Saga - 2012, Page 206

Dómar um hana eru allir á einn veg, lofsamlegir, og einkum er til
þess tekið að hún höfði til fleiri en fræðimanna án þess að slegið sé af
kröfum um vandvirkni í vinnubrögðum. Hóli um verkið er haldið
til haga á vefsíðu Sögufélags en ég stenst ekki mátið að vitna í dóm
Hjalta Hugasonar, prófessors í kirkjusögu:
Bók Steinunnar Kristjánsdóttur er engin venjuleg skýrsla að loknum
fornleifagreftri. Steinunn hefur skrifað læsilega sögu af klaustrinu
byggða á áþreifanlegum heimildum sem hún hefur sjálf grafið úr jörðu
með samstarfsfólki sínu auk ritheimilda. Í sögunni lesum við ekki
aðeins um það sem upp kom og samhengi þess. Við kynnumst líka
innri glímu fornleifafræðings sem lifir sig inn í fag sitt: spennunni sem
gerir vart við sig þegar eitthvað óvænt kemur upp á yfirborðið en líka
rödd samviskunnar sem vaknar þegar grafarró löngu látinna einstak-
linga er raskað. — Sagan af klaustrinu á Skriðu er falleg bók í mörgu til-
liti og öllum aðgengileg. Full ástæða er til að samgleðjast Steinunni með
árangurinn.
Starfsmannamál. Laust fyrir síðasta aðalfund var ráðinn nýr fram-
kvæmdastjóri Sögufélags, Ólöf Dagný Óskarsdóttir. Ólöf hefur verið
í hlutastarfi hjá Sögufélagi og jafnframt hjá Hinu íslenska bók-
menntafélagi þar sem hún hefur unnið með hléum um árabil. Ólöf
býr því að mikilli reynslu í útgáfumálum eins og komið hefur á dag-
inn það rúma ár sem hún hefur nú starfað fyrir Sögufélag. Hefur
hún reynst félaginu happafengur.
Húsnæðismál. Snemma á þessu ári ákvað stjórn Sögufélags að
leigja hús félagsins í Fischersundi bókaútgáfunni Sögum. Það forlag
flutti starfsemi sína þangað í mars og hefur verið þar síðan. Um leið
fluttist starfsemi Sögufélags í leiguhúsnæði Hins íslenska bók-
menntafélags í Skeifunni í Reykjavík. Með þessu móti tókst að
lækka daglegan rekstrarkostnað félagsins til muna án þess að þjón-
usta þess skertist. Bækur Sögufélags eru til sölu í hinu nýja aðsetri
og afgreiðsla er þar alla virka daga á skrifstofutíma. Þótt liðsmenn
Sögufélags eigi eflaust góðar minningar úr Fischersundi og sumum
félögum þyki breytingin ekki til framfara fallin hefur þess lítt eða
ekki orðið vart að hún hafi beinlínis mælst illa fyrir.
Fjármál. Rekstur Sögufélags er viðunandi. Félagið á húsið í
Fischersundi skuldlaust, heildarskuldir þess eru viðráðanlegar og
reksturinn í þokkalegu jafnvægi. Ljóst má þó vera að lítið má út af
bera og leita þarf leiða til að greiða útistandandi skuldir. Félagið
reiðir sig vitaskuld á aðildargjöld félagsmanna nú sem endranær.
af aðalfundi sögufélags 2011204
Saga haust 2012_Saga haust 2004 - NOTA 27.11.2012 10:47 Page 204