Morgunblaðið - 29.06.2002, Page 52

HUNDAR
52 LAUGARDAGUR 29. JÚNÍ 2002 MORGUNBLAÐIÐ
ÞÝSKA fjárhundatíkin Gunnars-
holts-Baroness var valin besti
hundur árlegrar sumarsýningar
Hundaræktarfélags Íslands um
síðustu helgi. Er þetta annað
skiptið í röð sem Baroness vinnur
þennan titil, en hún er í eigu rækt-
anda síns, Hjördísar H. Ágústs-
dóttur.
Í öðru sæti var boxer-tíkin
Bjarkeyjar-Saga, í þriðja sæti
golden retriever-tíkin Íslands-
Nollar-Helma Hlíf og í fjórða sæti
japanskur chin-hundur að nafni
Homerbrent Kokuo.
Á sýningunni var jafnframt val-
inn besti hvolpurinn, tík af pug-
kyni sem heitir Pugwamps Eleg-
anza. Besti öldungur sýningar var
Tíbet spaniel-hundurinn Nalinas
Tabanus, en í öldungaflokki eru
hundar sem orðnir eru sjö ára eða
eldri.
Besti ræktunarhópur sýningar
samanstóð af fjórum boxer-hund-
um úr Bjarkeyjarræktun, sem
Inga Björk Gunnarsdóttir á heið-
urinn af. Inga ræktar einnig enska
cocker spaniel-hunda og sýndi af-
kvæmahóp, sem var líka verðlaun-
aður sem besti afkvæmahópur
sýningar.
Barna- og unglingastarf Hunda-
ræktarfélags Íslands hefur eflst
mikið á síðustu árum og á sýn-
ingum félagsins keppa börn og
unglingar um titilinn „Besti ungi
sýnandinn“. Þar reynir aðallega á
samskipti barns og hunds og tækni
við að sýna hund sem allra best.
Hlutskörpust í eldri flokki var
Helga Dögg Snorradóttir, sem
sýndi cavalier King Charles span-
iel-hundinn Gæða-Jörfa. Í yngri
flokki var Sunna Rós Agnarsdóttir
með Tanmerak Lloyd George af
sama hundakyni.
Glæsileg sýning og
mikil fagmennska
Á sumarsýningunni voru sýndir
um 200 hundar af 43 tegundum og
var whippet-hundur nú sýndur í
fyrsta sinn hér á landi.
Til að dæma hundana komu þeir
Kari Järvinen frá Finnlandi og
Anders Cederström frá Svíþjóð.
Báðir hafa áratuga reynslu á sínu
sviði og kváðust afar hrifnir af
skipulagi sýningarinnar og fagleg-
um vinnubrögðum starfsfólks.
„Hundaræktarfélög annars stað-
ar á Norðurlöndunum ættu að fá
sýningarstjóra héðan til þess að
skipuleggja fyrir sig sýningar og
kenna mönnum að halda glæsileg-
ar hundasýningar,“ sagði Anders
Cederström. Hann hefur komið
hingað til lands tvisvar áður til að
dæma á hundasýningum, fyrst fyr-
ir 20 árum. Hann segir mikið vatn
hafa runnið til sjávar í hundarækt
á þessum tveimur áratugum. „Ís-
lendingar eru almennt á réttri leið,
en þó finnst mér rétt að benda á
mikilvægi þess að huga að því að
stærð hunda fari ekki úr bönd-
unum og jafnframt að almennt
heilsufar og geðslag sé gott. Tann-
leysi hrjáir hunda af sumum teg-
undum og að því þarf að gæta þeg-
ar valdir eru hundar til ræktunar.“
Starfsbróðir hans frá Finnlandi,
Kari Järvinen, var í fyrstu heim-
sókn sinni til Íslands og sagðist
hafa gert ráð fyrir að hundar hér
væru misjafnari að gæðum en
raun bar vitni. „Það kom mér
þægilega á óvart hversu marga
fallega hunda ég sá hér. Sérstak-
lega var ég hrifinn af þýska fjár-
hundinum sem var í 1. sæti. Hún
er falleg, vel byggð og þar af leið-
andi með glæsilegar hreyfingar.
Hið sama má segja um boxer-tík-
ina sem var í öðru sæti. Þær báru
af öðrum hundum og ég mæli með
áframhaldandi ræktun á sömu nót-
um. Hins vegar mæli ég ekki með
að dobermann og rottweiler-
hundar sem sýndir voru verði not-
aðir í ræktun og ekki heldur þeir
cavalier King Charles spaniel-
hundar sem eru of stórir og hafa
gróft höfuð.“
Um unga sýnendur sögðu dóm-
ararnir að þar væri á ferð hópur
barna og unglinga sem greinilega
væri mjög fær, vel að sér og vel
þjálfaður en unga fólkið þyrfti þó
að gæta sín á að verða ekki til-
gerðarlegt við sýningu á hundum.
Sumarsýning Hundaræktarfélags Íslands:
Þýskur
fjárhundur
í 1. sæti
Besti öldungur sýningar var þessi Tíbet spaniel-hund-
ur, sem heitir Nalinas Tabanus og er hér ásamt eig-
anda sínum, Valgerði Júlíusdóttur.
Pug-tíkin Pugwamps Eleganza var valin besti
hvolpur sýningar. Hún sést hér ásamt eiganda sín-
um, Hönnu Björk Kristinsdóttur.
Tveir cavalier King Charles spaniel-hundar spá í
heimsmálin og eigendur fylgjast andaktugir með.
Whippet-hundur var nú sýndur í
fyrsta sinn á Íslandi. Þessi tík
heitir Siprex Klara og náði góð-
um árangri á sýningunni.
Gunnarsholts-Baroness var besti hundur sýningar. Hún er hér
ásamt eiganda sínum og ræktanda, Hjördísi H. Ágústsdóttur, en
þær vermdu einnig fyrsta sætið á vorsýningu félagsins.
Lítill japanskur chin-hundur virðist býsna ánægður
með álit dómara og bikarinn sem hann fékk að launum.
Sumir fögnuðu áfanga-
sigrum með miklum til-
þrifum, eins og boxer-
tíkin Bjarkeyjar-Saga,
þegar hún varð íslenskur
meistari. Hún varð síðan
í öðru sæti yfir bestu
hunda sýningar.
Morgunblaðið/Jón Svavarsson
Besti ræktunarhópur sýningar samanstóð af þessum fjórum boxer-hundum úr Bjarkeyjarræktun.
Inga Björk Gunnarsdóttir ræktandi er önnur frá hægri.
Dómararnir Kari Järvinen og Anders Cederström
kampakátir í lok sýningar. Þeir skoðuðu og dæmdu
yfir 200 hunda um helgina.
Yorkshire terrier-hundar þykja
mikið augnayndi, einkum ef þeir
hafa síðan feld eins og þessi.