Frjáls verslun - 01.03.2005, Síða 55

F R J Á L S V E R S L U N • 3 . T B L . 2 0 0 5 55
...ÞEGAR ÉG HEF ...ÞÁ ÆTLA ÉG...
Markmið og sjálfsagi
Varðandi markmiðin er mikilvægt að hafa í huga nokkur atriði
sem auka líkurnar á að þau náist. Í fyrsta lagi þarf að spyrja
sig: Er þetta mitt markmið? Síðan að velta fyrir sér: Eru þær
aðgerðir sem ég geri í dag í samræmi við
markmið mín til lengri tíma? Get ég séð
það fyrir mér í huganum að ég nái þessu
markmiði? Reynslan hefur sýnt að við að
skrifa markmiðin niður á blað verða þau
skýrari, þau fá meira vægi og líkurnar á að
þau náist aukast til muna.
Tímastjórnun snýst að mörgu leyti um
okkar eigin viðhorf. Höfum við þá trú að
við höfum stjórn á eigin lífi? Getum við
sýnt sjálfsaga? Trúum við því að við getum
sjálf haft áhrif á það sem gerist í lífi okkar
og trúum við á að það sé alltaf tími fyrir
mikilvæg atriði? Við verðum alltaf að byrja
á því að líta í eigin barm og skoða hver
okkar eigin viðhorf eru.
Tíminn er núna!
Ef þú vilt ná árangri í hverju sem er þá er
tíminn NÚNA, ekki á morgun, ekki í næstu
viku, ekki seinna! Öflugasta leiðin til aukins árangurs, til þess
að líða betur og styrkjast er að yfirstíga óttann og framkvæma.
Við gerum öll eitthvað á leiðinni sem við teljum mistök, en þá
er bara að fyrirgefa okkur þau, læra af þeim og halda áfram.
Hvort við upplifum okkur sem fórnarlömb í eigin aðstæðum
eða tökum skrefið og gerumst stjórnendur í eigin lífi er okkar
ákvörðun. Ef við höfum trú á okkur sjálf, þá munu aðrir gera
það líka.
Að koma sér á framfæri
Mjög mikilvægt er að fólk geri sér grein fyrir hvernig það
virkar í samskiptum og hvernig það hefur áhrif. Hvaða atriði
eru það sem hafa áhrif við að byggja upp eigin ímynd? Hvernig
virkum við þegar við komum fram, höldum ræðu og hvað
þarf að hafa í huga við framkomu í fjölmiðlum? Allt eru
þetta þættir sem skipta töluverðu máli - sérstaklega í
þeim tilvikum þegar atvinnurekendur, viðskiptavinir eða
einhverjir þeir sem hafa áhrif á það hvert viðkomandi
stefnir í sínum starfsframa eru kaupendurnir.
Sumir hafa áhyggjur af því að vera of ákafir og bókstaflega
vinna gegn sér með of mikilli „sölumennsku“. Vissulega er
ákveðin hætta á því, sérstaklega í umhverfi sem maður þekkir
illa. Einnig ef menn tileinka sér í einhverjum mæli að „selja“
eitthvað sem engin innistæða er fyrir. Um
leið og það gerist og menn standa ekki
undir væntingum sem til þeirra eru gerðar
þá er búið að rjúfa ákveðið traust sem
getur verið erfitt að byggja upp aftur.
Að fara á flug
Nýjar hugmyndir, nýjar leiðir og ný
hugsun. Hvernig má nota hana í viðskipta-
lífinu? Hvernig má nota skapandi hugsun
á fundum til að leita uppi góðar hugmyndir
og snjallar lausnir? Það er hæglega hægt
að sækja sér innblástur í viðskiptum úr
listum og ekki síst lífinu sjálfu. Það kostar
ekkert að láta sér detta eitthvað í
hug. Þetta þýðir að hægt er að
stækka sjóndeildarhringinn
verulega með því einu að
gefa sér tíma til að hugsa
og fá hugmyndir.
Hver er sinnar gæfu smiður
Það er ekki nóg nú til dags að standa sig í
vinnunni. Það ert þú sem þekkir sjálfa(n)
þig best. Það er undir þér komið að virkja þá
hæfileika, núna strax, og koma þeim á fram-
færi þar sem það skiptir máli. Þannig kemst þú
á flug, þannig geturðu náð þeim árangri í starfi
sem þig dreymir um.
S T J Ó R N U N
Greinarhöfundur,
Hildur Elín Vignir.
Mynd: Geir Ólafsson.
HEFURÐU SJÁLFSTRAUST TIL
AÐ KOMA ÞÉR Á FRAMFÆRI?
Það er ekki nóg að vera framúr-
skarandi starfsmaður bak við
tjöldin, við þurfum að vera tilbúin
að stíga skrefinu lengra og þora
að gera árangur okkar sýnilegan.
ÞÚ ÞARFT:
• Aukinn skilning á hegðun
þinni og hvernig hún hefur
áhrif á fólk.
• Færni í árangursríkri hugsun.
• Aukna trú á eigin getu.
• Öryggi í að koma hugmyndum
þínum á framfæri.
• Bætta stjórn á tíma þínum
og streitu.
• Betra tengslanet.