Fréttablaðið - 19.11.2021, Page 44

Sjöfn
Þórðardóttir
sjofn
@frettabladid.is
Ragna Ingimundardóttir
leirlistamaður býr yfir mikl-
um listrænum hæfileikum,
ekki bara í leirlistinni heldur
líka þegar kemur að bakstri
og matargerð.
Þegar líður að jólum kemur jóla-
barnið sterkt fram í henni og það
má með sanni segja að ástríðan
liggi í listrænni og skapandi vinnu,
hvort sem um ræðir á vinnu-
stofunni eða í eldhúsinu. Til að
mynda fær Ragna oft innblástur í
list sína þegar hún er í eldhúsinu
eitthvað að fást við mat.
Aðspurð segist Ragna vera jóla-
barn en þó hafi jólabarnið í henni
minnkað eftir að móðir hennar
féll frá fyrir nokkrum árum. „Mér
fannst alltaf allt best hjá mömmu,
hátíðarmaturinn, jólakræsing-
arnar, allt sem ég ólst upp við að
fá hjá mömmu fannst mér best
og finnst enn,“ segir Ragna, sem
saknar móður sinnar ekki hvað
síst í aðdraganda jólanna. Ragna
segist þó halda fast í jólahefðir
og siði móður sinnar, sem henni
þyki afar vænt um. „Við stórfjöl-
skyldan skerum út og steikjum
ávallt saman laufabrauð og
snæðum síðan saman kvöldverð á
eftir, oftar en ekki er það hangi-
kjöt sem við fáum okkur. Þetta er
siður sem við höfum haldið við,
sem mamma byrjaði með. Einnig
er randalínan hennar ömmu líka
bökuð á aðventunni, sem er aðeins
öðruvísi en þessi klassíska því við
setjum súkkulaðibita í kremið.“
Ragna segir þetta tvennt vera
ómissandi í jólaundirbúningnum.
„Þegar búið er að steikja laufa-
brauðið og baka randalínu geta
jólin komið.
Jólakræsingar fjölskyldunnar
Ragna segir stórfjölskylduna mjög
samheldna og borða saman um
hátíðirnar. „Á jólunum borðum
við alltaf villibráð: Gæs, sem
maðurinn minn, bróðir og mágur
veiða. Seinni árin höfum við verið
með kalkún því hópurinn hefur
stækkað mikið og hentar því vel
að vera með stærðarinnar kalkún
og jafnvel tvo.“
Þegar Ragna rifjar upp sínar
jólaminningar sem henni finnst
fallegar, er það fyrsta sem kemur
í huga hennar móðir hennar í eld-
húsinu að undirbúa jólamatinn.
„Ein minning er mér þó einkum
kær. Það var þegar mamma þurfti
einu sinni að vinna á aðfangadag
til klukkan sex en hún starfaði sem
sjúkraliði, þá tók ég að mér að elda
jólamatinn því við bjuggum í sama
húsi á sitt hvorri hæðinni. Ég eldaði
Leynijólaískakan í ár að dönskum hætti
Ragna er mikill
fagurkeri og
ástríða hennar
liggur í að skapa.
Keramikið
hennar nýtur
sín vel á há-
tíðarborðinu á
fallega flösku-
græna dúknum.
Rögnu tókst að fá leyniuppskriftina og hér er ískakan komin í jólabúninginn, borin fram á keramik-laufblaði eftir Rögnu þar sem jóla-
græni liturinn fangar augað. Ístertan lítur vel út á borðinu og er afar girnileg á að líta. FRÉTTABLAÐIÐ/SIGTRYGGUR ARI
Fallegur vasi
eftir Rögnu.
þetta kvöld kalkún eftir uppskrift
sem ég hafði fundið eftir Sigga
Hall, sem tókst svona ljómandi vel.
Þegar mamma kom heim klukkan
hálf sjö og sá að búið var að færa
jólahátíðarmatinn upp á stærðar
fat og dekka borðið með hátíðar-
brag var hún svo upprifin og glöð.
