Tímarit UNIFEM - 01.01.2004, Page 13

Hinn 18. desember nk. eru liðin fimmtán ár frá stofnun Íslandsdeildar UNIFEM. Á þessum
fimmtán árum hefur félagið vaxið og dafnað og er nú ein öflugustu landssamtök UNIFEM í
heiminum. Félagið hefur unnið ötullega að því að kynna starfsemi sína innanlands og staðið
fyrir veglegum og áhugaverðum ráðstefnum.
UNIFEM-samtökin styðja konur í þróunarlöndum til efnahagslegrar sjálfsbjargar. Samtökin
hafa einnig komið að leiðtogaþjálfun kvenna með það fyrir augum að þjálfa þær til þátttöku
í stjórnmálum og ákvarðanatöku sem hefur áhrif á líf þeirra og afkomu. Gott dæmi um
slíkt er jafnréttisverkefni UNIFEM í Kósóvó, en þar hefur að jafnaði starfað einn íslenskur
starfsmaður á vegum íslensku friðargæslunnar frá árinu 2000.
Það er ekki aðeins Íslandsdeild UNIFEM sem fagnar starfsafmæli 18. desember nk. því
sama dag eru 25 ár liðin frá því að alþjóðasamningur um afnám alls misréttis gegn konum,
CEDAW-samningurinn, var samþykktur. Er nú unnið að skipulagningu hátíðarhalda í New
York af því tilefni. Á næstunni verður haldið uppá fleiri áfanga á sviði jafnréttismála á alþjóða-
vettvangi. Á næsta ári eru tíu ár liðin frá því að kvennaráðstefna Sameinuðu þjóðanna var
haldin í Peking í Kína og fimm ár eru frá sérstöku aukaallsherjarþingi Sameinuðu þjóðanna
um málefni kvenna. Er af því tilefni unnið að skipulagningu hátíðarfundar nefndar Sameinuðu
þjóðanna sem fjallar um stöðu kvenna (Commission on the Status of Women, CSW) sem
haldinn verður í mars á næsta ári.
Íslendingar hafa ávallt lagt áherslu á réttindi kvenna á alþjóðavettvangi og árið 2003 vorum
við í fyrsta skipti kosin í nefnd Sameinuðu þjóðanna um stöðu kvenna (CSW). Ísland hefur
óneitanlega margt fram að færa á þessu sviði enda höfum við náð miklum árangri á síðustu
áratugum þótt enn sé ýmislegt eftir óunnið.
Með öflugri starfsemi hafa landssamtök UNIFEM á Íslandi haldið á lofti meginmarkmiðum
samtakanna og um leið og ég óska UNIFEM á Íslandi til hamingju á þessum tímamótum
vonast ég til að starfsemi samtakanna muni halda áfram að blómstra sem og gott samstarf þeirra
við utanríkisráðuneytið.
Halldór Ásgrímsson forsætisráðherra
U
N
IC
EF/ H
Q
02-0260/Am
i Vitale
Halldór Ásgrímsson
forsætisráðherra