Morgunblaðið - 08.10.2004, Síða 11

MORGUNBLAÐIÐ FÖSTUDAGUR 8. OKTÓBER 2004 11
FRÉTTIR
Sími: 568-1626
www.stasia.is
Full búð af nyjum og
glæsilegum haustvörum!
Stærðir 36-56
,
„UMRÆÐAN um erlendar fjárfest-
ingar í íslenzkum sjávarútvegi er
bæði tímabær og þörf. Alþjóðavæðing
og vaxandi samkeppni um fjármagn,
vinnuafl og viðskiptavini kallar á um-
ræðu um stöðu og starfsskilyrði ís-
lenzks sjávarútvegs, bæði á hinum
pólitíska vettvangi og innan greinar-
innar,“ segir Jón Þórisson, aðstoðar-
forstjóri Íslandsbanka.
Þessi skoðun Jóns kom fram í er-
indi sem hann hélt á fundi með for-
ystumönnum í eyfirzku athafnalífi í
gær. Þar ræddi Jón meðal annars við-
skipti Íslandsbanka við sjávarútveg-
inn og sagði að bankinn hefði sér-
þekkingu í sjávarútvegi og legði mikið
upp úr samstarfi við innlend og er-
lend fyrirtæki.
Hann benti á að bankinn væri að
sækja inn í norskan sjávarútveg, en
útrás hans í sjávarútvegi hefði hafizt í
Kanada. Nú væri Íslandsbanki í sam-
starfi við sjávarútvegsfyrirtæki um
allan heim og nefndi hann sérstaklega
Kanada, Bandaríkin, Chile og Nýja-
Sjáland, en það væru allt lönd með
ábyrga fiskveiðistjórnun eins og Ís-
land.
Jón sagði að styrkleiki íslenzks
sjávarútvegs fælist í kvótakerfinu,
mikilli hagkvæmni, mikilvægi hans
fyrir efnahagslífið í heild og frum-
kvæði í atvinnugreininni. Veikleik-
arnir væru á hinn bóginn atgervis-
flótti, pólitísk óvissa eða óeining,
takmarkanir á eignarhaldi og kvóta-
eign, lítill áhugi fjárfesta og miklar
ytri sveiflur, sem sköpuðust af verði á
olíu og afurðum, gengisbreytingum
og sveiflum í afla.
Sífellt stærri fyrirtæki
Hann benti á að fyrirtækin væru sí-
fellt að verða stærri og stærri, bæði
hér heima og erlendis og öflugar ein-
ingar hér heima fyrir þyrfti til að eiga
viðskipti við hina risastóru viðskipta-
vini úti í heimi. Hins vegar takmark-
aði kvótaþakið vöxt fyrirtækjanna,
þrátt fyrir að hið alþjóðlega viðskipta-
umhverfi kallaði stöðugt á stærri ein-
ingar, sem nýttu fjármagn betur,
nytu meiri hagnaðar, gætu verið með
stöðugt framboð og uppfyllt auknar
kröfur viðskiptavina um gæði, áreið-
anleika og rekjanleika. Allt þetta
leiddi til þess að fyrirtækin þyrftu að
stækka en kvótaþakið og bann við er-
lendum fjárfestingum í íslenzkum
sjávarútvegi hömluðu vextinum.
Hann benti á þá þversögn að hér
væri bann við fjárfestingum útlend-
inga í útveginum, en Íslendingar fjár-
festu á hinn bóginn víða í erlendum
sjávarútvegsfyrirtækjum. Ísland
væri til dæmis eitt örfárra landa sem
bönnuðu með öllu erlenda fjárfest-
ingu í fiskvinnslu, þótt óbein eignar-
aðild væri leyfileg.
Jón sagði að vaxandi stuðningur
væri við að leyfa erlenda fjárfestingu í
íslenzkum sjávarútvegi, eins og fram
hefði komið hjá Halldóri Ásgríms-
syni, forsætisráðherra og Finnboga
Jónssyni, stjórnarformanni Sam-
herja. Því væri full þörf á því að ræða
af alvöru möguleikana á því að leyfa
slíkar fjárfestingar, hve miklar þær
til dæmis mættu vera og hvaða áhrif
þær gætu haft, bæði til góðs eða ills.
Tímabært að ræða
erlendar fjárfestingar





 
 


 


  
 
 

