Árbók Hins íslenzka fornleifafélags - 01.01.2010, Blaðsíða 93
92 ÁRBÓK FORNLEIFAFÉLAGSINS
hefur hluti af því efni síðan sigið niður aftur, en þó ekki fyrr en lag af
sandi hafði sest í kverkina. Engin ummerki sáust í sniðinu austanmegin í
tóftinni sem gætu stutt þá túlkun að austurhlið þess væri manngerð.
Engin viðarkol, aska eða bein sáust í sniðinu og heldur ekki í borkjörnum
sem teknir voru með tveggja metra millibili á allri gróðurtorfunni, samtals
44 borkjarnar. Niðurstöður borkjarnarannsóknar voru skýrar og sýndu að
engar mannvistarleifar er að finna á gróðurtorfunni utan við tóftina og lítil
von um að aska, kol eða bein finnist inni í henni heldur. Aska sú og bein
sem getið er í örnefnalýsingu að menn hafi tekið eftir – væntanlega um eða
fyrir miðja 20. öld – hafa að líkindum verið norðan við sniðið sem skoðað
var 2005, og er örvænt um að slík ummerki finnist í Þórutóftum framar.
Þegar lokið var við að teikna upp snið og skrá og taka borkjarnasýni
var jarðvegi mokað að sniðinu aftur og torf sett þar ofan á. Reynt var að
tryggja að fyllt væri upp í rofið þannig að það kynni að draga úr uppblæstri
fremur en hitt.
Eftir að gengið hafði verið frá tóftinni var gengið kerfisbundið um
svæðið í Laugafelli, í leit að frekari mannvistarleifum. Í stuttu máli skilaði
sú vettvangsganga neikvæðum niðurstöðum, þ.e. engar tóftir, hleðslur,
öskulög eða aðrar leifar voru sjáanlegar á svæðinu.
Niðurstöður
Engar ótvíræðar mannvistarleifar fundust við uppgröft í Þórutóftum 2005.
Þar hafa hinsvegar áður fundist aska og kol og í sniði sáust ummerki sem
gætu verið mannaverk þótt ekki séu þau afgerandi. Þau ummerki koma
heim og saman við að á þessum stað hafi verið náttúruleg dæld sem hafi
verið stungið upp úr til að slétta botninn, ef til vill aðeins fyrir tjald. Af
sniðinu að dæma hefur aðeins verið stungið öðru megin í dældinni og
uppgröfturinn settur upp á barminn vestanmegin.
Ekkert fannst sem bendir til samfelldrar mannvistar, ekki einu sinni
árstíðabundinnar, heldur hefur þessi staður í mesta lagi verið notaður sem
tjaldstæði, varla nema um næturskeið og ekki meira en nokkrum sinnum.
Hinsvegar er hugsanlegt að tjaldað hafi verið á þessum stað öðru hvoru á
löngu tímabili, en því hefur verið hætt fyrir 1477.
Þórutóftir eru því ekki sel og tæplega f lóttamannabúðir frá pláguárum
15. aldar. Ummerkin þar koma betur heim og saman við að þarna hafi
menn átt náttstað við og við á miðöldum, mögulega vegna grasatínslu eða
ferðalaga landshluta á milli.