Breiðfirðingur - 01.05.2015, Blaðsíða 156

BREIÐFIRÐINGUR156
komum við að kirkjunni. Þar vék sér að mér María Gísladóttir frænka
mín og sagði: ,,Diddi minn, þú syngur nú með okkur í kórnum.“ Heldur
brá mér við þetta og maldaði í móinn. Þá sagði María: ,,Þú hlýtur að
geta sungið eins og hann Skafti frændi þinn og Hafsteinn bróðir þinn.“
Ég stóðst ekki þessi frýjunarorð og sló til enda hlaut kórinn að vera
nokkuð fjölmennur. Þegar upp á kórloftið kom voru þar fyrir tvær konur
og Gísli í Skáleyjum, faðir Maríu. Ég varð nánast skelfingu lostinn en
leit á sálmabókina og hvaða sálmar skyldu sungnir. Ég sá að lögin kunni
ég og hægðist þá um. Þegar athöfnin hófst uppveðraðist ég, tók á með
sönginn svo að vel reyndi á. Þegar athöfninni lauk vissi ég að konan
sem þarna var kvödd hét Septemborg Gunnlaugsdóttir. Á leiðinni til
skips tjáði María mér að kona nokkur hefði spurt sig hver var þessi ungi
maður sem söng svona óskaplega vel. Ég hef hvorki fyrr né síðar fengið
jafngóð ummæli fyrir söng og þarna. Það besta af öllu var svo þakklæti
móður minnar þegar ég sagðist hafa sungið yfir konu í Flatey sem
hafði heitið Septemborg Gunnlaugsdóttir. Þá sagði mamma mér að þær
hefðu þekkst vel og átt mikil bréfaskipti. Oftast voru það þakkarbréf
frá Septemborgu fyrir sitthvað smálegt sem mamma hafði sent henni,
blýanta, skrifblokkir eða annað smálegt sem Septu vanhagaði um. Var
mamma mér afar þakklát fyrir sönginn.
Um skaktúrinn fór svo að daginn eftir rerum við og um borð var
Stjáni í Ási, sonur hans, Þórður Friðjónsson sonur sýslumannsins og
undirritaður. Fór svo við uppgjörið að sonur Stjána átti mestan afla, ég
næstan, þá Þórður og loks Stjáni sem hafði fleira að gera en draga afla.
Kristinn Snæland er fæddur 1935 og er sannkallaður
þúsundþjalasmiður. Hann er rafvirki, hefur skrifað fjölda
blaðagreina og gefið út bækur. Hefur starfað víða, len-
gi stundað leiguakstur, verið sveitarstjóri, starfsmaður
stjórnmálaflokks. Hann er Breiðfirðingur að ætt eins og
fram kemur í frásögninni hér á undan. Þær frásagnir eru
góð spegilmynd af lífi fólks fyrir og um miðja síðustu
öld.