Tímarit Máls og menningar - 01.07.1980, Page 36

Tímarit Máls og menningar
Verkefnin framundan
Mánaðamótin febrúar/mars verða endapunktur þessarar fyrstu skýrslu af hreyf-
ingu farandverkafólks, bæði vegna rúms og tíma. Þá kom einnig upp sú staða að
áhersla á eitt verkefni þýddi vanrækslu annars, og skoðanir voru skiptar um
forgangsröð innan hópsins. Skýrslugerð upp frá því er þess vegna háð lýð-
ræðislegri umfjöllun innan hans. Við gerð þessarar skýrslu var tekinn sá kostur
að rekja nokkuð ýtarlega sögu hreyfingarinnar samkvæmt þeim heimildum sem
til eru. Sé þar eitthvað missagt væru leiðréttingar vel þegnar. Að mati þess sem
skýrsluna skrifaði hefði tilraun til að gera allri sögu hreyfingarinnar skil í þessari
skýrslu aðeins leitt til svo yfirborðslegrar umfjöllunar um einstök atriði að það
hefði tæpast komið neinum að gagni. Við munum hér á eftir drepa í stuttu máli
á helstu þættina í starfsemi hópsins og gera þeim verkefnum sem framundan eru
lítils háttar skil.
Frá febrúarlokum hafa listamenn ýmis konar gengið í vaxandi mæli til
samvinnu við hópinn, og hefur það sett nokkur merki á starfsemi hans. Þar má
nefna rokkhljómsveitina Utangarðsmenn, en samstarfi hópsins við þá verða
gerð ýtarleg skil í næstu skýrslu, um leið og greind verður og metin sú gagnrýni
sem hópurinn varð fyrir víðs vegar að af vinstri kantinum vegna samstarfsins við
hljómsveitina. Þá hafa leikarar orðið mjög virkir innan hópsins og hefur það
leitt til þess að mögulegt var að semja kabarett, Stimpilklukkukabarettinn, sem
nú þegar þetta er ritað er verið að ferðast með út um landsbyggðina í þeim
tilgangi m. a. að nýta leiklistina sem vissulega getur bitið, sé rétt á henni
haldið, til að örva umræður um málefni farandverkafólks á landsbyggðinni og
kynna þau sem flestum. Þá hefur myndlistarfólk unnið talsvert fyrir hópinn við
gerð plakata og merkja, en þetta hvort tveggja eru sígild áróðursvopn í sögu
flestra hreyfinga. Við munum síðar gera grein fyrir afstöðu hópsins til listar-
innar sem vopns í höndum verkalýðsstéttarinnar og hugsanlega gagnrýna um
leið þau sjónarmið í þessum efnum á vinstri kantinum sem hópurinn telur sig í
andstöðu við. Við munum einnig gera grein fyrir því hvernig kröfurnar bárust
inn á Alþingi og í nefnd á vegum ríkisvaldsins og leggja mat á það á hvern hátt
það hefur nýst málefninu. Þá munum við einnig segja frá samskiptunum við
erlenda farandverkafólkið. Þar hafa komið upp margir athyglisverðir atburðir
. sem gaman verður að greina frá.
Það sem ef til vill er þó merkilegast er þróun hópsins sjálfs, en það að
hópurinn skuli hafa starfað í 11 mánuði án þess að takast mætti að koma föstu
skipulagi á hann er sennilega einsdæmi i verkalýðsbaráttunni, a. m. k. á síðari
162