Tímarit lögfræðinga - 01.07.1973, Qupperneq 20

úrskurðir séu rökstuddir eins og dómar í einkamálum. Ætti að vera
nægilegt að tilgreind séu kæruatriði og þær skattaheimildir, sem skatt-
stjóri úrskurðar eftir.
Kæra til ríkisskattanefndar.
Vilji skattþegn ekki sætta sig við úrskurð skattstjóra, getur hann
skv. 41. gr. laga nr. 68/1971, eins og henni hefur verið breytt með
15. gr. laga nr. 7/1972, skotið úrskurði skattstjóra til ríkisskatta-
nefndar.
Ríkisskattanefnd var stofnuð með lögum nr. 20/1932. Skyldi hún
skipuð 3 mönnum og 3 til vara. Samkvæmt 4. gr. laganna skyldi ríkis-
skattanefnd, auk þess að vera kærustig, hafa eftirlit með störfum
skattanefnda, skattstjóra og yfirskattanefnda (en þær voru lagðar
niður 1962) og samræma skattaframtöl og skattaákvörðun í hinum
einstöku skattaumdæmum. Skyldu nefndarmenn, eða þeir er nefndin
kveddi til, ferðast um milli skattanefnda og yfirskattanefnda í þessu
skyni, þegar ástæða þætti til, og yfirleitt leiðbeina um allt, er að
skattaákvörðun og skattaframtali lyti. Nefndin skyldi yfirfara skatt-
skrár og framtalsskýrslur, og hún gat af eigin hvötum rannsakað
hvert það atriði, sem framkvæmd skattalaga varðaði. Nefndin gat af
sjálfsdáðum breytt ályktunum skattanefnda og yfirskattanefnda, þó
að ekki hefði verið kært. Sést af þessari lýsingu, að ríkisskattanefndin,
sem skipuð var af fjármálaráðherra, hefur verið stjórnsýsluaðili, en
ekki dómstóll. Hélzt þetta starfssvið ríkisskattanefndar nær óbreytt
til ársins 1962, en með lögum nr. 70/1962 var sú breyting gerð, að
embætti ríkisskattstjóra var stofnað. Voru þá ýmis þau verkefni
ríkisskattanefndar, sem upp voru talin, falin ríkisskattstjóra. Hann
varð jafnframt formaður ríkisskattanefndar, en aðrir nefndarmenn
skyldu eins og áður skipaðir af fjármálaráðherra. Eftir lagabreyting-
una 1962 voru verkefni ríkisskattanefndarinnar að úrskurða kærur,
sem sendar voru til hennar, og fjalla um mál, sem ríkisskattstj óri sá
ástæðu til að leggja fyrir hana, þó að ekki hefðu verið kærð. Voru
slík mál fyrst og fremst umsóknir skattþegna um ívilnun skv. 52. gr.
laganna eða mál vegna of seint fram kominna framtala. Við tilkomu
rannsóknardeildar ríkisskattstjóra bættust álagningastörf vegna skatt-
svikamála við verkefni nefndarinnar. Jafnframt þessu hefur ríkis-
skattanefnd framkvæmt skattmöt, t. d. mat á búpeningi, skattmat
tekna af landbúnaði, ýmis konar hlunnindamöt, svo sem á fæði og hús-
næði, fatnaði, eigin húsaleigu og námskostnaði.
18