Breiðfirðingur - 01.05.2015, Qupperneq 26

BREIÐFIRÐINGUR26
samgöngubótum, bæði hvað varðar uppbyggingu og viðhald vega
innan héraðs og á vegtengingum við Snæfellsnes og Norðurland.
Fjar skiptasamband er víða slæmt, en gott fjarskiptasamband er einn
af lykilþáttunum hvað varðar ferðaþjónustu og búsetuval fólks. Ann-
að sem telja má að geti rýrt búsetuskilyrði í Dalabyggð er hár hús-
hitunarkostnaður, hátt vöruverð, fá tækifæri til framhaldsmenntunar og
oft á tíðum lítið framboð á húsnæði til leigu eða kaups.
Í Dalabyggð er friðsæld og nálægð við fjölbreytta náttúru og dýralíf.
Íbúar kunna almennt að meta byggðarlagið sitt og það mannlíf, umhverfi
og menningu sem þar er að finna. Fjölbreytt félagsstarf og afþreying er
í boði fyrir flesta aldurshópa og samtakamáttur er meðal íbúa þegar
á reynir. Samrekinn skóli er í Dalabyggð og er grunnskóladeildin að
jafnaði vel mönnuð kennurum með réttindi. Íbúar eru meðvitaðir um
að skapa sjálfir atvinnutækifæri fyrir sig og sína. Atvinnuleysi er lítið
og ágætt framboð er á almennri þjónustu. Margir sögufrægir staðir
eru í sveitarfélaginu og vaxtarmöguleikar eru til staðar hvað varðar
ferðaþjónustu, m.a. með tilkomu nýs vegar um Arnkötludal. Nálægð en
samt hæfileg fjarlægð frá höfuðborgarsvæðinu er kostur.
Framtíðarsýnin er sú að íbúar standi saman og líti á samfélagið
sem eina heild og með frumkvæði og framtaki þeirra, í samvinnu við
sveitarfélagið, takist að auka fjölbreytni atvinnulífsins. Nútíma fjar-
skipta samband þarf að komast á í öllu sveitarfélaginu innan skamms
tíma þar sem það eykur möguleika íbúa til náms og fjölgunar atvinnu-
tækifæra óháð búsetu. Efla þarf ferðaþjónustu og bjóða í auknum
mæli upp á afurðir úr héraði. Vinna þarf að því að skapa möguleika á
samfelldum vinnudegi fyrir börn á grunnskólaaldri í skóla-, tómstunda-
og íþróttastarfi. Áfram verði hvatt til að efla áhuga heimamanna á að
vinna að fegrun umhverfisins og að bæta umferðaröryggi í sveitar-
félaginu. Auka þarf samstarf við önnur sveitarfélög.