Morgunblaðið - 11.03.2001, Qupperneq 22

22 SUNNUDAGUR 11. MARS 2001 MORGUNBLAÐIÐ
Malarhöfða 2A, 112 Reykjavík
Sími: 354 587 1565 Fax: 354 567 1415
Golfbílar
Þeir golfleikarar sem hafa hug á að eignast
golfbíl fyrir næsta golftímabil vinsamlegast
látið vita fljótlega þar sem erfitt getur verið
að útvega bensínbíla á viðráðanlegu verði.
Bjóðum nú 1997 og 1998 módel.
Stórleikur
Grótta KR – Afturelding
sunnudaginn 11. mars kl. 20
Tryggir Grótta KR sér heimaleikjaréttinn
í úrslitakeppninni? Eða mun Afturelding
skjótast þar framúr?
Þorir þú að mæta því það verður
heitt í kolunum!
ÍBÚAÞING Vestur-Skaftfellinga
stóð yfir 5.–8. mars og lauk í
Tunguseli með kynningu á niður-
stöðum þingsins fyrir fullu húsi.
Þingið fór fram á tveimur stöðum,
í Vík í Mýrdal og á Kirkjubæj-
arklaustri. Þátttakendur voru 259
íbúar sýslunnar á öllum aldri, sem
settu fram 2.000 athugasemdir og
ábendingar um málefni sem snúa
að íbúum og búsetu í sveitarfélög-
unum. Niðurstöðum þingsins verð-
ur fylgt eftir með fundum í Vík 10.
apríl og á Kirkjubæjarklaustri 11.
apríl.
Íbúaþingið er liður í byggðaþró-
unarverkefni Vestur-Skaftafells-
sýslu. Stjórn verkefnisins fékk Sig-
urborgu Kr. Hannesdóttur
ráðgjafa til liðs við sig og stjórnaði
hún þinginu. Sigurborg beitir
þeirri aðferð að láta þátttakendur
tjá hug sinn á gula miða sem síðan
eru flokkaðir eftir efni athuga-
semdanna. Fyrir þingið var unnið
með börnum í grunnskólunum og
fólki í félagasamtökum og stofn-
unum í eigu sveitarfélaganna
ásamt því að hreppsnefndir beggja
hreppanna, Mýrdalshrepps og
Skaftárhrepps, áttu sameiginlegan
vinnudag. Þetta leiddi til mikillar
virkni íbúanna sem sýndu verkefn-
inu mikinn áhuga og að þinginu
loknu komu fram skýrar línur í
sameiginlegum hugðarefnum og
áherslum fólksins.
Íbúar beggja hreppanna höfðu
áhyggjur af atvinnumálum, lífsaf-
komu og fólksfækkun. Deilt var á
stjórnvöld fyrir fækkun opinberra
starfa í hreppunum. Bent var á að
erfitt væri að halda uppi fjöl-
breyttri atvinnu vegna fámennis.
Nauðsynlegt væri að efla atvinnu-
lífið og styðja þá vaxtarbrodda
sem kæmu fram. Á einum mið-
anum stóð: „Standa við bakið á
þeim sem þora,“ en margir miðar
með álíka ábendingum komu fram.
Í Mýrdalshreppi var óskað eftir
stefnumörkun í umhverfismálum
og náttúruvernd. Bent var á marg-
víslega möguleika til orkuvinnslu,
s.s. vindorku og að lagfæra þyrfti
aðgengi að náttúruperlum, svo
eitthvað sé nefnt.
Í Skaftárhreppi komu fram
áhyggjur af sandfoki, uppblæstri
og eyðingu lands. Vegamál væru í
ólestri og umferðarþungi af fjall-
vegum vanmetinn. Bent var á
nauðsyn þess að brúa Skaftá og
afla fjár til að leita að heitu vatni.
Þá var bent á þann möguleika að
stofna þjóðgarð í Skaftárhreppi.
Þar komu og fram ábendingar
um eflingu félagslífs og að félags-
miðstöð vantaði fyrir unglinga.
