Tímarit lögfræðinga - 01.01.1953, Blaðsíða 17

Hver átti rejsfeldinnt
11
son hafi ekki átt refsfeldinn, enda mun minnihlutinn ekki
hafa ætlazt til þess, að ummæli hans yrði skilin svo.
Minnihlutinn virðist leggja áherzlu á það, að refurinn
var „villtur" og skaðsamlegur eignum manna. Eins og áður
hefur verið vikið að, sýnist hvorugt af þessu ríða bagga-
muninn. Naut, sem sleppur úr gæzlu, getur verið skaðsam-
legt, ekki aðeins eignum manna, heldur lífi og limum.
Eignarrétturinn er þó ekki glataður. Ekki sýnist það held-
ur ráða úrslitum, þó að dýrið sé „villt“, sinni ekki vilja
manna kúgunarlaust. Ljón, sem slyppi úr dýragarði, enda
ekki vafi um samsemi (identitas) þess, yrði naumast talið
fyrir það eigandalaust. Aðalatriðið sýnist vera, að ekki sé
vafi um samsemi þess dýrs, sem lagt er að velli, og þess,
sem úr gæzlu slapp. Og í þessu máli var ekki um nokkurn
vafa að því leyti að tefla.
Minnihlutinn segir, að eignarréttur geti ekki haldizt „til
frambúðar" á slíku dýri sem silfurrefnum. Sennilega
mundi minnihlutinn þá viðurkenna eignarréttinn, ef dýrið
næst in continenti. En hann vill þó víst ekki binda þetta
svo þröngum mörkum. „Til frambúðar" sýnist gefa það í
skyn, að eignarrétturinn geti þó haldizt nokkru lengur.
Yrði það þá matsatriði hverju sinni, hversu sá tími mætti
langur vera. Er að vísu ekki fullyrðandi, að slíkt mat yrði
ofraun dómendum, en mörkin yrðu óglögg.
Minnihlutinn sýnist leggja nokkuð upp úr því, að nokkrir
dagar virðast hafa liðið frá hvarfi dýrsins, þangað til það
var skotið, og að leit að því varð árangurslaus, enda hafi
það verið unnið fjarri bústað Bjarnar Pálssonar. Minni-
hlutinn metur þessa daga vera svo langan tíma, að eignar-
rétturinn sé horfinn. „Til frambúðar" felur þá í sér ein-
ungis stuttan tíma. Árangursleysi leitarinnar virðist þó
naumast skipta miklu máli. Það fer ekki svo mikið fyrir
einum silfurref og liann hefur mörg fylgsnin. Fjarlægðin
milli Ytri-Löngumýri og Bollastaða er ekki heldur svo
ýkjamikil, þó að svo væri talið, að það atriði skipti annars
máli. Rebbi hefur ekki þurft langan tíma til þess að skoppa
þá vegalengd.