Morgunblaðið - 12.05.2022, Qupperneq 24

www.gilbert.is
GÆÐA ARMBANDSÚR
FYRIR DÖMUR OG HERRA
KLASSÍSK ÍSLENSK
24 FRÉTTIR
Innlent
MORGUNBLAÐIÐ FIMMTUDAGUR 12. MAÍ 2022
VIÐTAL
Helgi Bjarnason
helgi@mbl.is
Fyrsta húsið í nýrri íbúðahverfi í
Litla-Tunguskógi í Húsafelli í
Borgarfirði verður afhent eiganda
einhvern næstu daga. Um 30 smiðir
og aðrir iðnaðarmenn hafa verið að
byggja fyrstu 14 húsin í hverfinu og
verða áfram en framkvæmdir hafa
aðeins riðlast í vetur vegna veðurs,
kórónuveirufaraldursins og erf-
iðleika við að útvega efni vegna
stríðsins í Úkraínu.
Skipulags- og byggingarnefnd
Borgarbyggðar hefur lagt til við
sveitarstjórn að aðal- og deiliskipu-
lagi verið breytt þannig að 40 lóðir í
hverfinu verði skilgreindar sem
lóðir undir íbúðarhús í stað frí-
stundahúsa en 14 lóðir austast á
svæðinu verði áfram frístundalóðir.
Lagt er til að skipulagsbreytingin
verði auglýst.
Eigendur Húsafells byggja sjálf-
ir hús á þessum 40 lóðum og af-
henda kaupendum á ýmsum
byggingarstigum. Flest verða þó
afhent fullbúin. Búið er að selja
meginhluta húsanna. 14 lóðir aust-
ast á svæðinu eru seldar ein-
staklingum og verða hluti af frí-
stundabyggðinni í Húsafelli.
Bergþór Kristleifsson segir að
fyrstu húsin séu að verða tilbúin
fyrir innréttingar. Byrjað sé að
mála og einhver húsanna sem seld
eru á því byggingarstigi verði af-
hent á næstunni.
Erfitt að fá efni í byggingar
Hverfið byggist upp í áföngum.
Nú er verið að ganga frá fyrstu
fjórtán húsunum og verið að und-
irbúa næsta áfanga. Hermann Her-
mannsson byggingarstjóri segir að
einingarnar séu smíðaðar inni á
verkstæði í Húsafelli og síðan reist-
ar á steyptum undirstöðum og
gengið frá þeim á staðnum.
Hann segir að vonast hafi verið
eftir hagstæðu veðri til fram-
kvæmda í vetur, eins og verið hafi
síðustu árin. Veður hafi hins vegar
verið vond auk þess sem faraldur
og stríð hafi sett strik í reikning-
inn, eins og margar aðrar fram-
kvæmdir í landinu. Reynt hafi verið
að skrapa saman efni til að eiga nóg
því ekki sé vitað hvenær næsta
sending komi. Mesta röskunin hef-
ur orðið vegna seinkunar á afhend-
ingu glugga og hurða því erfitt er
að reisa hús nema vitað sé fyrir víst
hvenær gluggarnir koma. Her-
mann segir að það hafi skapað erf-
iðleika við skipulagningu vinnunn-
ar.
Hermann segir að ekki séu
margir að leita sér að vinnu um
þessar mundir en tekur fram að
gengið hafi þokkalega að manna
vinnuflokkana. Margir smiðir úr
Borgarfirði eru við verkið en einnig
hafa verið ráðnir menn frá öðrum
löndum.
Hann segir að kaupendur hafi
sýnt þessum aðstæðum skilning.
Þeir átti sig á því að verið sé að
gera allt sem hægt er til að halda
verkunum áfram.
Samhliða byggingu húsanna er
unnið að innviðum, svo sem lagn-
ingu vega, rafmagns, hitaveitu,
vatnsveitu og ljósleiðara. Mikið af
innviðunum er á vegum eigenda
jarðarinnar. Þeir framleiða raf-
magnið og reka veitur og ljósleið-
arakerfi.
Styrkir þann rekstur sem er
„Þetta gerir mikið fyrir Húsafell,
bæði þau 40 hús sem við reisum
sjálfir og 14 hús sem einstaklingar
byggja. Mér sýnist að við séum að
fá til okkar hóp af frábæru fólki.
Það styður við uppbyggingu inn-
viða og þarna kemur nýtt fólk inn í
mannlífsflóruna og styrkir þann
rekstur sem fyrir er, svo sem hótel,
verslun og golfvöll. Það eykur einn-
ig aðdráttarafl staðarins því eftir
því sem fleiri eru hér er auðveldara
að bæta utan á boltann,“ segir
Bergþór.
Húsin eru byggð samkvæmt
gildandi stöðlum fyrir íbúðarhús.
Eigendurnir geta flutt lögheimili
þangað, ef þeir svo kjósa, og notið
þeirrar þjónustu sem íbúar sveit-
arinnar fá. Telur Bergþór að ein-
hverjir muni dvelja meira þar en í
núverandi íbúðarhúsum sínum eða
flytji jafnvel alfarið í Húsafell.
200 sumarhús eru fyrir í Húsa-
felli og 20 eru í undirbúningi á
gamla svæðinu sem þá er að verða
uppselt. Með viðbótinni sem nú er
unnið að verða komin hátt í 300
hús. Áætla má að í þeim dvelji um
1.200 manns á vinsælustu helgum
sumarsins auk 100 gesta á Hótel
Húsafelli og 400-500 manns á tjald-
svæðum auk starfsmanna. Þá verð-
ur þetta orðin hátt í tvö þúsund
manna byggð um helgar á sumrin.
Vitaskuld eru færri í annan tíma,
sérstaklega að vetrinum.
Bjartsýnn um framhaldið
Auk framkvæmdanna við nýju
húsin er verið að endurnýja sund-
laugina. Það er ærið verkefni.
Bergþór er síðan með hugmyndir
um að stækka nýja hverfið og ein-
hvern tímann komi að því að hótelið
verði stækkað. Hann er einnig með
hugmyndir um frekari virkjanir.
Hann er allavega bjartsýnn á
framhaldið. „Það er allt að fara í
gang eftir faraldurinn. Mig grunar
að sumarið verði betra en margir
hafa haldið,“ segir Bergþór.
Nærri tvö þúsund manna byggð
- Íbúðabyggð rís í Húsafelli og sumarhúsahverfin stækka - Verið að ganga frá fyrstu íbúðarhús-
unum fyrir afhendingu - Um 300 hús verða komin á næstu árum - Um 30 iðnaðarmenn að störfum
Morgunblaðið/Helgi Bjarnason
Íbúðarhús Fjörutíu vegleg einbýlishús af ýmsum stærðum og gerðum verða í fallegu umhverfi á Hraunlóðunum í Litla-Tunguskógi í Húsafelli.
Uppbygging Mikið mæðir á þeim Bergþóri Kristleifssyni, eiganda Húsa-
fells, og Hermanns Hermannssonar byggingarstjóra við framkvæmdirnar.
Kapp Góður gangur er í byggingarframkvæmdum og erfiðleikar vegna
veðurs, kórónuveirufaraldurs og stríðs í Úkraínu hafa verið yfirstignir.