Auka þyrfti skilning milli sveit-
anna og þéttbýlisins. Bent var á að
íbúarnir sneru bökum saman og
töluðu á jákvæðan hátt um sveit-
arfélagið sitt. Í Mýrdalshreppi
hafði fólk áhyggjur af hækkandi
hlutfalli sumarbyggðar og lýst var
eftir aukinni afþreyingu fyrir ung-
linga. Of mikið væri um svartsýni
og vantrú á sóknarmöguleika.
Kynna þyrfti sveitarfélagið betur
útávið.
Börn og unglingar
tóku virkan þátt
Sjónarmið barna og unglinga
komu vel fram á þinginu. Ungling-
unum finnst peningum ekki varið í
rétta hluti. Þeim finnst of fátt fólk
vera eftir í sveitarfélaginu og vilja
ekki að íbúðarhús og sveitabæir
verði að sumarbústöðum. Þeir vilja
betri vegi, fleiri verslanir og kalla
eftir fjölbreyttari afþreyingu,
auknu félagslífi og félagsmiðstöðv-
um. Sundlaug, íþróttahús og körfu-
boltavellir eru á óskalistanum hjá
unglingunum. Þá vilja þeir betra
GSM-samband og fleiri sjónvarps-
rásir. Einnig hvetja þeir fullorðna
til barneigna til að fjölga í sýsl-
unni.
Rödd barnanna hljómaði einnig
á þinginu. Á gulu miðunum þeirra
bentu þau m.a. á að skóladagurinn
væri of langur og sumarfríið of
stutt. Fleiri tölvur vantaði í
skólana og tölvustofurnar mættu
vera opnar lengur yfir daginn.
Nýtt íþróttahús og sundlaug er á
óskalista og að skólinn verði mál-
aður. Þeim finnst krakkar of fáir
en þeir séu skemmtilegir og að nóg
pláss sé fyrir alla. Þeir vilja að all-
ir séu góðir við alla og engin
stríðni verði til.
Þróa þarf samstarf sveit-
arstjórna og íbúa
Á lokadegi þingsins fór Sigur-
borg Kr. Hannesdóttir yfir vinn-
una sem lögð var af mörkum og
leiddi þinggesti um þau svið sem
fjallað var um á þinginu. Hún sagði
íbúaþingin hafa leitt í ljós að íbúar
sýslunnar beri hag byggðarlagsins
mjög fyrir brjósti enda um að
ræða samfélag fólks sem hefði yfir
að búa mjög mikilli reynslu og
visku. „Þegar kemur að því að taka
ákvarðanir sem varða heill sam-
félagsins til framtíðar er dýrmætt
að leita í þennan sjóð en þannig
fást oft bestu lausnirnar,“ sagði
Sigurborg.
Hún sagði að komið hefði fram
að fólk í báðum hreppum ætti mik-
ið sameiginlegt og áherslur væru
mjög svipaðar á báðum stöðum, þó
hefðu komið fram atriði sem ein-
kenndu hvorn stað fyrir sig. „Það
er svo að þegar á brattann er að
sækja munu þeir hæfustu lifa, það
er að segja, hæfustu sveitarfélögin.
Á þinginu komu fram skýr skila-
boð um að opin og jákvæð viðhorf
eru nauðsynleg. Við þurfum til
dæmis að að þora að sleppa hend-
inni af unga fólkinu þótt það vilji
fara í burtu en þurfum einnig að
byggja samfélagið þannig upp að
það vilji koma til baka. Öflugt at-
vinnulíf, hrein náttúra og gott
mannlíf eru meginniðurstöðurnar í
áherslum fólksins,“ sagði Sigur-
borg. Hún sagði einnig að mik-
ilvægt væri nú að þróa samstarf
milli sveitarstjórnanna og þeirra
íbúa sem vildu starfa áfram að
verkefninu.
„Þetta er langtímaverkefni sem
þarf að vinna í mjög miklu og nánu
samstarfi íbúa og sveitarstjórna.
Sveitarstjórnirnar þurfa að hafa
frumkvæði og leggja línur um
hvernig framhaldið verður. Mér
finnst viðfangsefnið snúast um
mannlega þáttinn og innri sam-
stöðu íbúanna. Aðstæður hér í
sýslunni eru meira krefjandi en í
þéttbýlinu. Þetta er vegna þess að
það eru svo fáir sem búa hér og
eru til staðar til að takast á við
verkefnið,“ sagði Sigurborg.