   ENGAN sakaði þegar eldur kviknaði
í einbýlishúsi við Tjarnargötu í Vest-
mannaeyjum á tíunda tímanum á mið-
vikudagskvöld. Íbúar urðu eldsins
varir og komust út án vandræða. Eld-
urinn kviknaði á efri hæð hússins og
hafði ekki náð að breiðast út þegar
slökkvilið kom á vettvang.
Allt tiltækt lið slökkviliðsins í Vest-
mannaeyjum var kallað að húsinu, en
að sögn Ragnars Þórs Baldvinssonar
slökkviliðsstjóra var talsverður reyk-
ur en fremur lítill eldur þegar að var
komið. Greiðlega gekk að slökkva eld-
inn, en rjúfa þurfti þak við reykháfinn
til að hleypa út reyk og hita. Tals-
verðar skemmdir urðu á efri hæð
hússins og þaki vegna bruna og
slökkvistarfs.
Eldurinn kviknaði út frá reykröri
sem leiddi reyk frá kamínu út um
reykháf hússins. Kamínan stóð á efri
hæð hússins, en efri hæðin er úr
timbri. Þetta er annar bruninn í Vest-
mannaeyjum á nokkrum mánuðum
þar sem kviknar í út frá kamínu.
Geta valdið hættu
Ragnar segir að mikil hætta getur
skapast út frá kamínum sé frágangur
á reykrörum ekki nægjanlega góður,
og brýnir fyrir fólki sem setur upp
kamínu að tryggja að reykrörið sé
nægilega vel einangrað og frágangur
allur góður þegar slík rör eru lögð í
hús.
Ragnar segir erfitt fyrir fólk að at-
huga ástandið þegar búið sé að leggja
rör fyrir reykinn í þak húsa, en segir
fólk verða að fylgjast vel með þegar
kamínur eða önnur opin eldstæði eru í
notkun.
Ljósmynd/Eyjafréttir
Slökkvilið þurfti að rjúfa þak til að hleypa út reyk og hita.
Kviknaði í út frá kamínu
SKÁKSAMBAND Íslands kynnti
nýja, metnaðarfulla og róttæka
stefnu sambandsins í gær, en
stefnan ber heitið „Finnur Fjórir“
og felur í sér fjögur F eða fjögur
framtíðarmarkmið sambandsins.
Guðfríður Lilja Grétarsdóttir,
fyrsti kvenforseti Skáksambands
Íslands, kynnti stefnuna á blaða-
mannafundi í gær og opnaði um
leið sérstaka Ólympíuhátíð Skák-
sambandsins 2004 sem stendur
fram á sunnudag.
F-in fjögur nefnast Framtíðar-
gambíturinn, Femínistagambítur-
inn, Fishcergambíturinn og Fyr-
irtækjagambíturinn. „Orðið
gambítur er skákmál fyrir bragð,“
segir Guðfríður og bætir því við að
það sé notað í tengslum við upphaf
stórsóknar í skák. Því sé það orð
vel við hæfi varðandi framtíðar-
stefnumótun Skáksambandsins.
Framtíð skák-
listarinnar efld
Hverju F er ætlað ákveðið hlut-
verk en sem dæmi má nefna er
hugsunin á bak við Framtíðargam-
bítinn að auka og efla til muna veg
skáklistarinnar og beinist það
fyrst og fremst að ungum skák-
mönnum og -konum. T.a.m. með
því að setja ný þátttökumet á
barna- og unglingaskákmótum,
stofnun 10 nýrra taflfélaga um
land allt og hvatt verður til þess að
skák verði tekin upp sem skyldu-
fag í tilteknum grunnskólum
landsins að sögn Guðfríðar. „Það
hefur orðið mikil skákvakning
bæði á meðal barna og unglinga,
og annarra,“ segir Guðfríður um
stöðu skákmála meðal ungs fólks í
dag.
Hún sagði Femínstagambítinn
skýra sig sjálfan en með honum er
ætlað að auka hlut kvenna í skákí-
þróttinni af krafti.
Athygli vekur svokallaði Fisc-
hergambítur, sem vísar til banda-
ríska stórmeistarans í skák Bobby
Fischer. Að sögn Guðfríðar er það
Geðræktarátak Skáksambands Ís-
lands 2004, sem kallast „Hugarafl
við hugarangri“. Guðfríður segir
að hægt sé að nota lögmál skáklist-
arinnar til þess að hjálpa fólki og
gera því kleift að takast á við hug-
arangur hversdagsins, s.s. áhyggj-
ur og öryggisleysi. „Námskeið,
kennsla og fjöltefli verður í boði
endurgjaldslaust fyrir stofnanir og
samtök sem hlúa að þeim er eiga
við geðræn vandamál að stríða frá
fyrsta janúar á næsta ári til fyrsta
janúar árið 2005,“ segir Guðfríður.
Fyrirtækjagambíturinn gengur
út á að fá fyrirtæki til samstarfs
við Skáksambandið að uppbygg-
ingu þess, og bendir Guðfríður á að
MP Fjárfestingarbanki sé aðal-
styrktaraðili hátíðinnar og Ólymp-
íuskáksveitar Íslands 2004.
Víða teflt næstu daga
Á blaðamannafundinum kynnti
Guðfríður til leiks tíunda stór-
meistara Íslendinga í skák, sem
heitir Lenka Placnikova. Auk þess
kynnti Guðfríður Ólympíusveit Ís-
lands í skák 2004 sem keppir á
móti á Mallorca á Spáni, dagana
14.–31. október. Hátíðin hófst
strax eftir fundinn með því að
Placnikova hóf að tefla fjöltefli við
landslið stúlkna í skák. Sömuleiðis
hóf Guðlaug Þorsteinsdóttir, fyrr-
um Norðurlandameistari í skák, að
tefla fjöltefli við Norðurlanda-
meistara barnaskólasveita í skák
2004, Rimaskóla og Laugalækjar-
skóla.
Á laugardag mun Ólympíusveit
Íslands tefla blindandi við alþing-
ismenn, borgarfulltrúa og aðra
góða gesti í Listasafni Reykjavík-
ur, Hafnarhúsinu, klukkan 14. Á
sunnudag lýkur hátíðinni með
kvennaskákmóti í Ráðhúsi Reykja-
víkur þar sem öllum konum og
stúlkum sem kunna mannganginn
er boðið til þátttöku.
Skáksambandið
blæs til sóknar
Morgunblaðið/Kristinn
Guðríður Lilja Grétarsdóttir, forseti Skáksambands Íslands, og Sig-
urður Valtýsson hjá MP fjárfestingabanka skrifa undir samning um
styrk til handa ólympíuliði sambandsins í Þjóðmenningarhúsi í gær.