Hún sagði mér að þetta hefði verið
hennar fallegasta jólaminning,
að koma heim til fjölskyldunnar
og allt var tilbúið fyrir jólakvöld-
verðinn, hún var svo þakklát.“
Tókst að fá leyniuppskriftina af
ísnum í Danmörku
Í ár ætlar Ragna að vera með
ísköku í eftirrétt á jólunum,
sem hún hafði mikið fyrir að fá
uppskriftina af. „Þessa ísköku
smakkaði ég fyrir nokkrum árum
í brúðkaupi hjá vinahjónum í
Danmörku. Vinur hjónanna sá
um að baka hana og ég hef aldrei
smakkað jafn góða ísköku. Ég fór
strax á stjá og elti bakstursmeistar-
ann um allt til að fá uppskriftina
en hann sagði uppskriftina vera
leyniuppskrift, hann hefði fengið
hana frá mömmu sinni og aldrei
viljað gefa hana upp. Mér tókst að
múta honum og fá hann til að gefa
mér uppskriftina eftir dágóðan
tíma. Ég gaf honum það loforð
að þessi uppskrift færi til Íslands
og yrði einungis ljóstrað upp þar,
þess vegna tókst mér að fá upp-
skriftina,“ segir Ragna og brosir.
Þegar Ragna bakaði ískökuna í
fyrsta skipti segir hún að sú stund
hafi verið ógleymanleg, allir hafi
staðið á gati yfir hversu gómsæt
hún var. „Þetta var matarupplifun
sem allir muna eftir og gleyma
aldrei og ískakan slær ávallt í
gegn, enda sælkerakeimurinn af
henni einstakur.“
Ragna hefur mjög gaman af því
að baka fyrir veislur og stílisera
hátíðarborð með fallegu keramiki
sem passar vel við það sem boðið
er upp á. „Ég hef bakað í mörg ár,
bæði brúðartertur, afmælis- og
fermingartertur, ásamt konfekti og
alls konar brauði, bæði hefðbundið
og svo súrdeigsbrauð,“ segir Ragna,
sem finnst fátt skemmtilegra en
að bjóða upp á sælkerakræsingar
bornar fram á leirlistaverkum sem
hún hefur hannað og skapað.
Ragna deilir með lesendum
þessari leyniuppskrift að dönsku
ískökunni sem gestir hennar hafa
misst sig yfir og ekki getað hætt að
borða.
Dönsk ískaka
300 g möndlur, hýðislausar
200 g flórsykur
5 eggjahvítur
½ tsk. lyftiduft
Hitið ofninn í 190°C. Byrjið á því
að hakka möndlurnar í blandara.
Síðan er flórsykri og lyftidufti
blandað saman við möndlurnar.
Stífþeytið eggjahvíturnar og
blandið varlega saman við
möndluhræruna. Klæðið tvo
smurða botna á springformum, 25
sentimetra, með smjörpappír sem
stráð er á flórsykri. Hellið í formin
og bakið botnana við 190° í 20-25
mínútur. Fylgist vel með bakstr-
inum og tryggið að botnarnir
brenni ekki við.
Marsipanís
3 eggjarauður
50 g sykur
80 g marsípan
4 dl rjómi
Byrjið á því að þeyta eggjarauð-
urnar og sykurinn vel saman. Rifið
niður marsípanið og setjið út í
hræruna.
Loks er rjóminn þeyttur og settur
saman við.
Súkkulaðiís
3 stk. eggjarauður
50 g sykur
200 g Síríus suðusúkkulaði
4 dl rjómi
Byrjið á að þeyta eggjarauðurnar
ásamt sykri, rifið niður súkkulaðið
og hrærið út í. Þeytið rjómann og
blandið út í.
Kælið möndlubotnana eftir
bakstur og smyrjið með þunnu lagi
af brómberjamarmelaði eða ann-
arri góðri sultu.
Leggið annan botninn í spring-
form á disk. Setjið marsipanísinn
ofan á og síðan hinn botninn og
þar ofan á kemur súkkulaðiísinn.
Frystið yfir nótt, síðan er ískakan
látin standa í um það bil 25 mínút-
ur áður en hún er borin fram.
Skreytið ískökuna með smá
rjóma. Svo er gaman að hafa
jólalega umgjörð kringum fram-
reiðsluna. n
vfs.is
GEGGJUÐ
VERKFÆRA-
JÓLADAGATÖL
OG AÐVENTUGJAFIR
VERKFÆRASALAN • R E Y K J AV Í K • H A F N A R F I R Ð I • A K U R E Y R I • S : 5 6 0 8 8 8 8 • v fs . i s
19. nóvember 2021 jól 2021 24 fréttablaðið