Fólk er tilbúið
„Ég er mjög ánægður með verk-
efnið og þátttöku íbúanna á báðum
stöðum. Þetta segir manni að íbú-
unum sé ekki sama um sitt sam-
félag. Ég geri mér vonir um að
þetta skili miklu og er reyndar
sannfærður um það. Þátttakan
sýnir að fólk er tilbúið að koma að
frekari vinnu í þessum málefnum,“
sagði Hafsteinn Jóhannsson, sveit-
arstjóri í Mýrdalshreppi. „Þetta er
mikilvægt innlegg í þá viðleitni að
þróa þessi samfélög og styrkja.
Þessi aðferð kallar eftir fólki að
það komi áherslum sínum til skila
og getur nýst til áframhaldandi
vinnu bæði íbúa og sveitarstjórna.
Ég lít svo á að þetta sé upphafið að
frekari vinnu til árangurs og að
fólk sé tilbúið að takast á við að
þróa samfélagið og styrkja það á
öllum sviðum. Þetta sýnir vilja og
væntingar, bæði inn á við og út á
við,“ sagði Helga Þorbergsdóttir,
oddviti Mýrdalshrepps.
Íbúarnir eru
meðvitaðir
Ólafía Jakobsdóttir, sveitarstjóri
í Skaftárhreppi, sagði þessa vinnu
myndu nýtast á annan hátt en í
venjulegum byggðaverkefnum.
„Íbúarnir eru meðvitaðir í þessu
verki og ég held að þetta auki þeim
bjartsýni og kraft. Eftirfylgnin er
svo komin undir sveitarstjórnun-
um. Ég held að fólk sé tilbúið að
halda áfram að starfa að málefnum
samfélagsins og þeim áherslum
sem komu fram. Ég hef áhuga á að
tengja viðhorf sjálfbærrar þróunar
inn í þessa umræðu,“ sagði Ólafía.
Árni Jón Eiríksson, oddviti
Skaftárhrepps, sagði verkefnið
vera gott samfélagslegt frum-
kvæði. Kjarninn er sá að íbúunum
er gefinn óheftur möguleiki til að
tjá sig um málefni sem brenna á
þeim. „Þetta skerpir áherslurnar,“
sagði Árni Jón.
Að lokinni kynningu á niðurstöð-
um mynduðu þinggestir hring og
sungu saman. Síðan var boðið upp
á kaffi og meðlæti og þinggestir
skrifuðu sig á lista yfir þá sem
vilja starfa áfram að verkefninu.
Góður tónn var í fólki og greinilegt
að mikil samstaða var um að halda
áfram með verkefnavinnuna til
þess að efla samfélagið með það að
markmiði að ná árangri og bæta
samfélagið. Íbúar í Vestur-Skafta-
fellssýslu eru vel sér meðvitandi
um fámennið en hafa greinilega
staðfestu til þess að takast á við
það verkefni að halda vel utan um
samfélag sitt. Á einum gula mið-
anum stóð þessi samstöðuábend-
ing: „Við erum og verðum einn
hreppur, erum ekki fleiri en af-
komendur einnar langömmu.“
Góð þátttaka og eindrægni á íbúaþingi Vestur-Skaftafellssýslu
Bera hag byggðarlags-
ins mjög fyrir brjósti
Morgunblaðið/Sigurður Jónsson
Húsfyllir var á íbúaþinginu og fjölmargir íbúar Vestur-Skaftafellssýslu
tóku til máls um málefni sem snerta byggðarlagið.
Vestur-Skaftfellingar sýndu íbúaþingi mik-
inn áhuga og þar komu fram skýrar línur
um áherslur fólksins. Áhyggjurnar snúa að-
allega að atvinnumálum, lífsafkomu og
fólksfækkun. Sigurður Jónsson fylgdist
með umræðum á íbúaþinginu.
Morgunblaðið/Jónas Erlendsson
Sveitarstjórarnir Hafsteinn Jóhannesson í Vík og Ólafía Jakobsdóttir í
Skaftárhreppi fengu hamra í lok íbúaþingsins til að byggja brýr.