og klipptu húmið af kaldri nóttu
unz kvikur fagnandi bjarmi rís
og láttu sál mína svífa um óttu
hins sjöunda dags í Paradís.
122