Bændablaðið - 16.12.2021, Side 36

Bændablaðið | Fimmtudagur 16. desember 202136
Geirmundur Valtýsson hefur
sungið fyrir þjóðina í 65 ár og þar
af með hljómsveit Geirmundar
Valtýssonar í 50 ár, eða hálfa öld.
Í tengslum við ritun bókar sinnar,
Guðni á ferð og flugi, heimsótti
Guðni Ágústsson, fyrrverandi
landbúnaðarráðherra, Geirmund
í sumar á Geirmundarstaði þar
sem hann rekur bú. Þar áttu þeir
hressilegt spjall líkt og lesa má í
bók Guðna.
Í máli Geirmundar kom fram
að hann vildi eignast hryssu undan
stóðhestinum Glaumi sem áður var
í hans eigu. Nú ætti hann enga meri
undan Glaumi. Geirmundur taldi
mikilvægt að Glaumsgenin kæmu
aftur heim. Guðna þótti við hæfi að
Skagfirðingar myndu heiðra söngva-
skáldið sitt. Þegar hann hélt sæll og
saddur frá Geirmundarstöðum hét
hann því að fá héraðsmenn í lið með
sér og gefa Geirmundi hryssu undan
Glaumi.
Kom sveiflukónginum
rækilega á óvart
Guðni sætti lagi í útgáfuhófi sem
hann hélt í Kakalaskála í Skagafirði
vegna útgáfu nýju bókarinnar.
Hann fékk sveiflukónginn til að
taka nokkur lög á nikkuna, en kom
honum síðan rækilega á óvart þegar
þeir feðgar, Bjarni Maronsson
og Kolbeinn sonur hans, leiddu
hryssuna Sóleyju frá Búðardal inn
á gólfið í Kakalaskála, en hryssan
er undan áðurnefndum Glaumi. Með
gjöfinni vildu vinir Geirmundar
þakka sveiflukónginum fyrir að hafa
haldið uppi fjöri hjá þjóðinni með
spili og söng öll þessi ár.
Í ávarpi sínu þakkaði Guðni
sérstaklega Mínervu Björnsdóttur,
eiginkonu Geirmundar, fyrir að
hafa gefið þjóðinni svo stóran
hlut í Geirmundi enda væri hann
flestar helgar af bæ þar sem hann
þeyttist um og skemmti landanum.
Nefndi Guðni einnig í ávarpinu að
Geirmundur hefði með blíðum söng
sínum leitt varir að vörum og vanga
að vanga hjá hinum ástföngnu, og
þúsundir hjónabanda hefðu orðið
til undir seiðandi tónlist söngva-
skáldsins.
Gleði og glaumur glumdu í
Kakalaskálanum og vísur flugu
óspart af vörum gesta. Ein varð þó til
daginn áður er séra Hjálmar Jónsson
lagði niður störf við að elta golfkúlu
á Spáni. Hann orti þetta þakklætis-
ljóð til Geirmundar sem Guðni flutti
í Kakalaskála:
Hann þreytist ei böll á að bruna,
bestur með harmonikkuna,
og hefur með drift
síðpilsum svipt
lengur en elstu menn muna.
Við hrífumst af hljómþýðum dyni
frá heiðruðum félaga og vini.
Hún er glæst, þessi höll.
Hér gleðjumst við öll
með Geirmundi Valtýssyni.
Það fer ekki á milli mála
að mæti hver einasta sála
því Guðni og Geiri
og gæðingar fleiri
nú skemmta í Kakalaskála.
Magnús Ólafsson frá Sveinsstöðum
í Húnaþingi flutti svo Geirmundi
svohljóðandi kveðju:
Ungur steigstu upp á svið.
Urðu dansar fleiri.
Ástir kvikna ólgum við,
enda rómó Geiri.
Ávallt fjörið er við völd,
atlot ná að beði.
Hartnær muntu í heila öld
halda uppi gleði.
Unaðsstundir þökkum þér,
því af Glaumsins kyni,
gæðahryssu gefum vér
Geira Valtýssyni.
Geirmundur var mjög glaður með
gjöfina og aðspurður sagði hann
nú á dögunum að Sóley yndi hag
sínum vel á Geirmundarstöðum en
þar reka þau hjónin bú og halda um
hundrað ær og nokkur hross. Magnús
Eiríksson tónlistarmaður sagði í
frægu lagi sínu að sérhver vegur að
heiman væri vegurinn heim. Ljóst
er því að ættbogi Glaums er kominn
aftur á Geirmundarstaði. /GRJ/HKR
LÍF&STARF
HURÐIR
Tunguháls 10, 110 Reykjavík, sími 567 3440, vagnar@vagnar.is, vagnar.is
• Stuttur afhendingartími
• Hágæða íslensk
framleiðsla
• Val um fjölda lita í
RAL-litakerfinu
• Vindstyrktar hurðir
Bílskúrs- og iðnaðarhurðir
Iðnaðarhurðir
Iðnaðarhurðir með gönguhurð
Bílskúrshurðir
Hurðir í trékarma
Tvískiptar hurðir
Smíðað eftir máli
Fyrsta flokks þjónusta og ráðgjöf
Guðni Ágústsson, fyrrverandi landbúnaðarráðherra, kom skagfirskum sveiflukóngi rækilega á óvart:
Vinir Geirmundar þökkuðu gleðigjafanum fyrir
áratuga spilamennsku með hryssunni Sóleyju
Ferðalag Guðna Ágústssonar um
sveitir landsins við að kynna nýja bók
sína, kveikti hugmynd að merkilegri
uppákomu í Kakalaskála. Þar var
sveiflukónginum Geirmundi Valtýs­
syni þakkað fyrir alla þá gleði sem
hann hefur veitt þjóðinni í gegnum
áratugina með spilamennsku sinni,
söng og samningu mikils fjölda
stuðlaga sem notið hafa gríðarlegra
vinsælda.
Guðni Ágústsson og Geirmundur Valtýsson í Kakalaskála með hryssuna Sóleyju frá Búðardal sem Guðni færði
sveiflukónginum að gjöf frá vinum hans. Mynd / Árni Gunnarsson
Óskum lesendum
gleðilegra jóla
og gæfuríks komandi árs
Kemur næst út 13. janúar