Breiðfirðingur - 01.04.1987, Side 131

BREIÐFIRÐINGUR
129
Knutsen, sem árið áður hafði flutt þangað og fengið vellaun-
aða vinnu á skýjakljúfum þar. Síðan fór ég með danska skip-
inu Friðrik VIII. til Danmerkur. Heimsótti þar gamla vin
minn Kláus Pedersen og fleiri kunningja. Fór síðan með
Dronning Alexandrine til fslands. í Kaupmannahöfn hitti ég
gamlan skólabróður frá Núpi, Guðlaug Rósinkrans sem var
á leið til íslands í sömu erindum og ég. Urðum við samferða
heim og spjölluðum oft saman á leiðinni.
í Reykjavík var mjög erfitt að fá gistingu, enda átti ég
enga kunningja þar. Að endingu fékk ég þó gistingu á elli-
heimilinu Grund, sem var nýbyggt en hafði ekki verið tekið
í notkun. Var það nú notað sem gistihús meðan á Alþingis-
hátíðinni stóð.
Hátíðin á Pingvöllum er mér ógleymanleg. Ég var í tjaldi
með vini mínum Jóni S. Ólafssyni frá Króksfjarðarnesi. Það
var mjög kalt var í tjaldinu og skalf ég báðar næturnar. Ekki
var heldur svefnsamt, því glaumur og gleði ríkti um allt.
Seinni nóttina snjóaði og Kristján konungur sat í snjómugg-
unni meðan Sigurður Greipsson og félagar glímdu. Eftir að
upp stytti dunaði dansinn þangað til sólin gyllti Hengilinn.
Nú lá leiðin norður í Strandasýslu. Fyrsti áfangi var
norður að Reykjum í Hrútafirði. Farartækið var gamall
vörubíll með þremur trébekkjum á palli og þaki yfir af tjörg-
uðum striga. Var ég allur lurkum laminn eftir það ferðalag,
en ekki var þá völ á betri bifreið þar sem flestir bílar voru
uppteknir út af flutningum á Alþingishátíðina.
Ég gisti hjá Leó bróður mínum á Reykjum, en hann er
húsasmiður og var að vinna við byggingu héraðsskólans.
Flutti hann mig svo yfir Hrútafjörðinn að Borðeyri og lánaði
mér reiðhjólið sitt. Hjólaði ég frá Borðeyri út að Þambár-
völlum í Bitru, þar sem Magðalena systir mín og Markús
Kristjánsson maður hennar bjuggu myndarbúi. Dvaldi ég
hjá þeim nokkra daga og hvíldi mig, en áfram skal halda.
Næsti áfangastaður var Drangsnes við Steingrímsfjörð. Fékk
ég lánaða hesta og fylgdarmann og var reiddur norður að
Smáhömrum. Það var nýtt fyrir mig að koma á hestbak og